Kalatias 6:12-18
Nqe cim:
“Qhov uas neeg ua kevcai txiav lossis tsis ua, qhov ntawd yeej tsis tseemceeb dabtsi; qhov tseemceeb yog qhov uas neeg muaj dua lub siab tshiab” (Kalatias 6:15)
Lus nug rau sawvdaws xav:
– Cov Xibfwb cuav lub homphiaj txawv Timthawj Paulus lub homphiaj li cas?
– Timthawj Paulus hais meej yam dabtsi tseemceeb dua?
– Peb tau ntuas txog yam dabtsi ntawm lub neej sab ntsujplig?
Ua ntej yuav xaus tsab ntawv xa rau cov ntseeg hauv Kalatias, Paulus rov hais txog lub homphiaj uas nws sau tsab ntawv no. lub homphiaj cov Xibhwb cuav tuaj dag ntxias cov ntseeg uas yog lwm haivneeg hauv Kalatias kom yuav tsum ua kevcai txiav, vim lawv “xav tau ntsej muag raws li nqaij tawv” “xwv lawv thiaj tsis raug tsimtxom vim yog tim Khetos tus khaublig ntoo xwb “kom lawv thiaj tau coj nej lub cev nqaij tawv mus khav.” (nqe 12- 13HMOWSV). Ua kom lwm tus txaus siab thiab kom yus muaj plhus los ntawm qhov uas dag ntxias cov neeg uas yus sib txuas ua ke thiab hloov yam uas tsis muaj nqis dhau mus ua yam uas muaj nqis yog ib yam kev txhaum tua neeg. Khav txog “sab nqaij tawv” yog siv tej yam uas qhovmuag pom xws li ua kevcai txiav coj los ua tus tshim ntsuas yus kev ntseeg. Cov neeg uas ua zoo li ntawd, timthawj Paulus hais tias “lawv muab tej kev phem kev qias los saib hlob dua lwm yam huv tibsi” (Filipis 3:19). Lawv yoojyim poob rau lub vojhlua uas muab qhov tseeb ntawm txoj Moo Zoo los pauv tej kev qhuas ntawm tibneeg.
Timthawj Paulus tsis zoo li cov Xibfwb cuav, nws muaj lub homphiaj txawv lawv, nws hais tias: “Twb yog vim kuv ntseeg tus uas tuag saum ntoo khaublig, neeg ntiajteb thiaj suav hais tias kuv yog tus uas tuag lawm. Thiab kuv suav hais tias, tej uas muaj nyob hauv ntiajteb no tsis muaj ib yam uas tseemceeb li” (nqe 14). Tej lus qhuas, lus thuam, kev tsimtxom lossis kev txais yuav ntawm tibneeg ntiajteb, tsis yog qhov uas Paulus pheej xav txog lawm, txhua yam ntawd puavleej dhau los ua yam uas tsis maj qabhau rau Paulus, vim nws suav hais tias nws twb tuag thiab raug ntsia saum ntoo khaublig nrog Tswv Yexus lawm. Timthawj Paulus hais meej txog qhov tseeb hais tias: “…neeg ua kevcai txiav lossis tsis ua, qhov ntawd yeej tsis tseemceeb dabtsi; qhov tseemceeb yog qhov uas neeg muaj dua lub siab tshiab” (nqe 15). Tej haujlwm qhia tshwm kev ntseeg sab nraud tsis tseemceeb npaum li tau Vajtswv hloov pauv sab hauv dhau los ua tus neeg tshiab. Yog li ntawd, yuav ua li cas thiaj ntau nqi tau hais tias, yus hloov pauv lawm lossis tsis tau? “pom cov txiv paub tsob ntoo” (Lukas 6:44). Cov txiv yog tej yam uas Paulus tau hais nyob hauv tshooj 5 thiab 6, yog tus uas tau Vaj Ntsujplig hloov pauv lawm, ua neej muaj kev hlub, zam txim, sib pab ris nra thiab muab tej uas yus muaj faib rau lwm tus.
Niaj hnub nimno, ntau pawg ntseeg tsuas xav txog kev txhim tsa, tsim kevcai, khav tej uas yus ua tau… heev tshaj li yuav txhim kho kev ntseeg kom Vajtswv cov menyuam “muaj dua lub siab tshiab”. Tagnrho txhua yam ntawd puavleej cheemtsum, tiamsis txhim kho cov ntseeg kom dhau mus ua tus neeg tshiab yuavtsum yog qhov uas tseemceeb dua lwm yam huv tibsi. Vajtswv yeej xav kom peb muaj lub neej hloov dua tshiab huv tibsi (2 Kauleethaus 5:17). Vajtswv cov menyuam yuav tsum xav ntsoov rau lub neej tshiab, kom peb tsis txhob yog cov neeg uas sawv tib thaj chaw thiab sab ntsujplig qaug zog zis.
Thov Vajtswv,
Vajtswv, nyuam yaus ua Koj tsaug uas Koj ntuas nyuam yaus dhau los ntawm tej Txojlus no hais tias kev hloov dua lub siab tshiab tseemceeb dua txhua yam. Thov pab nyuam yaus tsis ua li neeg ntiajteb nyiam tiamsis ua tej haujlwm ntawm tus neeg hloov dua tshiab kom haum Koj siab. Nyuam yaus tuav Tswv Yexus Khetos lub npe thov, Amees.
Peb puas xav ntsoov kev hloov ua tus neeg tshiab yog qhov tseemceeb dua lwm yam?
Nyeem Vajluskub hauv peb lub xyoos: Ntawv Nkauj 56-57
Kênh Youtube BHKTHN:
