Pajlug 27:21
Nqe cim zaj kawm:
“Nyiaj thiab kub muab hluavtaws sim; kev qhuas sim neeg lub siab.” (Pajlug 27:21)
Lus nug xav:
– Vajntxwv Xalumoos xav qhia dabtsi thaum nws muab kev qhuas piv rau lub yeej vub thiab lub cub thee?
– Kev qhuas qhia peb saib pom tus kheej li cas?
– Tus Tswv cov menyuam yuav tsum sib qhuas thiab txais yuav kev qhuas li cas?
Nyiaj thiab kub yuav tsum muab tso rau hauv lub yeej vub, siv hluav taws hlawv sim kom tshem tau tej yam tsis muaj nqis tawm, ces qhov tsim txiaj tiag ntawm nyiaj thiab kub mam li tshwm los. Vajntxwv Xalumoos siv daim duab no los piv hais tias kev qhuas kuj sim neeg lub siab ib yam nkaus. Peb tus cwjpwm thaum tau txais lus qhuas qhia tawm yam uas raug zais nyob hauv peb lub siab. Nqe Pajlug no ceebtoom peb hais tias txhua lo lus qhuas yog ib yam cuabyeej uas siv los tshuaj xyuas peb lub siab, nthuav tawm peb lub neej sab ntsujplig tiag tiag, thiab pab kom peb paub peb tus kheej zoo dua qub.
Qhov xubthawj, kev qhuas sim peb tus cwjpwm tseeb. Tej lus qhuas chwv txog qhov tob hauv neeg lub siab, yog li ntawd peb tus cwjpwm thaum tau txais lus qhuas qhia tias peb muab peb tus kheej kev muaj nqis tso rau qhov twg. Yog peb zoo siab heev vim luag qhuas peb xwb, ces zoo ib yam li kub uas tseem tsis tau sim, tseem muaj ntau yam qias. Thaum peb khav vim tau neeg qhuas, ces peb tabtom cia neeg txojkev lees paub txiav txim peb kev muaj nqis. Tiamsis yog peb lub neej nyob hauv Tswv Yexus Khetos lawm, ces kev qhuas yuav tsis ua rau peb muab hlob, tiamsis yuav ua rau peb txo hwjchim dua qub, zeem paub tias txhua yam zoo yog los ntawm Vajtswv txoj koob hmoov hlub (I Kauleethaus 4:3-5), thiab txhua yam muaj nqis hauv peb lub neej yog Vajtswv pub, tsis yog los ntawm tibneeg.
Qhov ob, kev qhuas sim peb lub homphiaj. Peb ua Vajtswv tes haujlwm kom neeg qhuas, lossis ua kom tus Tswv txaus siab? Kev qhuas zoo ib yam li ib zaj ntsuas kev kawm qhia tshwm tej haujlwm zoo uas peb ua yog ua kom neeg pom xwb, lossis yog tawm hauv lub siab uas Tswv Yexus twb hloov dua tshiab lawm tuaj. Cov ntseeg yuav tsum nrhiav Tswv Yexus lo lus qhuas hais tias: “Zoo heev, koj yog tus tubtxib uas zoo thiab ncaj ncees! Tej yam me me uas koj saib, koj ua ncaj, kuv yuav tsa koj ua tus saib yam uas loj. Koj cia li los nrog kuv nyob kaj siab lug!” (Mathais 25:21). Thaum peb muaj lub homphiaj raug lawm, peb yuav zoo siab fij txhua txoj kev qhuas rov rau Vajtswv.
Qhov peb, kev qhuas sim peb kev loj hlob sab ntsujplig. Ib yam li kub raug sim hauv hluavtaws kom huv, tus ntseeg uas loj hlob sab ntsujplig yuav txo hwjchim dua thiab vamkhom tus Tswv ntau dua qub. Lawv yuav tsis yooj yim raug lus qhuas lossis lus thuam hloov lawv lub siab, tiamsis yuav sawv ruaj khov vim lawv saib Vajtswv txojkev ntaus nqi tseemceeb dua neeg tej lus qhuas.
Cov ntseeg yuav tsum sib qhuas thiab sib txhim kho (I Thexalaunikes 5:11), tsis yog qhuas yuav luag siab lossis qhuas kom tau lwm tus txiaj ntsig. Qhov uas peb qhuas lwm tus thiab txais lwm tus kev qhuas yuav qhia tawm peb tus yamntxwv tseeb. Cia peb kawm qhuas thiab txais kev qhuas los ntawm lub siab txo hwjchim, ua Vajtswv tsaug, thiab muab txhua lub meejmom fij rov rau Vajtswv, tus uas yog lub hauvpaus ntawm txhua yam zoo.
Thov Vajtswv,
Tus Tswv, thov Koj siv lwm tus tej lus qhuas los sim thiab ntxuav nyuam yaus lub siab. Thov tiv thaiv nyuam yaus dim kev khavtheeb. Thov pub nyuam yaus muaj lub siab txo hwjchim ib yam li Tswv Yexus Khetos, kom txhua yam uas nyuam yaus ua haum Koj siab. Nyuam yaus tuav Tswv Yexus Khetos lub npe thov, Amees.
Yuav ua li cas peb thiaj ua tau siab ncaj ua qhov yog mus ntxiv thaum tsis muaj leejtwg pom lossis qhuas peb?
Nyeem Vajluskub hauv peb lub xyoos: Malakis 1
Kênh Youtube BHKTHN:
