Yakaunpaus 3:1
Nqe cim:
“Cov kwvtij, tsis tsimnyog nej coob leej yuav ntshaw ua xibhwb, rau qhov peb paub hais tias Vajtswv yuav ua tib zoo taug peb cov uas yog xibhwb nruj dua li taug lwm tus.” (Yakaunpaus 3:1)
Lus nug rau sawvdaws xav:
– Xibhwb muaj feem xyuam zoo li cas nyob hauv Pawg Ntseeg?
– Vim li cas Yakaunpaus ntuas “tsis tsimnyog coob leej ntshaw ua xibhwb?”
– Peb kawm tau li cas txog qhov zoo thiab qhov txaus ntshai ntawm lub luag haujlwm no?
Xibhwb muaj feem xyuam tseemceeb nyob hauv Pawg Ntseeg. Lub luag haujlwm yog qhia kev ntseeg, coj kawm Vajtswv Txojlus, xibhwb yog tus npaj nroos coj kom Vajtswv cov menyuam muaj kev ntseeg thiab paub lub neej sab ntsujplig. Hais txog tes haujlwm hauv Pawg Ntseeg, Timthawj Paulus hais tias feem xyuam “xibhwb” nyob tom qab “timthawj” thiab “cov cev Vajtswv lus” (I Kauleethaus 12:28; Efexus 4:11).
Vim qhov haujlwm tseemceeb li hais saud, yog li thiaj li muaj cov neeg uas nyiam thiab xav “tsa lawv ua xibhwb”. Cia kom ceebtoom rau cov uas xav los ua xibhwb ntawm lub siab tsis zoo, Yakaunpaus hais tias: “tsis tsimnyog nej coob leej yuav ntshaw ua xibhwb”. Yakaunpaus hais qhov vimchij yog vim: “Vajtswv yuav ua tib zoo taug peb cov uas yog xibhwb nruj dua”. Tus uas ua Vajtswv haujlwm tsis yog vim koob npe xwb tiamsis yog feem xyuam yuav tau ua. Qib haujlwm yim tseemceeb ces feem xyuam yim loj. Tswv Yexus qhia hais tias, “Tus uas tau ntau, tus ntawd yuav tsum pauj ntau. Tus uas tau ntau dua, tus ntawd yuav tsum pauj ntau dua” (Lukas 12:48).
Txawm tsis yog tagnrho peb txhua tus ua tes haujlwm qhia nyob hauv Pawg Ntseeg, los peb puavleej “ua xibhwb” nyob rau ib qhov chaw twg, ib cov neeg twg xws li hauv tsevneeg, hauv cov chav kawm Hnubkaj, txhua pab, thiab ua kom lwm tus loj hlob sab ntsujplig. Yog li, peb txhua tus yuav tsum paub ua tus Tswv tsaug txog lub luag haujlwm uas ua xibhwb txhim tsa kev ntseeg rau lwm tus. Qhov no yog yam zoo, koob hmoov, tiamsis kuj yog feem xyuam loj uas txhua tus yuav tsum tau siv zog ua kom zoo thiaj tiav.
Zeem paub tej lus uas yus hais tsis yog lam hais tiamsis yog hais txojkev txawj ntse ua chaw txawb rau txojkev ntseeg, peb yuav tsum ua tib zoo saib thaum hais, “Tus nplaig uas hais lus zoo yog tsob tshuaj uas cawm txojsia, tiamsis tus nplaig uas hais lus phem ua rau luag ntsawv siab.” (Pajlug 15:4). Raws li ibtxwm ces peb pheej nyiam hais tawm tej yus lub siab xav (Lukas 6:45), yog li txhua hnub peb yuav tsum puv npo lub siab koob hmoov, kev hlub thiab qhov tseeb ntawm Vajtswv Txojlus kom peb lub qhov ncauj qhia tau cov lus ciaj sia. Peb tsis yog ua tib zoo saib tej lus qhia xwb tiamsis kev ua neej nrog huvsi, vim qhov ntawd yog timkhawv ciaj sia zees rau lwm tus pom ntsoov, tej lus uas peb qhia ntawd puas txaus ntseeg lossis tsis txaus ntseeg.
Thov Vajtswv,
Tus Tswv, nyuam yaus ua Koj tsaug vim Koj pub nyuam yaus muaj feem xyuam qhia, tsob hwb cov neeg uas nrog nyuam yaus nyob. Thov Vaj Ntsujplig yog tus Xibhwb txawj ntse qhia nyuam yaus txhua hnub, tsomkwm nyuam yaus txojkev xav thiab lub siab, kom tej uas nyuam yaus lub ncauj qhia tawm pab tau lwm tus, thiab cia kom nyuam yaus lub neej ua timkhawv qhia tias tej uas nyuam yaus qhia muaj tseeb. Tuav Tswv Yexus lub npe thov, Amees.
Peb puas muaj kev coglus yuav ua tib zoo ua feem xyuam xibhwb, thiab saib lub sijhawm tus Tswv pub qhia tseemceeb rau yus?
Nyeem Vajluskub hauv peb lub xyoo: Phau Ntawv Nkauj 42-43
Kênh Youtube BHKTHN:
