I Timôthê 4:6-16
“Ih athei kơchăng gah akâu ih kơdih păng gah tơdrong ih bơtho mơ̆n. Ih kư̆ kơ adrin pơm khŏm khŏm kiơ̆ thoi inh pơkă na ih gô klaih đơ̆ng tơdrong yoch păng lu bơngai mơ̆ng ih kư̆m klaih mơ̆n.”
(I Timôthê 4:16)
Nơ̆r jet tơchĕng pơwao:
– ‘Bok Pôl bơtho khan kơ Timôthê ‘nĕ păng athei pơm kiơ?
– Yua kơ liơ tơdrong ‘noh kăl hăm bơngai bơ̆jang?
– Nơ̆r bơtho ‘nâu đei tơdrong kăl kiơ hăm lu bơ̆n?
Lăm nơ̆r bơtho đei ăn kơ Timôthê bơngai ‘bok bơtho, đơ̆ng trong 6-16, ‘bok Pôl đei yua minh pôm chư “lê̆”, minh chư “’nĕ” păng drâu tơdrong athei pơm hăm nơ̆r “athei” dah “khŏm”. Blŭng a, sư bơtho ‘nĕ kơ huach jơ năr pơjah dih băl gah tơdrong kư̆ kă, ưh kơ đei pơyua mălei athei pơhrăm pơjuăt tơdrong hli yom (trong 6-10).
Bơngai oei ‘lơ̆p bơ̆jang kơ Kră Yang ngăl pơm kơ lơ bơngai ‘bônh pơjăm, phŏ bơ̆n pơma plơ̆ hăm tơdrong jang bơ̆n wă kơ bơngai nai pơyom, mălei ‘bok Pôl bơtho bơngai bơ̆jang kăl kơ đei tơdrong arih pơm kơmĭl ‘lơ̆ng, đơ̆ng nơ̆r pơma truh tơ tơdrong jang, đĭ đăng tơ’bôh hăm tơdrong ‘mêm tơpă, đon lui pran kơjăp hăm tơdrong arih ‘lơ̆ng rơgoh, mă loi dơ̆ng tơdrong tơ’bưh pơma dơnuh hăm drŏnglo dah drŏkăn. ‘noh bơih trong ‘lơ̆ng hloh tơgŭm akâu jăn bơ̆n kơdih rai ‘lơ̆ng hloh, lui kơjăp hloh, bơ̆jang ‘lơ̆ng hloh, păng đe rai pơyom.
Bơngai bơ̆jang kơ Kră Yang kăl kơ tơchĕng kơ tơdrong đŏk nơ̆r Kră Yang păng pơma pơlung, bơtho pơhrăm tơm sư hăm Nơ̆r Kră Yang. Bơngai hơ’lơ̆p đei jơhngơ̆m pran hơbĕch hơbal păng pran kơtang na ngăl năm hloi lăm tơdrong jang, awih awăn ưh kơ gleh lap. Pơnam adrin ‘noh ‘lơ̆ng, mălei kăl kơ pơtơm blŭng a đơ̆ng hlôh nơ̆r Kră Yang mă trŏ, tơdah ưh, lu bơ̆n gô bơ̆jang ngeh kơ ‘lơ̆ng mălei tơpă tă tơ ưh kơ đei yua.
Dah đei pơhrăm pơjuăt jơ̆hngơ̆m đon tơchĕng bơih, pơnam kơ đŏk Nơ̆r Kră Yang bơih, bơngai bơ̆jang kơ Kră Yang wă yua iŏk tơdrong Kră Yang ăn kơ bơ̆n bơ̆jang kơ Sư. Khul hơ’lơ̆p hơmuh hơmŏng đei lơ tơdrong bơ̆n ‘maih jang, na lu bơ̆n jing ‘bônh kơ tơhiong lê̆ tơdrong kơnhăm tơpă mă Kră Yang đei krao lu bơ̆n wă bơ̆jang kơ Sư, hiơt kơ tơdrong Kră Yang ăn kơ bơ̆n. băt kơnăl păng ling lang oei yua iŏk tơdrong mơnat Kră Yang ăn kơ bơ̆n noh thoi bơ̆n huay kơ brah brư huach kư̆ kă tơdrong pran bơ̆n đơ̆ng ‘lơ̆p, mălei yak năm “tơnăp” lăm tơdrong lui yom lăm tôm tơdrong.
Nơ̆r “athei” păng “kư̆” lăm trong 16 pơma pơtôm đĭ lăm nơ̆r bơtho athei pơhrăm pơjuăt tơdrong lui yom kơ Kră Yang. “Ih athei kơchăng gah akâu ih kơdih păng gah tơdrong ih bơtho mơ̆n. Ih kư̆ kơ adrin pơm khŏm khŏm kiơ̆ thoi inh pơkă na ih gô klaih đơ̆ng tơdrong yoch păng lu bơngai mơ̆ng ih kư̆m klaih mơ̆n.” (trong 16), ‘noh nơ̆r kăl dêh bơngai bơ̆jang awih awăn, yua dah ưh kơ pơ’lơ̆ng păng ưh kơ adrin, tơdrong yoch gô mơ̆t pơrăm tơdrong jang ding ‘bơm truh tơdrong arih ưh kơ đei yua ăn kơ Kră Yang păng đei ‘bơm truh tơ bơngai nai tơdrong kơnê̆.
Kră Yang Yêsu răt huai iŏk lu bơ̆n hlôi bơih đơ̆ng đĭch yang kơnê̆ păng tơdrong yoch wă kơ lu bơ̆n gơh bơ̆jang kơ Sư, rim ‘nu kơ lu bơ̆n Kră Yang yua phara. Yua kơ thoi noh, nơ̆r ‘bok Pôl bơtho ưh kơ trŏ kơ ‘măn kơ ‘Bok Timôthê bơngai bơtho mălei oei đei gĭt kăl truh tơ rim ‘nu lu bơ̆n dang ei. Athei pơhrăm iŏk tơdrong arih lui yom kơ Kră Yang kiơ̆ kơ nơ̆r ‘bok Pôl bơtho wă kơ rim năr bơ̆jang rai ‘lơ̆ng hloh.
Ơ Kră Yang, inh bơnê kơ Ih đei pơklaih inh bơih păng ăn kơ inh gơh bơ̆jang kơ Ih. Apinh Ih tơgŭm inh ‘măn adrol hloh ‘noh pơhrăm iŏk tơdrong arih lui yom kơ Kră Yang, mă loi đơ̆ng nơ̆r pơma, tơdrong arih sa, đon lui, tơdrong ‘mêm mơnat, arih ‘lơ̆ng rơgoh, păng đơ̆ng jơhngơ̆m ‘maih hŏk pơhrăm nơ̆r Kră Yang, pơma pơlung, bơtho tơ’bôh, yua iŏk tơdrong Kră Yang mơnat ăn. Krao khan yua anăn Kră Yang Yêsu Krist, Amen.
Lu bơ̆n yua iŏk nơ̆r bơtho ‘nâu lăm tơdrong arih bơ̆n bơ̆jang kơ Kră Yang thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: Êsêkên 31
Kênh Youtube BHKTHN:
