Klei Aê Diê Blŭ: Y‑Yakơ 5:7-9
Êlan kliăng: “Snăn Ơ phung ayŏng adei, brei diih gĭr tơl Khua Yang lŏ hriê. Nĕ anei, pô ngă hma dôk guôn čiăng mâo boh yuôm mơ̆ng lăn, gĭr dôk guôn tơl mâo êa hjan lĕ rah leh anăn êa hjan knhal êdei” (Y‑Yakơ 5:7)
Klei êmuh ksiêm mĭn: Si Y‑Yakơ mtă brei phung đăo phung Yuđa bra đuĕ hdĭp? Rup pô ngă hma dôk guôn čiăng mâo boh yuôm mơ̆ng lăn čiăng lač kơ ya klei? Ya drei srăng ngă êjai dôk guôn hruê Khua Yang lŏ hriê?
Čih hră mơĭt kơ phung đăo phung Yuđa bra đuĕ mdê mdê dôk bi tlă anăp hŏng lu klei lông dlăng hlăm klei hdĭp, Y‑Yakơ mtă kơ digơ̆ brei digơ̆ “gĭr tơl Khua Yang lŏ hriê” (êlan 7). Êjai tuôm hŏng klei lông dlăng lu mta, wăt klei tŭ klei phung mdrŏng jhat ƀai amâo mâo đăo ôh ktư̆ juă (Y‑Yakơ 5:1-6), sĭt nik ênưih snăk digơ̆ srăng mâo klei êgah êmăn leh anăn êdu ai. Ară anei hĭn êjai čiăng kơ digơ̆ gĭr hdĭp nanao hŏng klei đăo, dôk guôn hruê Khua Yang lŏ hriê leh anăn ngă klei phat kđi knhal tuč, bi kmhal phung ƀai leh anăn bi mtlaih jih jang phung đăo kơ Ñu.
Y‑Yakơ mă klei bi hmô hŏng sa čô pô ngă hma dôk guôn êa hjan. Ti čar Israel, hjan lĕ rah lŏ pia jing hjan yan hjan, hlăm brô mlan pluh, mlan pluh sa tui si lơ yang hruê, êa hjan bi êdjin lăn čiăng dưi buh pla. Hjan knhal tuč lŏ pia jing hjan yan mnga, hlăm brô mlan dua, mlan tlâo lơ yang hruê, êa hjan srăng brei mnơ̆ng buh pla bi mnga leh anăn mboh, mnơ̆ng buh pla mboh lu amâodah ƀiă tui si êa hjan anei. Đưm dih, klei ngă hma pla mnơ̆ng tui si yan adiê kluôm dhuôm, anei jing klei dôk ti êngao klei dưi anak mnuih. Kyuanăn, mơ̆ng rup pô ngă hma dôk guôn êa hjan, Y‑Yakơ čiăng mtrŭt brei phung đăo hdĭp hŏng klei đăo dôk guôn hruê Khua Yang lŏ hriê, kyuadah anei jing klei drei amâo dưi čuăn ngă, amâo dưi thâo êlâo ôh, knŏng đăo yơh. Mâo sa klei brei drei mđing bi nik tinei, tơdah pô ngă hma dôk guôn êa hjan “čiăng mâo boh yuôm mơ̆ng lăn”, bi hmăng truh hruê mă tŭ boh mơ̆ng bruă digơ̆ ngă leh, digơ̆ dôk guôn hŏng klei gĭr leh anăn hŏng klei hơ̆k mơak. Msĕ snăn mơh, amâo djŏ ôh drei dôk guôn Khua Yang hriê hŏng klei êdu ai kơ klei hdĭp ară anei hin, bi hmăng kơ Khua Yang hriê bi mtlaih hĕ drei mơ̆ng klei anăn dŭm anăn yơh, ƀiădah brei drei dôk guôn hŏng klei čiăng bi tuôm sĭt hŏng Khua Yang leh anăn mă tŭ klei Ñu mưn.
Tơdah Khua Yang sĭt suôr hlăm klei brei “êa hjan lĕ rah leh anăn êa hjan knhal tuč” kơ pô ngă hma, snăn Ñu ăt sĭt suôr mơh brei klei mưn kơ phung mă bruă sĭt suôr kơ Ñu hruê Ñu lŏ hriê. Kyuanăn, “bi kjăp ai tiê diih, kyuadah hruê Khua Yang lŏ hriê giăm truh leh” (êlan 8). Hrô kơ klei bi blŭ dŭñ dŭñ hdơ̆ng drei (êlan 9), brei drei tui knuih pô ngă hma, mă bruă hŏng jih ai tiê êjai dôk guôn yan puôt wiă. Brei grăp čô drei bi kjăp ai tiê, yua mnĭt mmông anei dôk sĭt suôr hŏng Khua Yang, hriăm leh anăn hdĭp tui si Klei Ñu Blŭ čiăng đĭ hriê kơ prŏng hlăm klei đăo, hŏng jih ai tiê ngă lu bruă kơ Khua Yang. Leh anăn đăo sĭt nik tơdah bi tuôm hŏng Khua Yang, drei srăng hơ̆k mơak mă tŭ klei mưn pioh leh kơ phung dĭng buăl jăk leh anăn sĭt suôr, bi leh ênŭm leh jih jang bruă Khua drei jao, msĕ si klei Ñu ƀuăn leh.
Si drei dôk guôn Khua Yang lŏ hriê?
Wah lač: Ơ Khua Yang, đru kâo dôk guôn hruê Ih lŏ hriê hŏng klei hơ̆k mơak leh anăn hŏng klei čang guôn. Đru kâo dôk kjăp nanao, sĭt suôr tơl knhal tuč, leh anăn dưi bi tuôm hŏng Ih msĕ si sa čô dĭng buăl jăk leh anăn sĭt suôr hŏng jih jang bruă Ih jao leh kơ kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Philip 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
