Pajlug 21:28-29
Nqe cim:
Peb saib Phau Txhais Tshiab
“Tus cuav timkhawv yuav puastsuaj, tiamsis tej lus uas tus mloog lus hais yuav nyob mus” Pajlug 21:28 (Hmowsv).
Lus nug rau sawvdaws xav:
– Ua cuav timkhawv ua rau yus thiab lwm tus raug dab tsi?
– Tej lus ua timkhawv tseeb yuav zoo li cas?
– Tswv Yexus qhia kom peb yuav tsum ua li cas thaum ntuas lwm tus?
Nyob hauv ob nqe Pajlug 21:28-29 muaj cov ntsiab lus sib txuas ntawm tus neeg ua cuav timkhawv nrog “tus neeg phem”, tus neeg paub mloog lus nrog “tus neeg ncaj ncees”. Thaum ub, cov lus timkhawv ntawm rooj tu plaub muaj ob leej rov saud ces yog timkhawv meej rau tes haujlwm rau txim lawm, rau qhov thaum hais txog kev ua timkhawv yog qhov ntaus nqi rau kev txiav txim yog lossis txhaum, txiav txim ncaj lossis tsis ncaj. Yog li ntawd tej lus hais ntawm tus neeg ua timkhawv tseemceeb heev, yog tsis ua zoo mloog hais, maj rau txim ces yooj yim yuam kev, tsis ua zoo xav thiab ua timkhawv tsis yog ces yooj yim ua rau tshwm kev puastsuaj. Tus uas ua timkhawv yuav tsum yog tus neeg paub meej zaj xwmtxheej tau tshwm muaj, muab tau tej lus tseeb los hais raws li uas nws twb hnov thiab pom lawm. Yog tus neeg ua timkhawv tsis ua tib zoo mloog, paub zaj xwmtxheej tsis meej, lossis muaj lub siab ua phem ces yuav yoojyim heev rau nws ua cuav timkhawv. Tus vajntxwv uas txawj ntse tej lus qhia hais tias, tus neeg ua cuav timkhawv txawv tsis deb tus neeg uas muaj lub siab phem, vim kev ntshaw thiaj tso kev ua ncaj tseg, “ua txuj ua zoo li lawv yog tus zoo”, tej lus hais tsis tseeb, hais lus thaum tsis paub qhov teebmeem. Cov lus no xav hais txog tus neeg uas ntsejmuag tuab, lawv paub tej lus uas lawv hais tsis tseeb tiamsis lawv cia li hais tawm. Lawv tsuas mob siab lawv tus kheej thiab ua kom lawv tau zoo xwb, lawv saib qhov kev ua ncaj tsis muaj nqis, tsis xav kom lwm tus tau li lawv tau. Tej lus ua timkhawv tsis tseeb yuav ua rau tus neeg ncaj ncees raug txiav txim tsis ncaj ncees. Tus neeg uas ua neej zoo li no yog tus neeg tawmtsam Vajtswv tej kevcai. Yog pheej rau siab ntso ua qhov tsis yog, tsis ntev lawv lub neej yuav puastsuaj mus.
Dua li ntawd, tus neeg uas paub mloog hais yog tus neeg ua tib zoo mloog, ua zoo xav thiab hais tej lus tseeb, lus txaus ntseeg xwb. Nqi zog ntawm tej lus timkhawv tseeb yuav ua rau tus neeg ncaj ncees sawv tau ruaj khov rau kev ua neej thiab muaj kev kaj siab. Tej lus timkhawv tseeb qhia tawm tus Tswv txojkev dawbhuv, pab tau tus neeg ncaj ncees dim, thiab kuj pab tau tus neeg txhaum zeem paub nws qhov txhaum, kom lees txim tig rov los cuag Vajtswv. Tswv Yexus qhia kom peb yuav tsum ua tib zoo ceevfaj thaum mus ntuas cov ntseeg yuam kev ua txhaum, yuav tsum ua timkhawv tseeb thiab hais tim ntsej tim muag rau tus ua txhaum, “yog nws tsis mloog koj lus, koj cia li coj ib lossis ob tug nrog koj mus, thiaj raws li Vajtswv Txojlus uas tau qhia tseg” (Mathais 18:16).
Thov Vajtswv,
Vajtswv, nyuam yaus ua Koj tsaug vim Koj Txojlus qhia nyuam yaus paub ua neej txhua hnub. Thov Leej Txiv Koj pab kom nyuam yaus paub hwm Vajtswv, hais lus ncaj ncees, lus tseeb qhia tawm Vajtswv txojkev ncaj ncees thiab kev hlub ib yam li Tswv Yexus. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb puas ruaj siab hais tias tej lus uas peb hais yog lub tseeb xwb?
Nyeem Vajluskub hauv peb lub xyoo: II Kevcai 1
Kênh Youtube BHKTHN:
