Klei Aê Diê Blŭ: Rôm 8:17-25
Êlan kliăng: “Kâo yap klei knap mñai ênuk anei amâo năng ôh bi mđơr hŏng klei guh kơang srăng bi êdah kơ drei ênuk êdei.” (Rôm 8:18)
Klei êmuh ksiêm mĭn: Ya klei Khua ƀĭng kna Y-Pôl brei thâo kơ ênuk êdei phung anak ƀuôn sang Aê Diê? Si boh klei dôk jing kơ jih jang mnơ̆ng Aê Diê hrih leh? Ñu bi mđĭ ai digơ̆ ti anôk brei digơ̆ dưm klei čang hmăng? Čang hmăng kơ ênuk êdei guh kơang đru kơ diih ya mta klei hlăm klei hdĭp ară anei?
Khua ƀĭng kna Y-Pôl brei thâo phung đăo kơ Khua Yang srăng dưi dưn klei guh kơang mbĭt hŏng Krist hlăm ênuk êdei (êlan 17). Ƀiădah lĕ, êjai dôk hdĭp ti lăn ala drei ăt tŭ lu klei knap mñai, luč klei čang hmăng. Ƀiădah jih klei ruă knap anei amâo năng ôh bi mđơr hŏng klei guh kơang drei srăng mă tŭ ênuk êdei hlăk bi tuôm hŏng Khua Yang (êlan 18). Anăn jing klei čang hmăng sĭt, pioh kơ jih jang phung anak ƀuôn sang Aê Diê.
Ñu ăt brei thâo wăt jih jang mnơ̆ng hrih leh ăt dôk hlăm klei ur krao mđrăm mbĭt hlăm klei soh, tŭ leh klei jing hơăi mang (êlan 19-20). Jih lăn ala tŭ boh jhat klei soh mơ̆ng aê đưm Y-Ađam (Klei Mphŭn Dơ̆ng 3:17-18; I Kôrantô 15:27). Mnơ̆ng hrih mjing yơh dôk čang hmăng hruê phung anak ƀuôn sang Aê Diê dưn klei guh kơang čiăng kơ wăt diñu mơh dưi dưn mbĭt klei êngiê, tlaih mơ̆ng klei jing hlŭn kơ klei brŭ rai (êlan 21). Jih jang dôk čang hmăng kơ sa hruê Aê Diê srăng lŏ bi wĭt klei jing jăk siam msĕ si hlăk mphŭn dơ̆ng (Klei Mphŭn Dơ̆ng 1:25, 31).
Ară anei, phung đăo wăt tơdah mâo Yang Mngăt Jăk Aê Diê dôk mbĭt dưn mơh, ăt dôk ur krao hlăm ai tiê êjai dôk guôn klei Aê Diê brei jing phung anak Ñu, čiăng lač klei bi tui kơ asei mlei brŭ rai anei (êlan 23). Hlăk Khua Yang Yêsu lŏ hriê, jih jang phung anak ƀuôn sang Aê Diê mâo Yang Mngăt Jăk kđăm srăng dưi hơô asei mlei mrâo, amâo lŏ tŭ klei ruă knap hlăm asei mlei êjai bhiâo anei ôh. Anăn jing klei čang hmăng guh kơang kơ ênuk êdei kơ phung đăo. Klei čang hmăng kơ ênuk êdei guh kơang yơh srăng đru drei mă tŭ klei ktang dưi hgao klei lông dlăng hlăk tuôm hŏng klei dleh dlan leh anăn êdu ai.
Ti knhal tuč, Khua ƀĭng kna Y-Pôl mtă mtăn kơ phung ƀuôn sang Aê Diê brei gĭr dôk guôn sa ênuk êdei guh kơang (êlan 25). Wăt tơdah ară anei drei tŭ klei knap mñai ăt knŏng êjai bhiâo mơh, bi klei guh kơang Aê Diê pioh brei kơ drei dôk nanao hlŏng lar, amâo tuôm tuč ôh. Khua Yang Yêsu yua rup mniê đih pui čiăng hưn mdah klei čang hmăng kơ ênuk êdei guh kơang, “Êjai sa čô mniê ruă kkiêng ñu mâo klei ênguôt, kyuadah mông ñu kkiêng truh leh. Ƀiădah leh ñu kkiêng kơ anak, ñu amâo lŏ hdơr klei ñu ruă ôh,…” (Y-Yôhan 16:21).
Ktuê êlan tui hlue Khua Yang, lu blư̆ drei tlă anăp hŏng lu klei knap mñai ngă kơ drei êlưih êdu ai. Ƀiădah tơdah mĭn kơ klei knap mñai drei tŭ, knŏng jing điêt dhiêt snăk mkă hŏng klei guh kơang, klei jăk mơak srăng dưn, đru kơ drei lŏ bi kjăp ai tiê klei mĭn čiăng êbat nao hŏng Khua Yang. Čang hmăng bĕ kơ sa ênuk êdei guh kơang dôk guôn drei!
Si ngă drei hung nanao kơ ênuk êdei guh kơang Khua Yang pioh kơ drei mơ̆?
Wah lač: Ơ Khua Yang, pap brei kơ kâo lu blư̆ kâo êdu ai kyua tlă anăp hŏng klei dleh dlan. Akâo Ih đru kâo hung nanao kơ ênuk êdei guh kơang Khua Yang pioh brei leh kơ kâo, čiăng kơ kâo dưi hgao klei lông dlăng leh anăn amâo lui wir ôh hlăm êlan klei hdĭp mngăt. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
