Yakơ 5:7-9
Kơkuh kơ đĭ đăng bơngai mă mơ̆ng.
Năr ‘nâu lu bơ̆n gô tơchĕng pơwao ‘bai pơhrăm kơ̆l ‘bai: Kơmĭl Bơngai Jang Mir Chang Gô kiơ̆ kơ sơ̆p hla bơar Yakơ 5: 7-9.
7 Ơ ‘nhŏng oh, iĕm băt kơ thoi noh boih, na mă đe pơm kơnê̆ kơ iĕm, iĕm thĕng đĕch hŏ, truh tơ năr Kră Yang jur dơ̆ng. Pơtih gia thoi lu bơngai jang mir ‘ba, lu sư băt tơpă gô đei ‘ba na lu sư adrin jang truh kơ bơyan ‘ba đum. 8 Na lu bơ̆n kư̆m lei-lăi athei lui mă kơjăp chang gô Kră Yang Yêsu wă jur, yua kơ Sư wă jê̆ jur tơpă boih. 9 Ơ ‘nhŏng oh, iĕm ‘nĕ kơ pơma mơmơnh dih băl, hli kơ Kră Yang sek tơlang tơdrong bơ̆n pơma mơmơnh noh Sư hil kơ bơ̆n, yua kơ ‘Bok Sek Tơlang ei wă jê̆ jur tơpă, dang lĕ kơ kiơ̆ ‘măng dur bơ̆n boih.
Trong tơm ‘bai pơhrăm ‘nâu:
“Ơ ‘nhŏng oh, iĕm băt kơ thoi noh boih, na mă đe pơm kơnê̆ kơ iĕm, iĕm thĕng đĕch hŏ, truh tơ năr Kră Yang jur dơ̆ng. Pơtih gia thoi lu bơngai jang mir ‘ba, lu sư băt tơpă gô đei ‘ba na lu sư adrin jang truh kơ bơyan ‘ba đum.” (Yakơ 5:7)
Nơ̆r jet tơchĕng pơwao:
– ‘Bok Yakơ bơtho lu bơngai Juđê mă lui bơih oei tơklah tơklang kăl kơ arih sa thoi yơ?
– Rup bơngai jang mir oei chang gô tơdrong đêl jang wă pơma kơ tơdrong, kiơ?
– Lu bơ̆n kăl kơ pơm thoi yơ kơplah chang gô Kră Yang jur dơ̆ng?
Kơkuh kơ đĭ đăng,
Chih kơthơ ăn kơ bơngai Juđe mă lui bơih oei arih tơklah tơklang oei tơ’bơ̆p lơ tơdrong anat lăm tơdrong arih, ‘Bok Yakơ bơtho tơ’bôh lu sư athei “iĕm thĕng đĕch hŏ, truh tơ năr Kră Yang jur dơ̆ng” (trong 7). Lăm tơdrong arih tơ’bơ̆p hăm tơdrong pơlong lăng lơ tơdrong, păng hăm lu bơngai mơdrŏng ưh kơ lui pơm kơnê̆ dêh (Yakơ 5: 1-6), phŏ đei lăm khul bơngai lui bơ̆l hăl, pơ̆k huŏng. hloh kơ noh dơ̆ng kăl kơ chu iŏk wă kơ arih đei đon lui, chang gô năr Kră Yang wă jur dơ̆ng wă sek tơlang năr tôch, phak lu bơngai pơm kơnê̆ păng dŏng pơklaih lu bơngai lui gơnang kơ Sư.
