Klei Aê Diê Blŭ: Galati 4:8-20
Êlan kliăng: “Kâo čiăng dôk mbĭt hŏng diih ară anei leh anăn bi mlih asăp kâo blŭ kơ diih, kyuadah kâo rŭng răng kyua diih” (Galati 4:20)
Klei êmuh ksiêm mĭn: Ya klei phung đăo ti Galati dôk ngă? Hŏng ya êlan leh anăn si knuih Khua ƀĭng kna Y-Pôl lač kơ digơ̆ kơ klei anăn? Hŏng ya klei dleh dlan ñu bi tlă anăp tơdah lač kơ digơ̆? Ya klei hriăm drei mâo mơ̆ng klei mĭn Khua ƀĭng kna Y-Pôl?
Mdê hŏng jih jang hră mkăn Khua ƀĭng kna Y-Pôl čih leh, ti tluôn klei kkuh čhưn mâo klei lač jăk leh anăn klei bi mni, hlăm hră mơĭt kơ phung Galati, ñu hlŏng ƀuah mtam kơ digơ̆, leh anăn mâo lu blư̆ ñu yua klei blŭ ktang snăk si tô hmô “Ơ phung Galati mluk mgu!”, amâodah “si ngă diih jing mluk mgu msĕ snăn lĕ?” (Galati 3:1, 3)…Kyuanăn, mâo lu mnuih mĭn kơ Khua ƀĭng kna Y-Pôl jing sa čô mnuih khao leh anăn khăng, amâo mâo klei khăp ôh. Ƀiădah trăn KleiAê Diê Blŭ hruê anei brei ƀuh klei ñu blŭ hŏng đŏk blŭ mdê snăk. Ñu bŏ hŏng klei khăp, sĭt suôr leh anăn khăp snăk kơ phung Galati. Mdưm ñu pô hlăm bruă čuăn kơ sa čô amĭ, “tŭ klei knap msĕ si klei ruă kkiêng” (êlan 19), ñu uêñ sĭt kơ phung đăo jing phung tue anei tơdah ƀuh digơ̆ tui ngă klei “hdơr mpŭ kơ hruê, mlan, yan leh anăn thŭn” msĕ si phung Yuđa (êlan 10). Ñu ăt rŭng răng mơh tơdah ƀuh digơ̆ hur har jum ñu, digơ̆ amâo thâo ôh phung tui hlue klei đăo phung Yuđa hur har hŏng digơ̆ “amâo djŏ kyua klei jăk ôh” (êlan 17-18). Ñu lŏ hdơr kơ klei digơ̆ tuôm jum leh ñu msĕ si jum “sa čô dĭng buăl jăk Aê Diê”, “msĕ si Krist Yêsu pô” (êlan 14), leh anăn hŏng klei ênguôt ñu êmuh ti lei klei jăk mơak digơ̆ mâo leh (êlan 15)! Boh nik nak, ñu iêo kơ digơ̆ jing phung anak điêt (êlan 19-20), leh anăn amâo lŏ huĭ ôh hưn kơ digơ̆ thâo klei ñu rŭng răng kyua digơ̆, leh anăn wăt klei ñu blŭ ktang đŏk hŏng digơ̆ jing klei ñu amâo tuôm čiăng ôh (êlan 20).
Êngao kơnăn, wăt tơdah Khua ƀĭng kna Y-Pôl rŭng răng leh anăn thâo săng hŏng klei ñu ƀuah ktang anăn digơ̆ amâo lŏ khăp kơ ñu ôh, ƀiădah srăng yap ñu jing msĕ si roh, ăt kăn ñu huĭ rei lač hŏng klei sĭt kơ klei digơ̆ jing (êlan 8-11, 15-17 leh anăn dŭm trăn êlâo tinăn). Ñu ruah blŭ klei sĭt ti anăp kơ klei soh digơ̆ čiăng mâo klei bi mđĭ hrô kơ klei dôk ñăt kriêp leh anăn blŭ jhat êkŭt tluôn digơ̆.
Mâo lu blư̆ drei blŭ klei sĭt kơ klei soh phung ayŏng adei drei kyuanăn diñu weh đuĕ kơ drei leh anăn amâo lŏ yap drei jing mah jiăng ôh, klei anăn ngă kơ drei mâo klei huĭ blŭ klei sĭt kơ pô mkăn. Tăp năng mâo blư̆ drei jhŏng đru kčĕ ti anăp hŏng klei kpă ƀiădah lĕ klei drei blŭ kƀah klei khăp kyuanăn klei drei đru kčĕ amâo mâo boh tŭ dưn ôh. Si ngă drei ƀuh mâo mơ̆ phung ayŏng adei čiăng snăk kơ drei hưn brei hŏng klei sĭt kơ klei soh digơ̆ ngă leh? Brei tui knuih Khua ƀĭng kna Y-Pôl, hŏng klei khăp hưn bĕ kơ phung năng ƀuah klei drei rŭng răng leh anăn amâo thâo ôh si srăng ngă čiăng bi djŏ hŏng klei digơ̆ jing čiăng mâo klei dưi bi mđĭ hdơ̆ng drei.
Drei jhŏng blŭ klei sĭt mơ̆ kơ klei soh phung ayŏng adei drei ngă leh?
Wah lač: Ơ Khua Yang, đru kâo jhŏng tŭ klei ƀuah djŏ leh anăn hŏng klei sĭt. Leh anăn msĕ mơh, đru kâo mâo klei jhŏng mtô lač kơ phung ayŏng adei kâo tơdah digơ̆ ngă soh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 15-16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
