Mathais 23:23-24
Nqe cim:
“Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej muab tej txujlom, tsis hais pumhub, zaub txhwb thiab xyab txhob, ib feem kaum rau Vajtswv, tiamsis nej tsis ua raws li tej lus tseemceeb uas Vajtswv txoj Kevcai qhia kom neeg ua ncaj ncees, muaj kev hlub thiab ua lub siab ncaj. Tsimnyog nej ua raws li tej lus qhia no, thiab tsis txhob tso lwm nqe tseg” (Mathais 23:23)
Lus nug xav:
– Cov xibhwb uas qhia Vajtswv Txojlus thiab cov neeg Falixais muab yam twg saib tseemceeb thiab muab yam twg tso tseg?
– Vim li cas tus Tswv muab lawv hu ua ntsejmuag ncaj siab nkhaus?
– Yuav ua li cas kom peb thiaj tsis ua neeg ntsejmuag ncaj siab nkhaus?
Tswv Yexus cem cov xibhwb uas qhia Vajtswv Txojlus thiab cov Falixais txog qhov uas lawv ua ntsejmuag ncaj siab nkhaus hauv kev ua neej ntseeg. Lawv muab tej uas hais txog kev ntseeg ntxeev, hais tshaj tej yam uas tsis muaj, thiab txo nqis lossis tso tej yam tseemceeb tseg. Txujlom, pum hub, thiab zaub txhwb yog tej zaub tsis muaj nqi siab, tiamsis lawv tseem poob sijhawm ntau los suav tej ntawd ib yam zuj zus muab ib feem kaum, thiab lawv khav tias lawv ua raws li Vajtswv txoj kevcai qhov me mus txog qhov loj huvsi.
Tswv Yexus cem cov neeg ntawd tias “nej tsis ua raws li tej lus tseemceeb uas Vajtswv txoj Kevcai qhia” (nqe 23), lawv tsis ua neej ncaj ncees, tsis muaj kev hlub thiab tsis ua li lawv hais, lawv hnov qab yam uas Vajtswv kom lawv ua hauv Mikhas 6:8, “Yeej tsis tau hlo li, tus Tswv twb qhia yam zoo rau peb lawm. Tej uas nws xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwjchim nrog peb tus Vajtswv sib raug zoo.” Qhov ntawd yog tej yam uas cov xibhwb qhia Vajtswv txoj kevcai thiab cov Falixais yuav tau saib tseemceeb kom paub ua lub neej raws li tej uas tus Tswv xav tau, tiamsis lawv ua tsis ncaj, tsis muaj kev hlub, tsis muaj kev zam txim, tsis ua zoo, ntshaw thiab yuam lwm tus. Phem tshaj qhov ntawd, lawv tsis ua neej raws kev ntseeg, lawv cia siab rau tej haujlwm lawv ua heev dua li uas Vajtswv txoj koob hmoov hlub. Tswv Yexus muab cov xibhwb uas qhia Vajtswv txoj kevcai thiab cov Falixais hu ua “cov neeg dig muag uas coj lwm tus kev” vim lawv pheej saib tej yam me muaj nqis, xws li “tus yoov poob rau hauv cov dej uas nej yuav haus” tiamsis lawv tsis pom tias lawv tabtom “nqos ib tug ntxhuav lawm” vim tej kev txhaum uas lawv ua.
Hauv cov Pawg Ntseeg tiam no, muaj ntau zaus peb raug txomnyem vim tej teebmeem “me” raws kev coj noj coj ua… tiamsis tsis muaj kev hlub thiab tsis ua kom muaj nqis rau lwm tus. Peb tso yoojyim rau sab ntsujplig, tsis hmov tshua tias vim li cas kev ua neej tsis qhia tawm Vaj Ntsujplig cov cim, vim li cas kov tsis yeej txojkev txhaum, vim li cas yoojyim muab kev pehawm tso tseg thaum muaj ib pab ncaws npas, muaj noj haus, lossis tej phoojywg caw… Peb cheemtsum paub meej yus lub neej sab ntsujplig kom yus paub vamkhom tus Tswv thiab lees txim rau Nws. Yog pheej ua tus tsis zeem paub, peb yuav ua hiam tsis yog yus tus kheej xwb tseem yuav ua hiam cov uas yus tabtom coj lawv taug txojkev ntseeg thiab.
Thov Vajtswv,
Tus Tswv Yexus, thov Koj pab kom nyuam yaus tsis ua neeg ntsejmuag ncaj siab nkhaus tiamsis paub hmov tshua txog tej yam tseemceeb uas Koj niaj hnub qhia, ua lub neej zoo kom Koj tau ntsejmuag. Nyuam yaus tuav Tswv Yexus lub npe thov, Amees.
Peb puas tabtom tso tej yam tseemceeb hauv yus lub neej sab ntsujplig tseg lawm?
Nyeem Vajluskub hauv peb lub xyoo: Hauxeyas 5
Kênh Youtube BHKTHN:
