Klei Aê Diê Blŭ: Y-Mathiơ 23:37-39
Êlan kliăng: “Ơ ƀuôn Yêrusalem, ƀuôn Yêrusalem, ih bi mdjiê phung khua pô hưn êlâo leh anăn bhĭr boh tâo kơ phung arăng tiŏ nao kơ ih! Jêñ jêñ leh kâo čiăng bi kƀĭn mbĭt phung anak ih msĕ si sa drei mnŭ ana bi kƀĭn êđai gơ̆ ti gŭ siap gơ̆, ƀiădah diih amâo čiăng ôh! (Y-Mathiơ 23:37)
Klei êmuh ksiêm mĭn: Si Aê Diê ngă leh hŏng phung ƀuôn sang Ñu ruah? Si knuih diñu mâo hŏng Aê Diê leh anăn phung dĭng ktang Aê Diê? Ya boh jhat diñu srăng tŭ? Ya klei hriăm drei mâo kơ pô?
Khua Yang Yêsu yua rup Yêrsalem bi ala kơ phung ƀuôn sang Aê Diê ruah Israel. Ñu čŏk hia kơ digơ̆. Boh blŭ “Yêrusalem” jing ƀuôn êđăp ênang ƀiădah jih hƀuê ênuk, ƀuôn prŏng anei lŏ jing anôk kkuh kơ rup yang, klei ngă jhat leh anăn klei soh, “Ƀiădah Yêhôwa tiŏ nao phung khua pô hưn êlâo kơ diñu čiăng atăt diñu wĭt kơ Yêhôwa; phung khua pô hưn êlâo anăn hưn klei bi kdơ̆ng hŏng diñu, ƀiădah diñu amâo uêñ dôk hmư̆ ôh” (II Klei Yăl Dliê 24:19). Khua Yang Yêsu lač kơ phung ƀuôn sang Ñu ruah, “Jêñ jêñ leh kâo čiăng bi kƀĭn mbĭt phung anak ih msĕ si sa drei mnŭ ana bi kƀĭn êđai gơ̆ ti gŭ siap gơ̆, ƀiădah diih amâo čiăng ôh!” (êlan 37). Diñu hngah kơ klei jăk, klei khăp, leh anăn klei răng mgang jih hnơ̆ng tơdah dưi dôk ti gŭ siap Khua Yang. Klei hngah anăn amâo djŏ knŏng mâo hlăm ênuk leh êgao ôh ƀiădah ăt dôk mâo truh kơ ară anei leh anăn êdei anăp, “Ñu hriê leh kơ čar Ñu pô, ƀiădah phung ƀuôn sang Ñu pô amâo jum Ñu ôh” (Y-Yôhan 1:11).
Hlăk êjai anak mnuih êpa mhao tui duah klei jăk Aê Diê leh anăn dưi dôk ti gŭ siap Ñu, msĕ si klei Mtao Đawit kwưh akâo: “Ơ Aê Diê, klei Ih khăp yuôm êdimima! Ti gŭ êyui siap Ih phung anak mnuih đuĕ dăp” (Klei Mmuñ Hđăp 36:7), snăn phung ƀuôn sang Ñu ruah lŏ dlăng hơăi mang klei jăk hŏng klei pap Aê Diê brei kơ diñu. Msĕ si klei pô čih hră lač leh hlăm II Klei Yăl Dliê 36:15-16: “Yêhôwa Aê Diê phung aê diñu tiŏ phung hưn kơ diñu nanao, kyuadah gơ̆ mâo klei pap kơ phung ƀuôn sang gơ̆ leh anăn kơ anôk gơ̆ dôk, ƀiădah diñu mưč nanao kơ phung mnuih Aê Diê tiŏ nao, bi êmut kơ klei gơ̆ blŭ, djă djik djak kơ phung khua pô hưn êlâo gơ̆, tơl klei Yêhôwa ngêñ đĭ lar kơ phung ƀuôn sang gơ̆, tơl amâo dưi lŏ bi hlao ôh”. Boh jhat knuih dlăng klei jăk leh anăn klei pap Aê Diê hơăi mang jing gŏ sang diñu srăng tŭ klei luč ram (êlan 39). Ară anei diñu amâo srăng lŏ ƀuh ôh Khua Yang kyua diñu mdjiê leh Khua Yang, leh anăn sa ênuk klei pap dưi pŏk kơ phung ƀuôn sang tue. Khădah snăn, Aê Diê ăt pap kơ phung ƀuôn sang Ñu ruah, mâo sa hruê, phung ƀuôn sang Israel knhal tuč srăng lač hlăm klei đăo: “Mpŭ mni kơ Pô hriê hlăm anăn Khua Yang” leh anăn hlăm hruê anăn phung ƀuôn sang Israel srăng mâo klei bi mtlaih, bi mrâo.
Phung đăo hruê anei dôk hdĭp hlăm ênuk klei pap, jing ăt dôk hlăm klei khăp leh anăn klei Khua Yang kriê dlăng, ăt dôk mâo mmông găl kmhal klei soh čiăng mâo Khua Yang bi mrâo. Brei drei thâo kơ klei khăp Khua Yang brei kơ pô čiăng sĭt suôr mă bruă kơ Khua Yang, hdĭp klei hdĭp bi guh kơang Anăn Ñu.
Si hdră drei mpŭ kơ klei pap leh anăn klei khăp Aê Diê brei kơ pô?
Wah lač: Ơ Khua Yang khăp hơiêng, bi mni kơ Ih kyua Ih ăt bi êdah nanao klei pap leh anăn ai tiê Ih gĭr hlăm klei hdĭp kâo. Kâo bi mni kơ Ih kyua Ih brei kơ kâo mmông găl čiăng kmhal klei soh leh anăn mâo Khua Yang bi mrâo. Akâo kơ Ih đru kâo sĭt suôr êbat hŏng Khua Yang truh knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
