Chivkeeb 4:16-24
Nqe cim:
“Ces Ka-ees thiaj khiav ntawm tus Tswv lub xubntiag thiab mus nyob rau ib lub tebchaws hu ua ncig mus ncig los uas yog nyob ntawm lub vaj Edees sab hnubtuaj” (Chivkeeb 4:16).
Lus nug xav:
– Tom qab uas raug tus Tswv rau txim, Ka-ees muaj lub neej zoo li cas?
– Muaj yam dabtsi tsimnyog paub txog Ka-ees cajces?
– Peb tau kev ceebtoom txog lub neej txav deb tus Tswv?
Tom qab uas raug lub txim hnyav ntsig txog tej kev txhaum, thiab kuj tau Vajtswv coglus tiv thaiv tsis pub raug tua, Ka-ees “khiav ntawm tus Tswv lub xubntiag” (nqe 16). Lo lus “khiav tawm” no tsis yog hais txog khiav mus qhov chaw deb, vim Vajtswv yog tus uas nyob tau txhua qhov, tiamsis yog hais txog lub neej txav deb tus Tswv, tsis nyob hauv txojkev sib raug zoo nrog tus Tswv lawm. Hauv ntsug kev mus, Ka-ees mus txog lub tebchaws hu ua ncig mus ncig los thiab nyob rau qhov chaw ntawd. Ntsia sab nraud, Ka-ees muaj lub neej kaj siab, ua tau txhua yam los ntawm nws txojkev khwv. Tiamsis qhov tseemceeb tshaj uas Ka-ees tsis muaj, qhov ntawd yog txojkev sib raug zoo nrog Vajtswv tus uas tsim txhua yam.
Ka-ees yug tub ki, ib tiam dhau mus rau ib tiam. Raws li lub sijhawm, Ka-ees cajces ua neej vammeej, dhau los ua cov neeg tsim tawm thiab qhia ntau seem kev ua haujlwm sib txawv xws li: Yanpas yog neeg yug tsiaj txhua thiab nyob tsevntaub (nqe 20), Yunpas yog yawgkoob ntawm cov neeg ntaus nkauj nogncas thiab tshuab raj (nqe 21), Tunpas Ka-ees ntaus cuabyeej (nqe 22). Txawm yog li ntawd los, neeg yim hnub yim tsis ua zoo zuj zus. Vajtswv Txojlus qhia paub Lamej yog thawj tug neeg uas yuav ntau tus pojniam, tsis raws li tus qauv Vajtswv tsim kev ua txijnkawm. Tsis yog li ntawd xwb, nws tseem yog tus uas tua neeg, thiab suav tias qhov uas nws ua li zoo thiab tseem txeeb lub hwjchim ua pauj (nqe 23-24)!
Thaum txav deb txojkev sib raug zoo nrog Vajtswv, tibneeg lub neej saib zoo li kaj siab, vammeej ntau seem. Tiamsis qhov ntawd tsuas yog vamkhom lub zog nqaij tawv, kev qhuas tus kheej, ua li siab nyiam, thiab txaus siab ua qhov yuam kev kom tiav lub homphiaj, txaus siab ua hiam lwm tus thaum pom lwm tus thaiv yus txojkev. Yog li ntawd, txawm yog lub neej yuav nce qib, vammeej, los txojkev ua neej thiab lub siab tsis zoo ces tsis muaj nqis. Tej tswvyim ntawm kev vammeej, kev txawj ntse hloov tsis tau neeg, vim qhov teebmeem yog nyob hauv lub siab. Qhov kev hloov tsuas muaj thaum tus neeg paub “xub nrhiav Vajtswv lub Tebchaws thiab Nws txojkev ncaj ncees” (Mathais 6:33). Thiab txojkev uas mus cuag Vajtswv yog mus ntawm Tswv Yexus mus, vim Nws hais tias: “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv” (Yauhas 14:6).
Thov Vajtswv,
Vajtswv, thov Koj pab nyuam yaus muaj txojkev sib raug zoo nrog Koj. Thov tsis txhob cia nyuam yaus vammeej ntawm lub qhov muag ntsia es poob ntawm Koj. Thov Koj muab yam uas nyuam yaus ua yog nrog tus Tswv Koj mus thiab Koj lub Tebchaws. Thov kom tus Tswv lub npe tau qhuas dhau los ntawm nyuam yaus lub neej. Nyuam yaus tuav Tswv Yexus lub npe thov, Amees.
Peb tabtom raws txojkev vammeej ntawm lub ntiajteb los yog ua neej nyob hauv tus Tswv qhov kev saib xyuas?
Nyeem Vajluskub hauv peb lub xyoos: Exekees 13
Kênh Youtube BHKTHN:
