Klei Aê Diê Blŭ: Klei Mphŭn Dơ̆ng 4:1-3
Êlan kliăng: “Y‑Ađam dôk hŏng H’Êwơ mô̆ ñu; gơ̆ ba tian leh anăn kkiêng kơ Y‑Kain, leh anăn gơ̆ lač, ‘Kâo mâo leh sa čô êkei hŏng klei Khua Yang đru’ ” (Klei Mphŭn Dơ̆ng 4:1).
Klei êmuh ksiêm mĭn: Hlăm Klei Mphŭn Dơ̆ng kdrêč 4, ya klei hưn brei thâo kơ Y‑Kain jing mơ̆ng tlâo êlan tal êlâo? Tơdah klei yăl dliê kơ Y‑Kain mjưh tinei, ya klei drei bi mĭn kơ mnuih anei? Mơ̆ng klei anei, si drei bi mĭn kơ drei pô?
Drei khăng bi mguôp đơ phung hing ang jhat ƀai hŏng klei jing mơ̆ng gŏ sang găp djuê diñu, kyuadah klei mtŭk mtŭl, dleh knap, hriăm hră ƀiă leh anăn amâo mâo klei mtô lač jăk, amâodah hlăk hđeh amâo mâo myun găn klei arăng ngă jhat kơ asei mlei… Kyuanăn hrô kơ klei thâo kmhal hưn klei soh, lu mnuih khăng mplĕ êlư klei soh pô kơ klei truh amâodah dŏng mgang kơ klei jhat pô. Ƀiădah sĭt mơ̆ djŏ kluôm dhuôm msĕ snăn? Dlăng bĕ kơ Y‑Kain, mnuih ngă soh tal êlâo hĭn hlăm phung mnuih mơ̆ng si anôk jing arăng kkiêng kơ ñu.
Y‑Kain jing mnuih tal êlâo hĭn kkiêng ti lăn ala mơ̆ng “Y‑Ađam dôk hŏng H’Êwơ mô̆ ñu” (êlan 1a). Anei jing klei găn mrâo mrang kluôm dhuôm hŏng H’Êwơ kyuadah ñu ka tuôm ƀuh ôh sa čô mniê kkiêng anak êlâo kơnăn leh anăn kăn mâo pô đru ñu êjai kkiêng rei. Hŏng Y‑Ađam leh anăn H’Êwơ, Y‑Kain jing sa mta klei myang yuôm bhăn Aê Diê brei kơ diñu. Leh anăn klei hơ̆k mơak mơ̆ng Y‑Kain ba kơ amĭ ama ñu jing mdê snăk bi êdah hŏng klei H’Êwơ lač: “Kâo mâo leh sa čô êkei hŏng klei Khua Yang đru.” (êlan 1b). Y‑Kain jing klei hơ̆k mơak leh anăn klei čang hmăng kơ Y‑Ađam leh anăn H’Êwơ.
Amâo djŏ mâo hjăn păn Y‑Kain ôh ƀiădah ñu lŏ mâo adei anăn gơ̆ Y‑Aƀel. Pluh năm êlan tal êlâo mơ̆ng Klei Mphŭn Dơ̆ng kdrêč 4 mâo kjuh blư̆ leh hưn kơ Y‑Aƀel jing adei Y‑Kain, snăn, Klei Aê Diê Blŭ čiăng kñăm kơ klei bi mguôp bi khăp ti krah dua čô ayŏng adei. Tơl hriê kơ prŏng, amĭ ama diñu mtô lač ksă êmă čiăng kơ diñu dưi jing mnuih thâo mă bruă, “Y‑Aƀel jing mgăt biăp, ƀiădah Y‑Kain jing mnuih ngă hma” (êlan 2b). Kdlưn hĭn kơnăn, Y‑Kain ăt thâo ba mnơ̆ng myơr kơ Khua Yang boh mơ̆ng lăn (êlan 3), čiăng lač amĭ ama diñu mtô lač leh klei đăo kơ Aê Diê leh anăn klei kkuh mpŭ kơ Ñu.
Tơdah klei yăl dliê kơ Y‑Kain mjưh tăp mơ̆ng anei drei dưi lač ñu kbiă hriê mơ̆ng sa boh gŏ sang mâo tur jăk snăk leh anăn mâo sa klei hdĭp năng kơ lu mnuih hmăng hmưi. Phŭn anôk Y‑Kain kbiă hriê brei drei thâo kral dua mta klei. Tal sa, bi mni bĕ kơ Aê Diê kyua brei drei dưi mâo bô̆ mta ti lăn ala anei. Năng ai lu mnuih amâo mâo ôh sa boh gŏ sang klă kluôm msĕ si Y‑Kain mâo ƀiădah drei mâo sơăi klei pap dưi jing anak Aê Diê leh anăn dưi jing găp djuê Ñu. Tal dua, grăp čô brei tŭ bruă klam kơ klei hdĭp drei pô, amâo dưi mplĕ êlư klei soh drei kơ klei truh ôh. Klei truh dưi bi hmăi kơ klei hdĭp drei, ƀiădah si drei pô jing klei anăn jing yuôm hĭn.
Si ngă drei tuôm bi mni lač jăk kơ Khua Yang kyua jih klei Ñu ngă kơ drei leh anăn klei pap Ñu brei kơ drei mơ̆?
Wah lač: Ơ Khua Yang, bi mni lač jăk kơ Ih kyua brei kâo dưi mâo ƀô̆ mta ti lăn ala anei mbĭt hŏng lu klei jăk jĭn Ih brei. Akâo kơ Ih brei kâo thâo hdơr knga leh anăn hdĭp bi mơak kơ Khua Yang nanao.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Dlăng Klei Aê Diê Blŭ hlăm tlâo thŭn: Y‑Êsra 8:1-30
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
