Chivkeeb 4:1-3
Nqe cim:
“Adas nrog Evas uas yog nws pojniam pw, ces Evas txawm xeeb tub. Evas yug tau ib tug tub thiab nws hais tias, vim tus Tswv pab kuv, kuv thiaj tau ib tug tub” (Chivkeeb 4:1).
Lus nug rau sawvdaws xav:
- Nqe 1 hauv Chivkeeb tshooj 4 qhia paub dabtsi txog Ka-ees?
- Yog zaj hais txog Ka-ees muaj li no xwb, peb yuav xav licas txog nws tus kheej?
- Dhau zaj kawm no, peb rov xav txog peb tus kheej licas?
Ib tsoom cov mloog txhua tus,
Peb pheej muab tej kev txhaum uas peb ua liam rau lub tsamthawj, rau tsevneeg, rau kev nyuaj siab, rau kev txomnyem thiab vim tsis muaj leejtwg cob qhia, lossis lub neej tsis muaj hmoo thaum tseem yau, raug ntaus lossis raug yuam ua phem ua qias … Twb tsimnyog lees kev txhaum, tiamsis coob leej tseem pheej muab lub tsamthawj los hais daws qhov uas lawv ua tsis zoo ntawd. Puas yog tim lub tsamthawj ua rau peb ua txhaum nkaus xwb? Cia peb saib Ka-ees uas yog thawj tus tibneeg yug los rau hauv ntiajteb tomqab tibneeg ua txhaum saib zoo licas.
Ka-ees yog thawj tug tibneeg uas “Adas nrog Evas uas yog nws pojniam pw” mam xeeb muaj thiab yug los rau hauv lub ntiajteb no (nqe 1a). Qhov no yog yam tshiab uas Evas tsis tau ntsib dua, vim nws tsis tau pom ib tug pojniam twg yug menyuam ua ntej ntawd thiab kuj tsis muaj leejtwg pab nws daws cev thaum yug menyuam li. Adas thiab Evas pom Ka-ees yog ib yam txujci tseemceeb, ib qho uas xav tsis thoob, ib yam zoo uas Vajtswv pub rau nkawd. Thiab thaum yug tau Ka-ees ua rau nkawd ua niam ua txiv muaj kev zoo siab qhia tawm los ntawm Evas cov lus hais tias“vim tus Tswv pab kuv, kuv thiaj tau ib tug tub”(nqe 1b). Ka-ees yog txojkev zoo siab thiab sov siab rau Adas thiab Evas nkawd.
Ka-ees tsis yog ib leeg room xwb tiamsis nws tseem muaj ib tug kwv hu ua Anpees thiab. Kaum rau nqe hauv Chivkeeb tshooj 4 muaj 7 zaus hais txog Anpees yog Ka-ees tus kwv. Yog li ntawd, Vajluskub xav hais txog txojkev sib hlub sib raug zoo ntawm ob tug kwvtij. Thaum loj tiav neeg, nkawd tau niam thiab txiv qhia ua noj ua haus kom tsheej neeg, “Anpees yog ib tug tub yug yaj, tiamsis Ka-ees yog ib tug tub ua qoobloo” (nqe 2b). Dhau ntawd, Ka-ees tseem paub muab tej qoobloo fij rau Vajtswv thiab (nqe 3), qhov ntawd txhais tau hais tias, niam thiab txiv qhia kom Ka-ees paub ntseeg thiab pehawm Vajtswv.
Yog zaj xwm hais txog Ka-ees tsuas muaj li ntawd xwb ces, suav tau hais tias nws yog ib tug neeg yug los hauv tsevneeg zoo thiab yog lub neej uas tsimnyog sawvdaws ntshaw. Peb paub ob yam thaum xav txog Ka-ees lub neej. Tim ib, cia li ua tus Tswv tsaug rau qhov peb tshwmsim los hauv ntiajteb no. Tej zaum muaj coob leej tsis tau yug los hauv tsevneeg zoo ib yam li Ka-ees tiamsis peb puavleej tau Vajtswv pub kom peb tau los ua Vajtswv menyuam thiab nyob hauv Nws tsevneeg. Tim ob, txhua tus nyias yuav tsum muaj feem xyuam rau nyias lub neej, tsis yog thaum ua txhaum ces liam hais tias tim lub tsamthawj tsis zoo. Lub tsamthawj yeej cuam tshuam txog peb lub neej, tiamsis qhov tseemceeb yuav zoo thiab phem yog los ntawm yus tus yamntxwv xwb.
Thov Vajtswv,
Tus Tswv, nyuam yaus ua Koj tsaug vim Koj pub nyuam yaus muaj ntsejmuag nyob hauv lub ntiajteb no thiab pub tej yam zoo rau nyuam yaus. Thov Koj pab kom nyuam yaus paub ua Koj tsaug thiab ua neej haum koj siab nyiam. Amees.
Ib tsoom cov mloog uas hmov thiab tshua,
Peb puas tau ua tus Tswv tsaug vim qhov uas muaj peb thiab tau txais tej koob hmoov uas Nws pub rau peb?
Nyeem Vajluskub hauv peb lub xyoo: Exalas 8:1-30
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
