Klei Aê Diê Blŭ: Klei Bi Hriêng 21:28-29
Êlan kliăng: “Pô hưn luar srăng rai tuč, ƀiădah mnuih thâo gưt srăng dưi blŭ nanao.” (Klei Bi Hriêng 21:28)
Klei êmuh ksiêm mĭn: Si boh jhat mơ̆ng klei hưn luar ba kơ pô mkăn leh anăn kơ pô? Ya boh tŭ mơ̆ng klei hưn sĭt nik? Si Khua Yang Yêsu mtô drei brei răng tơdah ƀuah mkra pô mkăn?
Hlăm dua êlan Klei Bi Hriêng 21:28-29 mâo klei bi mklăk klei čiăng lač kơ pô hưn luar hŏng “mnuih ƀai”, bi mnuih thâo mđing hmư̆ hŏng “mnuih kpă ênô”. Hlăk êlâo dih, klei hưn ti sang phat kđi mơ̆ng dua čô hưn kơ dlông jing sa hlăm dŭm knil čiăng kơ sang phat kđi phat mkra klei soh, kyua anăn tơdah lač kơ klei hưn jing lač kơ bruă ngă djŏ tuôm kơ boh tŭ phat kđi soh djŏ, phat kđi kpă ênô amâodah amâo kpă ênô. Klei blŭ phung hưn yuôm bhăn snăk, mnuih amâo thâo mđing hmư̆ ênưih mâo klei bi mklă pral đei, soh, kƀah klei ksiêm dlăng leh anăn atăt kơ klei hưn amâo djŏ ôh. Pô hưn brei jing mnuih thâo klă kơ klei mâo, hưn klei kpă ênô mơ̆ng klei knga hmư̆ leh anăn ală ƀuh leh. Tơdah mnuih hưn amâo thâo răng, dlăng kơ bruă mâo amâo klă mngač, amâodah mâo klei mĭn ngă jhat kơ mnuih snăn ênưih jing mnuih hưn luar. Hlăm klei mtô mơ̆ng mtao thâo mĭn tinei, mnuih hưn luar amâo mdê ôh hŏng mnuih mâo klei mĭn ƀai, kyua klei tŭ dưn wơr hĕ klei khăp, anăn “mgưt ngă jhŏng” hưn klei luar amâo sĭt čŏng blŭ hlăk êjai ka thâo klă ôh klei mâo. Boh blŭ anei lač kơ phung mâo ƀô̆ mta mgưt, ngă jhŏng, thâo kơ klei diñu hưn amâo djŏ sĭt ôh ƀiădah ăt blŭ mơh. Diñu knŏng mđing kơ diñu pô leh anăn klei tŭ dưn kơ diñu dlăng hơăi mang klei hdĭp kpă ênô, amâo mđing uêñ ôh klei tŭ kơ pô mkăn leh anăn mơ̆ng êpul êya. Klei hưn luar mơ̆ng diñu srăng ba klei jhat jing phung kpă ênô srăng tŭ klei phat kđi soh. Klă sĭt phung hdĭp snăn jing phung amâo gưt asăp Aê Diê, tơdah knŏng hdĭp hlăm knuih hdĭp soh anăn, klei hdĭp diñu srăng nao hlăm klei rai luč.
Bi phung thâo mđing hmư̆ jing phung mđing hmư̆ bi nik, răng, êngal čiăng dưi hưn klei blŭ djŏ klă, năng đăo knang. Boh tŭ klei hưn djŏ klă, sĭt nik srăng đru phung kpă ênô dưi dôk kjăp hlăm klei hdĭp leh anăn êđăp ênang hlăm ai tiê ăt msĕ mơh hlăm klei hdĭp. Klei hưn sĭt bi êdah klei doh jăk Khua Yang, đru phung kpă ênô dưi tlaih mơ̆ng klei phat kđi soh, leh anăn ăt đru kơ phung soh thâo kral klei soh, kmhal lŏ wĭt kơ Khua Yang. Khua Yang Yêsu mtô drei brei jih ai tiê thâo răng tơdah ƀuah kơ klei soh phung ayŏng amai adei pô, brei mâo pô hưn leh anăn brei bi blŭ tlă anăp, “Ƀiădah tơdah ñu amâo dôk hmư̆ ôh, jak ba sa dua čô mbĭt hŏng ih, čiăng kơ grăp boh blŭ dưi bi sĭt mơ̆ng dua amâodah tlâo čô pô hưn” (Y-Mathiơ 18:16).
Drei klă sĭt mơh djăp klei blŭ pô jing klei sĭt nik sơăi?
Wah lač: Ơ Khua Yang, kâo bi mni kơ Ih kyua Klei Aê Diê Blŭ mñă kơ kâo hlăm knuih hdĭp grăp hruê. Akâo kơ Khua Yang đru kâo huĭ mpŭ kơ Aê Diê, mâo klei blŭ kpă ênô, sĭt nik čiăng bi êdah klei kpă ênô leh anăn klei khăp Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
