Mathiơ 23:23-24
“Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai ‘bơ̆r đak klak ŭnh. Iĕm pơm hăt-hot tĕch lu tơmam hơi thoi lĕ kơ hla lŭnghŭng, hla gơsơ̆m, hla ĕch, hla hlakat, iŏk jên noh pơm pơyơ̆r kơ ‘Bok Kei-Dei minh lăm mơjĭt. Mă-lei dôm tơdrong juăt ‘Bok Kei-Dei mă kăl hloh thoi lĕ kơ pơm ‘lơ̆ng kơ đe, athei ‘mêm kơ ‘Bok Kei-Dei hăm bôl buăl, tơdrong lui kơ ‘Bok Kei-Dei, dôm tơdrong noh iĕm pơhơi ưh kơ wă pơm. Mă tơdrong iĕm pơyơ̆r tơmam hơi noh kư̆m trŏ mơ̆n, mă-lei ưh kơ dang bơ̆n kiơ̆ tơdrong juăt noh hei.” (Mathiơ 23:23)
Nơ̆r jet tơchĕng pơwao:
– Lu thây bơtho đe Juđê păng lu bơngai Pharisi lăng gĭt tơdrong kiơ păng tŭk lê̆ tơdrong kăl hloh ayơ?
– Yua kơ kiơ Kră Yang khan kơ lu sư ‘bơ̆r đak klak ŭnh?
– Pơm thoi yơ wă kơ bơ̆n huay kơ arih ‘bơ̆r đak klak ŭnh?
Kră Yang Yêsu jô̆ tơdrong ‘bơ̆r đak klak ŭnh lu thây bơtho đe Juđê păng lu bơngai kiơ̆ tơdrong Pharisi lăm tơdrong pơm kiơ̆ tơdrong lui. Lu sư pơhơi tơdrong mă kăl hloh, na hăt hot tơdrong hơi đĕch, na jing tŭk lê̆ dôm tơdrong mă kăl hloh, hla lŭng hŭng, hla gơsơ̆m, hla ĕch, hla kat jơ̆ lu tơmam hơi đĕch, mălei lu sư tĕch iŏk jên noh pơm pơyơ̆r minh lăm mơjĭt, păng lu sư lăp đon dêh yua kơ pơm kiơ̆ tơdrong juăt Kră Yang đơ̆ng dôm tơdrong iĕ dêh noh.
Kră Yang Yêsu khan kơ lu bơngai ‘nâu: “Mălei dôm tơdrong juăt ‘Bok Kei-Dei mă kăl hloh thoi lĕ pơm ‘lơ̆ng kơ đe, athei ‘mêm kơ ‘Bok Kei-Dei hăm bôl buăl, tơdrong lui kơ ‘Bok Kei-Dei, dôm tơdrong ‘noh iĕm pơhơi ưh kơ wă pơm…” (trong 23). Lu sư ưh kơ pơm ‘lơ̆ng tơpăt, ưh kơ băt mơnat păng ưh kơ pơm trŏ kơ nơ̆r pơkă, lu sư hiơt bơih tơdrong Kră Yang wă kơ lu sư pơm lăm Mika 6:8, “Ơ kon bơngai, tơdrong mă Kră Yang wă kơ ih pơm ‘lơ̆ng tơpăt, wă kơ đei tơdrong ‘mêm mơnat păng yak năm hăm jơhngơ̆m iơ̆m dim, pơyom kơ ‘Bok Kei-Dei ưh?” ‘Noh bơih dôm tơdrong thây bơtho đê Juđê păng bơngai Pharisi trŏ sư athei lăng gĭt wă kơ arih pơm kiơ̆ dôm tơdrong mă Kră Yang wă lăp đon, mălei lu sư pơm ưh kơ tơpăt, ưh kơ đei tơdrong ‘mêm mơnat, ưh kơ mơnat ăn kơ đe, ưh kơ ‘lơ̆ng tơpăt, lu sư ham păng yua iŏk jơhngơ̆m ‘lơ̆ng đe nai. Mă lŭch hloh dơ̆ng, lu sư ưh kơ yak năm hăm đon lui, lu sư gơnang kơ tơdrong pơm ‘lơ̆ng kơdih hloh kơ gơnang kơ tơdrong ‘mêm mơnat ‘Bok Kei-Dei ăn đĕch. Kră Yang Yêsu jô̆ lu thây bơtho đe Juđê păng bơngai Pharisi jơ̆ “bơngai măt tol chông trong” kơplah lu sư tơchĕng hloh hnang dôm tơdrong hơi đĕch “chơ kơih tŭk ‘bruih iĕ lăm kơchŏk đak” mălei lu sư ưh kơ ‘bôh kơdih oei “nhă luăn jrok hloi aseh Lăk đa.” Yua kơ dôm tơdrong yoch tih mă lu sư đei pơm.
Lăm khul bơngai dang ei, lơ ‘măng bơ̆n pơm anat dêh gah dôm tơdrong “iĕ đĕch” lăm tơdrong pơm gah ‘nguaih kơ̆m giĕng, tơdrong hơgăt… mălei tŭk lê̆ tơdrong ‘mêm mơnat păng tơdrong đei yua kơ kon bơngai. Bơ̆n ‘bônh hăm tơdrong lui bơ̆n kơdih, ưh kơ tơchĕng hiơ̆k yua kơ kiơ tơdrong arih tam mă tơ’bôh Plei Yang Bơhngol ‘Lơ̆ng, yua kơ kiơ oei tam mă kĕ jei hăm tơdrong yoch. Yua kơ kiơ ‘bônh kơ lê̆ tơdrong akŭm mưh đei tơdrong lăng đe đă ‘bŏng lŏng, đei tơdrong sŏng sa tih tơ anih jang, dah đei bôl buăl krao wơ̆n.v.v… bơ̆n athei băt tơdrong lui bơ̆n kơdih wă kơ băt gơnang kơ Kră Yang păng tơbral tơdrong yoch hăm Kră Yang. Dah oei pơrơ̆ng ưh kơ wă chu iŏk băt kơdih yoch, lei ưh kơ sĭ bơ̆n gô pơrăm kơdih bơ̆n đĕch ôh mălei kư̆m ‘bơm lu bơngai mă bơ̆n chông anhăk yak năm lăm đon lui.
Ơ Kră Yang Yêsu, apinh Ih tơgŭm inh ưh kơ arih ‘bơ̆r đak klak ŭnh mălei ‘blŏk tơchĕng dôm kăl mă Kră Yang tơ’blŏk ăn kơ inh rim năr, bơwei tơdrong arih ‘lơ̆ng wă kơ chăl arih inh ling lang pơm kơ Kră Yang lăp đon. Yua anăn Kră Yang Yêsu Krist, Amen.
Lu bơ̆n hăm oei tŭk lê̆ dôm tơdrong kăl lăm chăl arih gah bơhngol bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hôsia 5
Kênh Youtube BHKTHN:
