Klei Aê Diê Blŭ: Y-Mathiơ 23:23-24
Êlan kliăng: “Knap mñai yơh kơ diih, Ơ phung khua čih hră leh anăn phung Pharisi, phung ai ngăm! Kyuadah diih myơr sa kdrêč hlăm pluh ênoh êč, êya, djam, ƀiădah diih amâo uêñ ôh kơ klei yuôm hĭn hlăm klei bhiăn, jing klei kpă, klei pap, leh anăn klei đăo. Jih klei anăn brei diih gưt, leh anăn đăm lui ôh klei êlâo anăn” (Y-Mathiơ 23:23)
Klei êmuh ksiêm mĭn: Phung khua čih hră leh anăn phung Pharisi dlăng yuôm kơ ya klei leh anăn ya klei yuôm diñu lui hĕ? Ya ngă Khua Yang lač kơ diñu jing phung ai ngăm? Si srăng ngă čiăng kơ drei amâo hdĭp hŏng klei ai ngăm ôh?
Khua Yang Yêsu phat kđi klei ai ngăm phung khua čih hră leh anăn phung Pharisi, diñu mbliư̆ kŏ tluôn klei yuôm brei ngă êlâo hĭn, diñu mčhưr klei amâo mâo năng ôh, leh anăn bi hrŏ amâodah lui hĕ ya klei jing yuôm hĭn. Êč, êya, djam jing mnơ̆ng amâo mâo ênoh yuôm ôh, ƀiădah lĕ diñu bi liê lu mmông čiăng yap grăp aruăt djam leh anăn grăp asăr êtak êbai pioh myơr sa kdrêč hlăm pluh, leh anăn diñu bi mni snăk kơ diñu pô hlăm klei ngă djŏ tui si klei bhiăn Aê Diê mơ̆ng mta điêt dhiêt hĭn.
Khua Yang Yêsu ƀuah phung anei “amâo uêñ ôh kơ klei yuôm hĭn hlăm klei bhiăn” (êlan 23), diñu amâo hdĭp hŏng klei kpă ênô, hŏng klei pap leh anăn hŏng klei đăo ôh. Diñu wơr bĭt hĕ klei Aê Diê čiăng kơ diñu ngă hlăm hră Y-Mika 6:8 “Ñu bi êdah leh kơ ih, Ơ mnuih, ya jing jăk, leh anăn ya klei Yêhôwa mtă brei ih ngă. Jing klei ngă klei kpă leh anăn khăp klei pap, leh anăn êbat mbĭt hŏng Aê Diê ih hŏng klei luă gŭ.” Anăn yơh jing klei tui si djŏ phung khua čih hră leh anăn phung Pharisi srăng yap jing yuôm čiăng hdĭp djŏ tui si klei Aê Diê čiăng, ƀiădah diñu hdĭp leh hŏng klei wê, amâo mâo klei khăp, amâo mâo pap brei, amâo ngă jăk ôh, diñu thâo čưn leh anăn bi mjhua pô mkăn. Jhat kjham hĭn jing diñu amâo êbat hŏng klei đăo ôh, diñu đăo kơ bruă diñu ngă hĭn kơ klei pap Aê Diê. Khua Yang pia kơ phung khua čih hră leh anăn phung Pharisi jing “phung bum ală atăt êlan” kyuadah diñu khăp kơ klei bi mđĭ êgao hnơ̆ng jih jang klei điêt dhiêt, “kar mă hĕ tŭk mrui” ƀiădah diñu amâo ƀuh ôh kơ diñu dôk “lun aseh samô” kyua jih jang klei soh prŏng diñu ngă leh.
Hlăm Phung Sang Aê Diê hruê anei, mâo lu blư̆ drei dlăng yuôm đei kơ klei “điêt dhiêt” ti êngao, kơ klei bhiăn, kơ klei mtrŭn…ƀiădah lui hĕ klei khăp leh anăn klei tŭ dưn kơ mnuih. Drei ênưih đei hŏng klei jing klei hdĭp myang drei pô, amâo uêñ ôh ya ngă klei hdĭp drei ka bi êdah ôh boh mơ̆ng Yang Mngăt Jăk, ya ngă drei ka dưi ôh hŏng klei soh, ya ngă ênưih snăk drei lui klei bi kƀĭn tơdah mâo klei čưng boh, mâo klei huă mnăm hlăm anôk mă bruă amâodah mâo klei jak mơ̆ng phung mah jiăng…lu klei mkăn đa đa…Brei drei thâo kral klei jing klei hdĭp myang drei pô čiăng kơ drei knang kơ Khua Yang leh anăn kmhal hĕ kơ klei soh drei. Tơdah drei ăt ngă klei khăng kŏ amâo čiăng thâo kral ôh, drei srăng ngă klei bi hmăi kjham amâo djŏ knŏng kơ drei pô ôh ƀiădah wăt kơ jih jang phung drei atăt digơ̆ êbat hlăm klei đăo msĕ mơh.
Si ngă drei dôk lui hĕ klei yuôm hĭn hlăm klei hdĭp myang drei mơ̆?
Wah lač: Ơ Khua Yang Yêsu, đru kâo amâo hdĭp hŏng klei ai ngăm ôh ƀiădah thâo uêñ kơ klei yuôm Ih bi hriăm kâo grăp hruê, hdĭp hŏng klei kpă ênô čiăng kơ klei hdĭp kâo dưi bi mơak kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Ôsê 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
