Klei Aê Diê Blŭ: Galati 6:12-18
Êlan kliăng: “Kyuadah klei khăt klĭt amâo jing yuôm ôh, amâodah klei amâo khăt klĭt kăn jing yuôm rei, knŏng klei jing mnuih Aê Diê hrih mrâo jing yuôm” (Galati 6:15)
Klei êmuh ksiêm mĭn: Si klei kñăm čiăng phung pô mtô soh mdê hŏng klei kñăm čiăng Khua ƀĭng kna Y-Pôl? Khua ƀĭng kna Y-Pôl lač ya klei jing yuôm hĭn? Ya klei bi hriăm yuôm drei mâo kơ klei hdĭp myang drei pô?
Êlâo kơ bi ruê̆ hră čih mơĭt kơ phung đăo ti čar Galati, Khua ƀĭng kna Y-Pôl lŏ wĭt kơ klei phŭn mtrŭt ñu čih hĕ hră mơĭt anei. Klei kñăm čiăng phung pô mtô soh mgô̆ phung đăo phung tue ti čar Galati tŭ klei khăt klĭt kyua “čiăng bi êdah bruă jăk hlăm kđeh”, “knŏng čiăng arăng amâo ngă jhat ôh kơ diñu kyua kyâo bi kal Krist”, “čiăng kơ diñu dưi bi mni kơ diñu pô” (êlan 12-13). Ngă klei bi mơak kơ mnuih mkăn leh anăn čiăng arăng bi mni kơ pô hŏng klei mtrŭt phung mâo klei bi hmăi mơ̆ng pô mjing klei amâo jing yuôm ôh jing klei yuôm hĭn, anăn jing sa klei čhuai djiê mnuih! Bi mni kơ diñu pô “hlăm kđeh” si tô hmô yua klei arăng dưi ƀuh msĕ si klei khăt klĭt pioh bi êdah hnơ̆ng diñu huĭ mpŭ kơ Aê Diê. Phung msĕ snăn Khua ƀĭng kna Y-Pôl pia jing phung mă “tian diñu pô jing yang diñu” (Philip 3:19). Ênưih snăk diñu lĕ hlăm klei mplư bi mlih klei sĭt nik mơ̆ng Klei Mrâo Mrang Jăk čiăng mă tŭ klei bi mni leh anăn klei tŭ ư mơ̆ng mnuih.
Ƀiădah Khua ƀĭng kna Y-Pôl mâo klei kñăm čiăng mdê snăk: “Hŏng kyâo bi kal lăn ala djiê leh kơ kâo, leh anăn kâo djiê leh kơ lăn ala” (êlan 14). Jih jang klei arăng bi mni leh anăn mưč, klei arăng ngă jhat amâodah klei arăng tŭ, hŏng ñu jing klei ñu amâo lŏ uêñ mĭn ôh, jih jang klei anăn amâo lŏ jing yuôm ôh kyuadah ñu yap ñu pô djiê leh ti kyâo bi kal mbĭt hŏng Krist. Khua ƀĭng kna Y-Pôl hưn sa klei sĭt nik snei: “Kyuadah klei khăt klĭt amâo jing yuôm ôh, amâodah klei amâo khăt klĭt kăn jing yuôm rei, knŏng klei jing mnuih Aê Diê hrih mrâo jing yuôm” (êlan 15). Jih jang bruă ngă bi êdah klei huĭ mpŭ ti êngao amâo jing yuôm mđơr hŏng klei Aê Diê bi mlih hlăm lam brei jing mnuih hrih mrâo ôh. Snăn yơh, si ngă drei srăng ksiêm mkă čiăng thâo drei mâo klei hrih mrâo leh hĕ amâodah ka ôh? “Kyuadah arăng thâo kral grăp ana kyâo tui si boh gơ̆” (Y-Luk 6:44). Boh anei, msĕ si Khua ƀĭng kna Y-Pôl lač leh hlăm kdrêč 5 leh anăn kdrêč 6, jing knuih Yang Mngăt Jăk bi mlih mrâo leh, anăn jing klei dôk dơ̆ng ƀơ̆ng huă hŏng klei khăp, klei pap, đru bi gui klei ktrŏ leh anăn bi mbha kơ mnuih mkăn.
Hruê anei, mâo lu blư̆ Phung Sang Aê Diê knŏng uêñ mĭn kơ klei mkŏ mjing, rup ti êngao, boh tŭ dưn jăk dưi mă tŭ…hĭn kơ klei bi mđĭ klei đăo čiăng kơ phung đăo dưi “jing mnuih hrih mrâo.” Jih jang klei anăn jing yuôm, ƀiădah klei đru bi mđĭ hdơ̆ng phung đăo čiăng jing mnuih hrih mrâo srăng dưm êlâo hĭn kơ jih jang bruă mkăn. Khua Yang uêñ mĭn nanao kơ klei hdĭp drei bi mlih jing mrâo kluôm ênŭm (II Kôrantô 5:17). Brei phung đăo drei uêñ mĭn kơ klei anei čiăng kơ drei amâo jing ôh phung mă tŭ lu boh tŭ dưn ƀiădah hlăm ai tiê amâo mâo sa mta mnơ̆ng ôh.
Si ngă drei dưm êlâo hĭn klei jing mnuih hrih mrâo hlăm Khua Yang hĭn kơ jih jang klei mkăn mơ̆?
Wah lač: Ơ Khua Yang, kâo lač jăk kơ Ih kyuadah Ih bi hriăm leh kâo klei bi mlih jing mrâo hlăm ai tiê jing yuôm hĭn kơ jih jang klei mkăn. Đru kâo knŏng mĭn kơ klei čiăng bi mơak kơ Ih hŏng klei jing mnuih hrih mrâo hrô kơ klei čiăng kơ mnuih mkăn tŭ. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 56-57
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
