Klei Aê Diê Blŭ: Klei Mtô Mñă Klei Bhiăn 13:1-5
Êlan kliăng: “Đăm dôk hmư̆ ôh klei khua pô hưn êlâo anăn amâodah pô kreh êpei anăn blŭ; kyuadah Yêhôwa Aê Diê diih lông dlăng diih, čiăng thâo thâodah diih khăp kơ Yêhôwa Aê Diê diih hŏng jih ai tiê leh anăn hŏng jih mngăt diih.” (Klei Mtô Mñă Klei Bhiăn 13:3).
Klei êmuh ksiêm mĭn: Ya bruă klam kơ phung khua pô hưn êlâo? Ya ngă Aê Diê ăt brei phung khua pô hưn êlâo dưi ngă đa đa klei myang? Ya bruă brei phung ƀuôn sang Israel ngă čiăng thâo kral khua pô hưn êlâo sĭt leh anăn khua pô hưn êlâo mgưt? Si ngă drei ba yua klei hriăm anei kơ pô?
Y-Môis mtă kơ phung ƀuôn sang Israel năng ai srăng tŭ klei arăng mplư kkuh mpŭ kơ phung yang mkăn hluê si hdră mdê mdê. Hlăm trăn Klei Aê Diê Blŭ anei, ñu lač kơ klei mplư hriê mơ̆ng phung khua pô hưn êlâo mgưt. Phung khua pô hưn êlâo jing phung hiu hưn Klei Aê Diê Blŭ kơ phung ƀuôn sang čiăng kơ diñu hluê ngă hŏng hdră kñăm ba klei guh kơang kơ Khua Yang leh anăn klei tŭ dưn kơ phung ƀuôn sang Ñu. Kyua anăn tơdah sa čô mnuih wăt tơdah mâo klei dưi mblang klei êpei, hưn êlâo klei bi knăl, leh anăn boh nik jing dŭm klei hưn êlâo anăn mâo, ƀiădah pô anăn lŏ atăt êlan leh anăn jak iêô phung ƀuôn sang Aê Diê tui hlue leh anăn kkuh mpŭ kơ phung yang luar, snăn pô anăn klă sĭt jing khua pô hưn êlâo mgưt.
Khua pô hưn êlâo sĭt jing pô sĭt suôr nanao hŏng Aê Diê leh anăn dŭm klei ñu hiu hưn jing djŏ tui si Klei Blŭ diñu tŭ leh mơ̆ng Aê Diê. Yang jhat jing dĭng buăl bi kdơ̆ng anăn diñu ăt mâo đa đa klei myang. Diñu ăt dưi ngă dŭm bruă myang amâodah dưi ngă dŭm klei bi knăl myang ƀiădah hŏng hdră kñăm ngă kơ arăng bi kdơ̆ng hŏng Aê Diê čiăng kkuh kơ rup yang mkăn. Aê Diê brei dŭm klei anei truh amâo djŏ ôh Ñu dôk luč klei dưi kriê dlăng, ƀiădah Aê Diê čiăng lông dlăng phung ƀuôn sang Aê Diê khăp kơ Khua Yang jih ai tiê mơ̆. Tơdah phung ƀuôn sang Aê Diê amâo hlue ngă ôh klei phung khua pô hưn êlâo mgưt lač snăn diñu hgao leh sa klei lông dlăng yuôm bhăn, bi êdah ai tiê sĭt suôr kluôm ênŭm hŏng Aê Diê. Bi klei bi kmhal kơ phung khua pô hưn êlâo mgưt bi kdơ̆ng hŏng Aê Diê jing tŭ klei bi mdjiê.
Hlăm ênuk ară anei, drei khăng hmư̆ lu bruă mâo jing myang snăk, leh anăn mâo lu mnuih đăo leh hlăm klei anăn čiăng kkuh mpŭ kơ yang jhat. Đa đa phung đăo kơ Krist ƀuh rŭng răng leh anăn bi mlih klei mĭn leh hmư̆ amâodah dlăng klei hưn snăn. Drei đăm wơr ôh, hlăm Klei Aê Diê Blŭ mâo dŭm klei myang dưi ngă amâo kbiă hriê mơ̆ng Aê Diê ôh. Khădah snăn, drei đăm ôh kyua dŭm klei myang, klei mblang klei êpei dưi jing sĭt leh anăn klei đăo amâo lŏ kjăp. Kyua anei jing dŭm klei Khua Yang Yêsu hưn êlâo srăng truh hlăm hruê knhal tuč (Y-Mathiơ 7:15-23). Brei drei dlăng kơ Klei Aê Diê Blŭ čiăng thâo kral sĭt- mgưt, jih ai tiê đăo kơ Khua Yang, hlue ngă Klei Aê Diê Blŭ mtô čiăng kjăp ai tiê ti anăp klei rŭng răng hlăm klei hdĭp.
Drei tuôm mgei ai tiê mơ̆ sĭt hmư̆ klei yăl dliê kơ klei myang mâo hlăm anôk anei amâodah anôk mkăn?
Wah lač: Ơ Khua Yang, Ih jing Pô Myang sa anăn kâo kkuh mpŭ. Akâo kơ ih đru kâo jih ai tiê klei mĭn đăo kơ Ih, leh anăn hdĭp sĭt suôr hŏng Ih ti krah klei hdĭp bŏ hŏng klei mplư jŭm dar.
Dlăng Klei Aê Diê Blŭ hlăm tlâo thŭn: Y-Yôp 24:1; 25:1-6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
