Klei Aê Diê Blŭ: I Têsalônik 5:16-18
Êlan kliăng: “Dôk hơ̆k mơak nanao bĕ. Wah lač amâo mdei ôh. Bi mni bĕ kơ Aê Diê hlăm jih jang klei truh; kyuadah klei anăn jing klei Aê Diê čiăng diih ngă hlăm Krist Yêsu.” (I Têsalônik 5:16-18)
Klei êmuh ksiêm mĭn: Ya tlâo mta klei mtă khua ƀĭng kna Y‑Pôl hưn mdah tinei? Ya ngă brei phung anak ƀuôn sang Aê Diê ngă tlâo klei mtă anei? Si ngă čiăng kơ drei ngă nanao klei Khua Yang mtă anei?
Khua ƀĭng kna Y‑Pôl hưn mdah kơ klei bi mni păt čiăng hlăm jih jang hră ñu čih. Tơdah hriăm kơ klei hdĭp khua ƀĭng kna anei, drei srăng ƀuh jing sa klei mmuñ bi mni ñu myơr kơ Khua Yang wăt tơdah êjai ñu dôk găn klei knap mñai dleh dlan dưn. Si ngă ñu dưi bi êdah klei thâo hdơr knga kơ Khua Yang msĕ snăn? Kyuadah ñu bi knal klă mngač klei yuôm bhăn Khua Yang ngă kơ ñu leh anăn ñu thâo kral anăn yơh jing klei Aê Diê čiăng.
Hlăm trăn anei, khua ƀĭng kna Y‑Pôl iêô mthưr phung đăo ti ƀuôn Têsalônik brei “hơ̆k mơak”, “wah lač” leh anăn “bi mni kơ Aê Diê” bĕ (êlan 16-18). Anei jing tlâo atur yuôm kơ klei hdĭp phung đăo. Tơdah mă tŭ klei bi mtlaih hŏng klei đăo Khua Yang Yêsu, brei phung đăo “dôk hơ̆k mơak nanao”. Klei hơ̆k mơak anăn amâo mjưh mdei ôh hŏng klei knang kơ Aê Diê. Tui tluôn jing klei brei “wah lač amâo mdei ôh”. Amâo djŏ ôh knŏng wah lač hbĭl mâo klei čiăng kơh ƀiădah dôk nanao hlăm klei bi mguôp hŏng Khua Yang ti anôk nao ti anôk dôk. Knhal tuč “bi mni kơ Aê Diê hlăm jih jang klei truh” čiăng lač bi mni kơ Khua Yang hlăm djăp mta klei găn, klei jăk wăt klei jhat. Hlăm klei truh, drei bi mni kơ Khua Yang kyuadah thâo kơ Ñu jing Pô sĭt suôr, dôk mbĭt hŏng drei leh anăn thiăm brei kơ drei klei ktang nanao. Amâo djŏ ôh brei hdơr knga bi mni kơ Khua Yang kơ klei truh, ƀiădah drei hdơr knga kơ Khua Yang kyuadah mâo Ñu dôk mbĭt leh anăn kơ klei bi hriăm mjuăt tŭ dưn mơ̆ng klei truh anăn (I Kôrantô 10:13; Y‑Yakơ 1:2-4).
Ti knhal tuč, khua ƀĭng kna Y‑Pôl brei thâo ya ngă čiăng brei drei ngă tlâo mta klei mtă anei. Anăn jing “kyuadah klei anăn jing klei Aê Diê čiăng diih ngă hlăm Krist Yêsu” (êlan 18b). Khua Yang čiăng kơ phung anak Ñu thâo kpĭ mjuăt drei pô ngă tlâo mta klei mtă anei. Ñu čiăng ƀuh klei hdĭp sa čô tui hlue Khua Yang brei bi êdah nanao klei hơ̆k mơak, dôk nanao hlăm klei bi mguôp hŏng Ñu hŏng klei wah lač leh anăn thâo bi mni kơ Khua Yang nanao hlăm jih jang klei truh. Yang Mngăt Jăk yơh jing Pô kiă kriê ai tiê phung anak ƀuôn sang Aê Diê, thiăm brei klei ktang leh anăn đru drei ngă ya klei Khua Yang mtô. Ƀiădah bruă êlâo hĭn brei grăp čô drei ngă jing, čuăn dôk hơ̆k mơak, wah lač leh anăn bi mni nanao. Jih klei anei khăng bi mklăk hŏng klei wĭt ngă tui si mnuih jing hlăk drei dôk ti krah klei dleh dlan. Ƀiădah, tơdah drei čuăn kpĭ mjuăt drei pô bi mưng tơl jing knhuah hdĭp grăp hruê, mơ̆ng anăn kơh hlăm jih jang klei truh drei dưi nanao dôk mơak, wah lač leh anăn bi mni kơ Khua Yang.
Si ngă drei čuăn ngă tui si klei Aê Diê čiăng leh anăn tlâo mta atur hlăm klei hriăm anei mơ̆?
Wah lač: Ơ Khua Yang, akâo Ih đru kâo ngă klei Ih čiăng, čiăng kơ hlăm ya mta klei truh ăt kâo bliư̆ klei hơ̆k mơak, klei wah lač leh anăn klei bi mni jing knhuah hdĭp kâo grăp hruê.
Dlăng Klei Aê Diê Blŭ hlăm tlâo thŭn: Y‑Êsai 59
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
