Yakaunpaus 5:7-9
Nqe cim:
“Cov kwvtij, nej yuav tsum ua siab ntev tos hnub uas peb tus Tswv Yexus los. Nej sim saib tus neeg uas ua liaj ua teb saib, nws ua siab ntev li cas tos lub caij cog qoobloo. Nws ua siab ntev tos nag ntuj tshiab thiab nag ntuj tsaug.” (Yakaunpaus 5:7)
Lus nug rau sawvdaws xav:
– Timthawj Yakaunpaus qhia cov ntseeg Yudais uas tawg mus nyob txhua qhov kom lawv yuav tsum ua neej li cas?
– Daim duab txog tus neeg ua teb tos qoob loo qhia peb txog yam dabtsi?
– Peb yuav tsum ua li cas thaum tos ntsoov hnub tus Tswv rov los?
Thaum Timthawj Yakaunpaus sau tsab ntawv rau cov ntseeg Yudais uas tawg mus nyob txhua qhov thiab tabtom ntsib teebmeem loj hauv kev ntseeg, nws ntuas kom lawv “ua siab ntev tos hnub uas peb tus Tswv Yexus los” (nqe 7). Nyob rau lub tsamthawj ntsib puas tsav puas yam kev sim siab, tsis hais kev raug cov tswv npluanuj uas tsis ntseeg thiab ua phem quabyuam (Yakaunpaus 5:1-6), tej zaum cov ntseeg yuav yoojyim qaug zog, poob siab. Nyob lub sijhawm zoo li ntawd, lawv yuav tsum ua siab ntev ua neej nyob hauv txojkev ntseeg ntxiv mus, tos ntsoov hnub tus Tswv rov qab los thiab txiav txim zaum kawg, rau txim rau cov neeg phem thiab cawm cov uas ntseeg Nws.
Timthawj Yakaunpaus siv daim duab tus neeg ua teb tos nag los ua yamntxwv. Nyob rau tebchaws Yudais, lub caij pib los nag hu ua nag Ntuj Tsaug, nyob hauv hli kaum, kaum ib yeeblij, ua rau tej av ntxheev zoo rau kev cog qoob loo. Xaus caij ntuj nag hu ua nag Ntuj Tshiab, nyob hauv hli ob, hli peb yeeblij, pub muaj dej txaus rau tej qoobloo tawg paj txi txiv, yuav sau tau qoobloo ntau thiab tsawg ces nyob ntawm qhov muaj lossis tsis muaj nag. Thaum ub, kev ua liaj ua teb nyob txij ntawm huab cua, ntawd yog qhov uas tibneeg tswj tsis tau raws siabnyiam. Vim li ntawd, dhau ntawm daim duab tus neeg ua teb tos nag, Timthawj Yaukaunpaus xav qhia kom cov ntseeg yuav tsum ua lubneej tos ntsoov hnub tus Tswv rov los, vim ntawd yog qhov uas peb tswj tsis tau, paub ua ntej tsis tau, peb tsuas ntseeg tias yuav muaj los xwb. Muaj ib qhov yuav tsum cim nco ntawd yog tus neeg ua teb tos nag kom tau “tej qoob muaj nqes”, tos mus txog hnub tau txais tej uas nws poob zog ua tawm los, nws tos los ntawm kev kaj siab thiab cia siab. Ib yam nkaus li ntawd, peb tos hnub tus Tswv rov los tsis yog tos li ib tug neeg poob siab rau kev ua neej uas tos tus Tswv cawm nws dim, tiamsis tos los ntawm nplooj siab xav ntsib tus Tswv thiab tau txais Nws tej nqi zog.
Vajtswv ncaj ncees rau kev pub “nag ntuj tshiab thiab nag ntuj tsaug” rau tus neeg ua teb, ces Nws kuj yuav pub nqi zog rau tus ntseeg uas mob siab ua Nws haujlwm thaum txog hnub uas Nws rov qab los. Yog li ntawd, yuav tsum “tsis txhob txhawj, rau qhov twb yuav txog hnub uas tus Tswv los” (nqe 8). Peb tsis txhob sib yws (nqe 9), tiamsis yuav tsum kawm tus neeg ua teb tus qauv, rau siab ntso ua haujlwm tos mus txog thaum caij sau qoobloo. Peb txhua tus yuav tsum tuav ruaj kev ntseeg, siv ntu sijhawm no los nyob ze tus Tswv, kawm xyaum thiab ua neej raws li Vajtswv Txojlus qhia kom loj hlob hauv kev ntseeg, ua haujlwm kawg siab kawg ntsws pub rau tus Tswv. Ntseeg hais tias thaum peb ntsib tus Tswv, peb yuav tau kev kaj siab lug txais yuav tej nqi zog rau cov qhev uas zoo, ncaj ncees, ua tiav tes haujlwm tus Tswv muab cob li Nws tau coglus tseg lawm.
Thov Vajtswv,
Tus Tswv! Thov pab kom nyuam yaus tos hnub Koj rov qab los hauv kev ntseeg thiab kev cia siab. Thov pab nyuam yaus sawv ruaj, ncaj ncees mus txog tom kawg, thiab tau ntsib Koj li tus qhev zoo, ncaj ncees rau tes haujlwm uas Koj muab cob. Nyuam yaus tuav Yexus Khetos lub npe thov, Amees.
Peb tabtom npaj tos hnub tus Tswv rov los zoo licas?
Nyeem Vajluskub hauv peb lub xyoos: Filipis 4
Kênh Youtube BHKTHN:
