Klei Aê Diê Blŭ: Y‑Yakơ 3:1
Êlan kliăng: “Ơ phung ayŏng adei, đăm brei lu hlăm phung diih jing nai mtô ôh, kyuadah diih thâo leh Aê Diê srăng phat kđi ktang hĭn phung nai mtô” (Y‑Yakơ 3:1)
Klei êmuh ksiêm mĭn: Si bruă klam phung nai hlăm Sang Aê Diê? Ya ngă Y‑Yakơ mtă “đăm brei lu hlăm phung diih jing nai mtô ôh”? Si klei mñă kơ drei kơ klei mơak leh anăn klei jhat truh mơ̆ng bruă klam anei?
Phung nai mâo bruă klam yuôm bhăn hlăm Sang Aê Diê. Hŏng bruă klam mtô klei hriăm, mtô klei mñă mơ̆ng Klei Aê Diê Blŭ, phung nai jing phung mtô tur klei đăo leh anăn klei thâo săng hlăm mngăt kơ phung ƀuôn sang Aê Diê. Lač kơ bruă klam hlăm Sang Aê Diê, Khua ƀĭng kna Y‑Pôl čih bruă klam “nai” êdei kơ “khua ƀĭng kna” leh anăn “khua pô hưn êlâo” (I Kôrantô 12:28; Êphêsô 4:11).
Kyua klei hmăi yuôm bhăn msĕ mrâo lač anăn amâo mâo klei bi kngăr ôh tơdah lu mnuih ƀuh khăp leh anăn čiăng “čŏng jing nai”. Čiăng hưn brei răng kơ phung čiăng jing nai hŏng klei mĭn jhat, Y‑Yakơ hưn brei răng: “đăm brei lu hlăm phung diih jing nai mtô ôh”. Ñu ăt lač klă kơ mta phŭn: “kyuadah diih thâo leh Aê Diê srăng phat kđi ktang hĭn phung nai mtô”. Bruă hlăm Khua Yang amâo djŏ knŏng jing klei mơak ôh ƀiădah lŏ jing bruă klam. Bruă knư̆ prŏng snăn bruă klam knư̆ prŏng mơh. Khua Yang Yêsu Pô mtô leh, “Ƀiădah hlei pô amâo thâo ôh leh anăn ngă klei năng arăng čăm, srăng tŭ klei čăm êdu. Arăng srăng akâo lu mơ̆ng grăp čô arăng brei leh lu; leh anăn arăng srăng akâo lu hĭn mơ̆ng pô arăng jao leh lu hĭn”(Y‑Luk 12:48).
Wăt tơdah amâo djŏ jih jang drei mâo sơăi bruă klam mtô bi hriăm klă sĭt hlăm Sang Aê Diê ôh, ƀiădah grăp čô “jing nai” sơăi hlăm dŭm bruă mdê mdê, hŏng anak čô hlăm gŏ sang, adŭ mtô Klei Aê Diê Blŭ Knăm Kjuh, dŭm êpul, leh anăn phung hlăm wang hmăi mơ̆ng klei hdĭp mngăt pô. Kyua anăn, grăp čô brei hdơr knga kơ Aê Diê kơ bruă klam jing nai čiăng đru klei đăo pô mkăn hriê kơ prŏng. Anăn jing sa klei ktưn hưn, klei pap, ƀiădah ăt jing sa bruă klam prŏng prĭn brei grăp čô hlue ngă bi jăk.
Thâo klei blŭ pô amâo djŏ knŏng jing mtô klei thâo ôh ƀiădah lŏ mjing tur klei đăo, brei drei răng hŏng ya klei pô blŭ, “Êlah êdu êun jing sa ƀĕ ana kyâo klei hdĭp, ƀiădah êlah wê bi mčah ai tiê” (Klei Bi Hriêng 15:4). Grăp hruê snăn drei srăng blŭ ya klei mâo hlăm ai tiê pô (Y‑Luk 6:45), kyua anăn grăp hruê brei drei bi bŏ ai tiê hŏng klei pap, klei khăp leh anăn klei sĭt nik mơ̆ng Klei Aê Diê Blŭ čiăng ƀăng kƀông dưi blŭ klei ba klei hdĭp. Drei amâo djŏ knŏng thâo răng hlăm klei mtô ôh ƀiădah wăt knuih hdĭp, kyua anăn jing klei bi mklă hdĭp kơ pô mkăn ƀuh, dlăng klei drei mtô năng đăo mơ̆ amâodah hơăi.
Drei ƀuăn srăng răng hĭn, kjăp hĭn hŏng bruă jing nai, leh anăn hŏng klei găl mtô bi hriăm Aê Diê brei leh kơ pô mơ̆?
Wah lač: Ơ Khua Yang, kâo bi mni kơ Ih kyua Ih brei leh kơ kâo klei găl mtô bi hriăm, kriê dlăng phung dôk hlăm klei pô hmăi. Akâo kơ Yang Mngăt Jăk jing Nai prŏng hĭn mtô kâo grăp hruê, răng mgang klei mĭn leh anăn ai tiê kâo, čiăng kơ ya klei kâo blŭ srăng ba klei mđĭ ai kơ phung mkăn, leh anăn čiăng kơ klei hdĭp kâo jing klei hưn bi sĭt hdĭp kơ klei kâo mtô leh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 42-43
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