‘Bok Yakơ roi gah rup bơngai jang mir chang gô đak ‘mi. Tơ dêh Juđê, ‘mi jur blŭng a kư̆m krao bơyang đak ‘mi wă tôch, dang khei mơjĭt, khei mơjĭt mônh jô̆ kiơ kơ ‘năr, pơm kơ teh rơmuăn wă kơ rei, bơyan đak ‘mi wă tôch kư̆m krao bơyang phang, dang lăm khei ‘bar, khei pêng jô̆ kiơ̆ kơ ‘năr, gơh đei đak wă kơ tơnơm ‘long đei pơkao bluh đei plei, băt kơ gơh đei yua. Chăl sơ̆, jang mir druh kiơ̆ kơ bơyan, ‘noh tơdrong hloh kơ tơdrong kon bơngai hlôh băt, thoi noh, đơ̆ng rup bơngai jang mir chang gô đak ‘mi, ‘Bok Yakơ wă tơ’blŏk kơ bơngai lui athei arih đei đon lui chang gô năr Kră Yang jur dơ̆ng, yua kơ tơdrong ‘nâu lu bơ̆n ưh kơ gơh băt adrol, minh tơdrong lui gơnang đĕch, đei minh tơdrong athei kơchăng, noh bơngai jang mir chang gô đak ‘mi wă kơ gơh “tơmam gĭt”. hơpơi truh năr gơh đei đơ̆ng tơdrong jang kơdih, lu sư chang gô hăm chơt hiôk, chhôk hal, kư̆m thoi noh mơ̆n, lu bơ̆n chang gô Kră Yang jur ưh kơ sĭ hăm jơhngơ̆m bơ̆l hăl tơdrong arih dang ei, hơpơi kơ Kră Yang jur wă kơ dŏng keh đang, mă-lei chang hăm jơhngơ̆m chơt hiôk wă tơ’bơ̆p Kră Yang păng đei Kră Yang ăn hơpah.
Kră Yang pơm trŏ thoi nơ̆r Sư pơkă lăm tơdrong ăn “đak ‘mi blŭng a păng đak ‘mi wă tôch” kơ lu bơngai jang mir, Sư kư̆m pơm trŏ thoi nơ̆r pơkă wă hơpah ăn kơ lu bơngai tơnăp bơ̆jang kơ Kră Yang truh năr Sư jur, thoi noh. “ athei lui mă kơjăp chang gô Kră Yang Yêsu wă jur, yua kơ Sư wă jê̆ jur tơpă boih” (trong 8 BTTHĐ). Tơplih kơ tơdrong tơ tok chrih ată băl (trong 9), lu bơ̆n athei rok kơmĭl bơngai jang mir đĭ jơhngơ̆m bơ̆jang lăm jơ ‘năr chang gô bơyan phĕ kĕch yuă, rim ‘nu lu bơ̆n athei lui kơjăp, yua iŏk jơ ‘năr âu wă kơ jê̆ Kră Yang, hŏk pơhrăm păng arih pơm kiơ̆ nơ̆r Kră Yang wă kơ wơ̆ kơjăp đon lui, đĭ jơhngơ̆m bơ̆jang kơ Kră Yang tôch bơneh, hơmĕng ngeh kơplah tơ’bơ̆p Kră Yang, lu bơ̆n chơt hiôk iŏk tơmam hơpah ăn kơ bơngai jang tơnăp, jang keh kiơ̆ kơ đơ̆ng yŏng tơ’ngla pơjao, thoi nơ̆r Kră Yang pơkă.
Bĕ lu bơ̆n wang pôm jơhngơ̆m đon krao khan,
Kơkuh kơ Ih, ơ Kră Yang apinh Ih ăn kơ inh chang gô Kră Yang jur dơ̆ng hăm jơhngơ̆m chơt hiôk, chang gô, apĭnh Ih tơgŭm ling lang dơ̆ng kơjăp, tơnăp truh năr tôch, păng gơh tơ’bơ̆p Kră Yang thoi minh ‘nu bơngai đĭch đam jang ‘lơ̆ng, tơnăp lăm tơdrong jang ‘Bă pơjao, krao khan yua anăn Kră Yang Yêsu Krist. Amen.
Ơ đĭ đăng bơngai mơ̆ng mă ‘mêm kơeng,
Lu bơ̆n oei chang gô Kră Yang jur dơ̆ng thoi yơ?
Kơjăp, kĕ chơ̆n chang gô
Truh tơ năr đei yua kư̆m oei lei lăi
Minh jơhngơ̆m kiơ̆ Kră Yang đĕch
Jang ‘lơ̆ng tơnăp, noh bơih bơngai đĭch jang tơnăp
Đŏk sơ̆p hla bơar nơ̆r ‘Bok Kei-Dei lăm pêng sơnăm: Philip 4
Kênh Youtube BHKTHN:
