Maithais 24:12-13
Nqe cim:
“Thaum tej kev phem huam loj heev, sawvdaws yuav tsis txawj sib hlub lawm” (Mathais 24:12)
Lus nug xav:
– Lub cim twg hauv lub sijhawm kawg tau Tswv Yexus piav nyob hauv ntu Vajluskub no?
– Cov ntseeg cheem tsum dabtsi hauv lub tsamthawj uas tibneeg tsis nyiam ua zoo lawd?
– Tej cim no tabtom tshwm rau tiam peb nyob no li cas?
Lub cim txuas ntxiv hauv lub sijhawm kawg tau Tswv Yexus piav qhia yog “Thaum tej kev phem huam loj heev, sawvdaws yuav tsis txawj sib hlub lawm” (nqe 12). Kev txhaum yim hnub yim huam loj thiab tibneeg yim hnub yim saib tsis taus Vajtswv Txoj Kevcai lawd. Kev huam loj ntawm txoj kev txhaum thiab qhov tibneeg tabmeeg txhawb nqa kev txhaum, tebchaws pom zoo thiab ua siab ntev, ua rau cov uas xav ua neej raws li Vajtswv Txoj Kevcai raug dag ntxias tso yus txoj kev txiav txim siab tseg, mus ua neej raws yus siab nyiam. Tswv Yexus qhia pom lub tsamthawj tiam kawg, yog yuav sawv tawm ntau txoj kev txhaum, tsis mus raws li Vajtswv txoj kev ua zoo uas Nws xav tau lawd. Tibneeg tsis yog sib ntxub thiab zais kev txhaum xwb tiamsis hais tabmeeg, txhawb nqa kev txhaum, saib qhov ntawd yog yam uas yuav tsum caum raws tiam no. Lawv txiav txim rau Vajtswv Txoj kev ua zoo vim tsis haum rau tiam tshiab thiab tav tibneeg kev vammeej!
Ntawm lub tsamthawj tibneeg tsis nyiam ua zoo hauv lub sijhawm kawg ntawd, Tswv Yexus txhawb cov uas tabtom ntseeg tseeb rau ntawm Nws yuav tsum “ua siab ntev mus txog hnub kawg” (nqe 13). Tsis vim yog muaj lub “siab tawv” tau cawmdim tiamsis yog ua siab ntev rau hauv kev ntseeg, nyiaj tej lus thuam, kev tsim txom, kiag tej kev mob cev nqaij daim tawv vim yog ua raws li Tswv Yexus tej lus qhia, thiaj tau ua tim khawv qhia hais tias lawv txoj kev ntseeg tseeb. Nqi zog rau tus uas “ua siab ntev” mus txog hnub kawg yog tau txoj kev cawmdim zoo txaus nkaus, ntawd yog qhov nqi zog uas tsimnyog kawg nkaus li.
Tej cim uas Tswv Yexus hais tabtom tshwm rau tiam uas peb nyob no, thaum tibneeg pom zoo cia muaj tej kev xav yuam kev hais txog kev sib deev, kev hlub, kev sib yuav thiab tsev neeg; tej kev ua zoo ntawm lub neej yog txhawb nqa tibneeg thiab muab yus saib hlob, lub siab tsis muaj kev hlub, tsis quav ntsej lwm tus, tsuas yog xav rau yus tus kheej nkaus xwb; tej kev ua kom npluanuj tsis ncaj ncees; thiab saib nyiaj txiag, khoom ntiajteb yog lub hom phiaj kev ua neej… lub tsamthawj neeg tsis nyiam ua zoo huam loj ntxiv thiab coob leej saib qhov ntawd yog qhov kev ua neej vameej rau niaj hnub nim no! Cov ntseeg ua neej nyob rau lub ntiajteb zoo li ntawd, cia li ruaj siab ceev ruaj kev ntseeg rau ntawm Tswv Yexus, nyob tos Nws rov qab los thiab nco ntsoov tej lus uas Nws qhia tseg lawm: “Tiamsis tus uas ua siab ntev mus txog hnub kawg, tus ntawd yuav dim” (nqe 13). Tswv Yexus ceebtoom txog tej cim hnub kawg tsis yog cia kom peb hnyav siab tiamsis yog cia kom peb yuav tsum ua neej nquag nyeem Vajluskub, ua neej li Nws Txojlus qhia, ua neej muaj kev hlub, ua haujlwm thiab nyob koom nrog pab pawg hauv cov ntseeg thiab sib txhawb zog kom ua siab ntev ceev kev ntseeg mus txog hnub ntsib tus Tswv.
Thov Vajtswv,
Vajtswv, nyuam yaus ua Koj tsaug uas Koj qhia rau nyuam yaus paub txog tej cim hnub kawg. Txawm yog lub ntiajteb ib ncig ntawm nyuam yaus muaj puv npo kev phem los xij, thov pab nyuam yaus pheej ncajncees thiab ua siab ntev mus txog hnub kawg. Nyuam yaus tuav Tswv Yexus Khetos lub npe thov, Amees.
Puas muaj txoj kev txhaum twg tabtom ua rau peb yim hnub yim khiav deb tus Tswv?
Nyeem Vajluskub hauv peb lub xyoos: Kalatias 6
Kênh Youtube BHKTHN:
