I Thexalaunikes 5:16-18
16 Nej yuav tsum niaj hnub zoo siab. 17 Nej yuav tsum thov Vajtswv tsis tseg tsis tu. 18 Txawm yog nej raug kev txomnyem thiab tau zoo los nej yuav tsum ua Vajtswv tsaug. Vajtswv xav kom nej txhua tus uas nrog Yexus Khetos koom ib txojsia lawm ua tej no.
Lus nug rau sawvdaws xav:
- Timthawj Paulus hais txog peb yam dabtsi yuav tsum ua hauv no?
- Vim li cas cov ntseeg yuav tsum ua raws li peb yam kev samfwm ntawd?
- Yuav ua cas thiaj ua tau raws li yam Vajtswv xav txhua hnub hauv lub neej?
Kev ua Vajtswv tsaug yog yam uas Timthawj Paulus hais ntau heev hauv nws tej tsab ntawv uas xa mus rau cov Pawg Ntseeg. Yog kawm txog Paulus lub neej, peb pom Paulus lub neej yog ib zaj lus ua Vajtswv tsaug, txawm yog thaum tau zoo lossis thaum txomnyem. Vim li cas Paulus thiaj muaj lub neej ua Vajtswv tsaug li ntawd? Vim Paulus tau pom thiab saj tej txujci uas Vajtswv tau ua rau nws thiab paub tej ntawd yog yam Vajtswv xav kom cov ntseeg yuav tsum muaj.
Hauv ntu Vajluskub no, Timthawj Paulus nqua hu cov ntseeg hauv nroog Thexalaunikes yuav tsum niaj hnub “zoo siab”, “thov Vajtswv” thiab “ua Vajtswv tsaug” (nqe 16-18). Tej no yog lub plag tseemceeb ntawm cov ntseeg Yexus lub neej. Thaum tau txais kev cawm dim vim ntseeg Yexus lawm, tus ntseeg ntawd yuav muaj kev “zoo siab tsis tseg”. Tau kev zoo siab tsis tseg vim muaj kev cia siab rau ntawm Vajtswv. Ntxiv mus yog “thov Vajtswv tsis tseg”. Tsis yog tsuas thov Vajtswv thaum muaj kev cheemtsum xwb, tiamsis muaj kev sib txuas lus nrog Vajtswv txhua lub sijhawm ntawm txhua thaj tsam. Thiab qhov xaus yog “txomnyem tau zoo los ua Vajtswv tsaug”, uas yog ua Vajtswv tsaug rau txhua lub sijhawm thiab txhua lub tsamthawj, tsis hais thaum tau zoo lossis ntsib kev txomnyem. Thaum ntsib kev txomnyem peb ua Vajtswv tsaug, vim paub Vajtswv yog tus ncaj ncees, Nws nrog peb nyob thiab pub dag zog rau peb. Tsis yog peb ua Vajtswv tsaug rau tej kev txomnyem tiamsis yog ua Vajtswv tsaug rau qhov Nws nrog peb nyob thiab Nws cob qhia peb hauv kev txomnyem (I Kauleethaus 10:13; Yakaunpaus 1:2-4).
Thaum kawg, Timthawj Paulus qhia paub hais tias vim li cas peb yuav tsum tau ua Vajtswv tsaug; yog: “Vajtswv xav kom nej txhua tus uas nrog Yexus Khetos koom ib txojsia lawm ua tej no” (nqe 18b). Vajtswv xav kom peb cov uas yog Vajtswv menyuam lawm yuav tsum tswj tus kheej kom ua raws nraim li peb yam uas tau hais los saud. Tus Tswv xav pom cov uas ntseeg Nws muaj lub neej niaj hnub zoo siab, muaj kev sib txuas nrog tus Tswv ntawm kev thov Vajtswv thiab niaj hnub ua Vajtswv tsaug hauv txhua lub tsamthawj. Vaj Ntsujplig tus uas nyob hauv Vajtswv haiv neeg lub siab yuav pub dag zog thiab pab peb ua tau tej uas tus Tswv qhia peb. Tiamsis qhov xub thawj yog peb yuav tsum txiav txim siab ua neej zoo siab, nquag thov Vajtswv thiab niaj hnub ua Vajtswv tsaug. Tej uas hais los saud yuav tsis mus zoo raws li tibneeg kev xav thaum ntsib txomnyem. Tiamsis yog peb txiav txim siab tswj lub neej mus rau kev zoo siab, thov Vajtswv thiab ua Vajtswv tsaug, tsis ntev xwb yuav ua rau peb cia li ua swm li ntawd hauv peb lub neej ntseeg txhua hnub, tsis hais thaum tau zoo lossis txomnyem.
Thov Vajtswv,
Tus Tswv, thov pab kom nyuam yaus paub ua raws li yam Koj xav, los ntawm ua neej zoo siab, thov Vajtswv tsis tseg thiab niaj hnub ua Vajtswv tsaug txhua lub tsamthawj mus tas sim neej. Amees.
Peb puas txiav txim siab ua peb yam uas Vajtswv xav kom peb ua raws li zaj kawm hnub no lawm tau?
Nyeem Vajluskub hauv peb lub xyoo: Yaxayas 59
Kênh Youtube BHKTHN:
