II-Kevcai 13:1-5
Nqe cim:
“los nej tsis txhob ntseeg tej lus uas nws hais ntawd li. Rau qhov tus Tswv uas yog nej tus Vajtswv siv nws sim nej siab, saib nej puas hlub tus Tswv kawg siab kawg ntsws tiag” (II-Kevcai 13:3).
Lus nug rau sawvdaws xav:
- Cov cev lus tes haujlwm yog dab tsi?
- Vim li cas tus Tswv tseem cia tej cev lus cuav ua tau qee yam txujci tseemceeb?
- Vajtswv haiv neeg Yixalayees yuav tsum ua li cas thiaj zeem paub tej cev lus tseeb thiab cev lus cuav?
- Peb yuav ua li cas rau zaj kawm hnub no?
Ib tsoom mloog txhua tus,
Mauxes ceebtoom cov Yixalayees hais tias, yuav muaj cov cev lus cuav tuaj dag ntxias lawv mus pe hawm ntau tus vajtswv tsis tseeb uas zoo sib txawv. Hauv ntu Vajluskub no, Mauxes hais txog cov cev lus cuav tej kev dag ntxias. Cev lus yog cov neeg uas Vajtswv siv los hais Vajtswv tej lus rau Nws haiv neeg kom lawv paub ua raws, ua rau Vajtswv lub koob npe nrov ncha thiab muaj nqis rau Vajtswv haiv neeg. Yog li ntawd, thaum muaj ib tug neeg txawj txhais npausuav, paub txog tej yam yuav muaj los lossis hais ua ntej txog yam yuav muaj los txawm muaj li ntawd, tiamsis nws dag ntxias coj Vajtswv haiv neeg mus pe hawm lwm tus Vajtswv ces tus ntawd paub tseeb yog cev lus cuav.
Tus cev lus tseeb yog tus ua ncaj rau Vajtswv tej lus thiab hais raws nraim li tej lus uas tus Tswv kom nws hais. Dab Ntxwjnyoog tus uas ntxeev siab rau Vajtswv yeej muaj fwjchim ua tau qee yam txujci, tiamsis nws lub hom phiaj yog ua kom tibneeg tig nruab qaum rau Vajtswv thiab mus pe hawm tej vajtswv uas tsis yog tus Tswv tseeb. Vajtswv pub cai tej ntawd tshwmsim muaj tuaj tsis yog Vajtswv tswj tsis tau Dab, tiamsis yog tus Tswv xav cia sim saib Nws haiv neeg puas tas siab hlub Nws. Yog Vajtswv haiv neeg tsis ua raws li cov cev lus cuav tej lus dag ntxias ces lawv hla dhau kev sim siab tseemceeb uas qhia hais tias lawv muaj lub siab npuab Vajtswv tiag tiag. Dua li yam uas tej cev lus cuav yuav tau txais yog raug muab tua povtseg thiab raug txim mus ibtxhis.
Tiam neej nimno, peb kuj pheej hnov muaj tej yam xwm txawv txawv xav tsis thoob tshwmsim, ua rau qeeleej ntseeg txog tej ntawd kom tau mus pe hawm tej vajtswv tsis tseeb. Cov ntseeg muaj ib txhia kuj xav tsis thoob thiab lub siab ywjfab ywjfwj thaum hnov txog tej yam xwm txawv ntawd. Peb txhob hnov qab hais tias, hauv Vajluskub sau hais txog qee yam txujci txawv xav tsis thoob yeej tsis yog tus Tswv ua tej ntawd. Yog li ntawd, peb txhob vim pom tej txujci txawv, tej lus txhais npausuav muaj tiav li ntawd ua rau peb kev ntseeg ywjfab ywjfwj. Vim tej yam xwm txawv ntawd yeej yuav muaj tuaj kom raws li Tswv Yexus tau hais tseg txog thaum lub ntiajteb yuav kawg (Mathais 7:15-23). Peb yuav tau saib Vajtswv Txojlus kom meej thiaj paub feeb cov tseeb thiab cov cuav, cia siab ruaj khov rau tus Tswv, ua raws li Nws tej lus qhia thiab ua neej sawv khov kho twb taubhau nrog tej teebmeem hauv lub neej.
Thov Vajtswv,
Tus Tswv, Koj yog tus Vajtswv tseeb uas nyuam yaus tab tom pe hawm. Thov Koj pab kom nyuam yaus tas siab ntsws cia siab ntsoov rau Koj thiab ua neej nyob nrog lub ntiajteb uas muaj ntau yam kev dag ntxias no. Amees.
Ib tsoom cov mloog uas hmov thiab tshua,
Peb puas muaj lub siab xav ywjfab ywjfwj thaum hnov txog tej yam txawv txawv tshwmsim nyob qhov ub qhov no yav dhau los?
Nyeem Vajluskub hauv peb lub xyoo: Yauj 24:1-25:6
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
