Mathais 23:37-39
Nqe cim:
“Yeluxalees, Yeluxalees! Koj muab cov uas cev Vajtswv lus tua povtseg, koj muab pobzeb ntaus cov tubtxib uas Vajtswv txib los qhia koj! Muaj ntau zaus kuv twb yuav muab koj cov pejxeem los puag, ib yam li tus pojqaib cuab nws cov menyuam los puag rau hauv nws ob sab qab tis, tiamsis koj tsis cia kuv ua li ntawd!” (Mathais 23:37)
Lus nug xav:
– Vajtswv tau coj li cas rau Nws haivneeg?
– Lawv muaj tus cwjpwm li cas rau Vajtswv thiab Nws cov cev lus?
– Lawv yuav tau txais tej nuj nqi twg?
– Peb kawm tau zaj kawm dabtsi rau yus?
Tswv Yexus siv tus duab Yeluxalees sawv cev rau Vajtswv haivneeg. Tswv Yexus quaj rau lawv. Lolus “Yeluxalees” lub ntsiab yog lub nroog kaj siab tiamsis ua ntu zus hauv keebkwm los lub nroog no dhau los ua chaw pe mlom, sib ntaus thiab ua kev txhaum, “Tus TSWV tso cov cev Vajtswv lus mus coj lawv rov los cuag Nws, tiamsis lawv tsis mloog cov cev Vajtswv lus hais li” (2 Xwmtxheej Vajntxwv 24:19). Tswv Yexus tau quaj txog Nws haivneeg, “Muaj ntau zaus kuv twb yuav muab koj cov pejxeem los puag, ib yam li tus pojqaib cuab nws cov menyuam los puag rau hauv nws ob sab qab tis, tiamsis koj tsis cia kuv ua li ntawd!” (nqe 37). Lawv tsis txais yuav Vajtswv koob hmoov, kev hlub thiab kev tiv thaiv thaum uas tau nyob hauv Vajtswv phabtis tsom kwm. Txoj kev tsis txais yuav ntawd tsis yog nyob rau yav dhau los xwb tiamsis tseem muaj nyob los txog nim no thiab yav tom ntej, “Nws los rau hauv nws lub tebchaws, tiamsis nws haivneeg tsis lees yuav nws” (Yauhas 1:11).
Thaum ntawd tibneeg ntshaw thiab nrhiav Vajtswv kev hlub thiab xav tau nyob hauv Vajtswv phabtis tsom kwm, li vajntxwv Daviv tau hais tseg: “Vajtswv, koj txojkev hlub zoo kawg nkaus! Peb nrhiav tau koj ob phabtis tus duab ntxoov ntxoo los tsomkwm peb thiab ua peb qhov chaw nkaum xwb (Ntawv Nkauj 36:7), tiamsis Vajtswv haivneeg saib tsis taus Vajtswv koob hmoov thiab lub siab hlub tshua uas pub rau lawv. xws li kev lees paub hauv tus sau 2 Xwmtxheej Vajntxwv 36:15-16: “Tus TSWV uas yog lawv cov yawgkoob tus Vajtswv txib cov cev Vajtswv lus ntuas lawv ua ntu zus, rau qhov nws hlub nws haivneeg thiab lub Tuamtsev. Tiamsis lawv saib tsis tau Vajtswv cov cevlus, tsis quavntsej nws tej lus thiab luag cov cev Vajtswv lus plig mus txog thaum tus TSWV chim rau nws haivneeg, lawv thiaj khiav tsis dim tus TSWV txojkev rau txim li”. Nuj nqi uas ua saib tsis taus Vajtswv txoj koob hmoov thiab lub siab hlub tshua mas yog lawv tej vajtsev yuav poob rau kev puastsuaj (nqe 39). Tamsim no lawv yuav tsis pom Tswv Yexus lawm vim lawv muab Nws tua pov tseg, tiamsis yuav qhib muaj ntu caijnyoog koob hmoov rau lwm haivneeg. Txawm li ntawd los, Vajtswv yeej tseem hlub Nws haiv neeg heev, muaj ib hnub twg thaum lub sijahwm kawg cov Yixalayees yuav hais hauv kev ntseeg hais tias “Thov Vajtswv foom koob hmoov rau tus uas Vajtswv txib los” hnub ntawd cov Yixalayees yuav tau cawmdim thiab hloov dua tshiab.
Cov ntseeg niaj hnub nim no tabtom nyob rau ntu caij nyoog koob hmoov, txhais hais tias tseem hauv Vajtswv kev hlub kev tsom kwm, tseem muaj sijhawm tso kev txhaum tseg kom tau Vajtswv hloov dua tshiab. Peb yuav tsum zeem paub Vajtswv txoj kev hlub uas Nws pub rau yus kom peb ncajncees ua Nws haujlwm, ua neej rau Nws lub npe raug qhuas.
Thov Vajtswv,
Vajtswv nyuam yaus ua Koj tsaug vim Koj niaj hnub pub koob hmoov thiab ua siab ntev rau nyuam yaus. Ua Koj tsaug uas pub sijhawm rau nyuam yaus tso kev txhaum tseg thiab tau Koj hloov dua tshiab. Thov pab nyuam yaus ua neej ncajncees nrog Koj mus txog hnub kawg. Nyuam yaus tuav Tswv Yexus Khetos lub npe thov, Amees.
Peb saib Vajtswv txoj koob hmoov thiab kev hlub muaj nqis li cas?
Nyeem Vajluskub hauv peb lub xyoos: Exekees 24
Kênh Youtube BHKTHN:
