Klei Aê Diê Blŭ: Y-Markôs 10:35-45
Êlan kliăng: “Ƀiădah amâo djŏ snăn ôh ti krah diih, hlei pô čiăng jing prŏng hlăm phung diih, brei ñu jing dĭng buăl diih. Leh anăn hlei pô čiăng jing mrô sa hlăm phung diih, brei ñu jing hlŭn kơ jih jang.” (Y-Markôs 10:43-44)
Klei êmuh ksiêm mĭn: Ya mta klei dua čô ƀĭng kna nao akâo kơ Khua Yang? Si klei phung pluh čô adôk lŏ wĭt ngă? Si klei Khua Yang mtô kơ ai tiê klei mĭn mă bruă hlăm Ƀuôn Ala Mtao Adiê? Si drei mă yua klei hriăm anei kơ drei?
Tui hlue Khua Yang ktuê jih tlâo thŭn, ară anei lŏ sa blư̆ dơ̆ng hmư̆ Khua Yang hưn êlâo kơ klei Ñu srăng tŭ klei knap mñai, tŭ klei djiê leh anăn kbiă lŏ hdĭp, ƀiădah phung ƀĭng kna ăt kăn thâo săng rei kơ jih hdră Aê Diê mkra hŏng bruă Khua Yang Yêsu mă. Khua Yang hưn êlâo kơ kyâo bi kal, ƀiădah hlăm klei mĭn phung ƀĭng kna knŏng diñu bi mĭn kơ jhưng mtao ti lăn ala. Kyuanăn yơh, mâo dua čô khua ƀĭng kna jing Y-Yakơ leh anăn Y-Yôhan hmăr hĭn “lač kơ Ñu, Brei hmei dôk gŭ sa čô tĭng hnuă Ih leh anăn sa čô tĭng điâo Ih hlăm ƀuôn ala mtao guh kơang Ih.” “(êlan 37). Boh sĭt gơ̆, amâo djŏ knŏng dua čô khua ƀĭng kna ôh, ƀiădah jih 12 čô mâo klei mĭn msĕ snăn sơăi. Kyuanăn tơdah ƀuh dua čô pral hmăr mmiă dua anôk dlông hĭn hlăm “sang mtao Yêsu” snăn yơh 10 čô adôk ăl ngêñ (êlan 41)!
Yua mmông găl anăn, Khua Yang mtô phung khua ƀĭng kna kơ klei mă bruă djŏ hlăm Ƀuôn Ala Mtao Adiê. Khua Yang lač hŏng diñu snei, đăm tui ngă msĕ si phung tue ôh, phung khua kiă kriê diñu jing phung ktư̆ juă “yua klei ktư̆ juă kiă kriê ƀuôn sang”, ƀơ̆ng huă ti dlông dôk gŭ ti anăp “phung khua prŏng khăp yua klei kơhưm hĭn”. Ƀiădah hlăm Khua Yang, hlei pô čiăng jing prŏng brei “ñu jing dĭng buăl”; hlei čiăng jing mrô sa brei “ñu jing hlŭn kơ jih jang” (êlan 42-44). Khua kiă kriê hlăm Ƀuôn Ala Mtao Adiê bi mklăk kluôm dhuôm hŏng klei jing ti lăn ala. Khua kiă kriê amâo yua kơhưm ñu kăp gai gĭt, mgô̆ arăng ôh ƀiădah bi ti gŭ ñu pô mă bruă hlăm klei jing sa čô “dĭng buăl”; amâo čoh cuăn kơ arăng brei bi mđĭ mpŭ kơ ñu ôh ƀiădah kkui rao jơ̆ng kơ jih jang mnuih hlăm klei jing sa čô “hlŭn”. Khua Yang amâo knŏng blŭ mang ôh ƀiădah Ñu ngă klei bi hmô: “Kyuadah msĕ mơh Anak Mnuih hriê leh amâo djŏ čiăng kơ arăng mă bruă kơ Ñu ôh, ƀiădah Ñu čiăng mă bruă kơ arăng, leh anăn jao klei hdĭp Ñu jing ênoh bi tui kơ lu mnuih” (êlan 45).
Klei hriăm “jing hlŭn kơ jih jang mnuih” Khua Yang mtô êlâo kơ Ñu tŭ klei knap mñai, jing sa klei hriăm yuôm bhăn êdimima kơ jih jang phung anak ƀuôn sang Aê Diê, amâo djŏ knŏng pioh kơ phung khua gĭt gai Phung Sang Aê Diê ôh, ƀiădah pioh kơ jih jang phung djă bruă kiă kriê grăp êpul, kơ êpul điêt, kơ gŏ sang msĕ mơh. Đăm mâo ôh pô tui hriăm tui si klei jing khua msĕ si lăn ala, tui duah kơhưm klei dưi amâodah klei hing ang kơ ñu pô, ƀiădah brei myơr klei hdĭp ngă bruă jao kơ pô, mă bruă hŏng jih ai tiê kơ jih jang mnuih. Čiăng dưi ngă msĕ snăn, brei grăp čô đăm mă klei mĭn ngă khua msĕ si ti lăn ala ba mŭt hlăm Phung Sang Aê Diê ôh, ƀiădah brei lui hĕ klei yap drei pô jing prŏng hĭn, “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô.” (Philip 2:3). Akâo Klei Aê Diê Blŭ mñă drei dôk hdĭp mă bruă djŏ, hlăm yan bi hdơr klei Khua Yang tŭ Klei Knap Mñai leh anăn Kbiă Lŏ Hdĭp hlăm thŭn anei.
Si ngă drei tŭ ư ngă “hlŭn kơ jih jang mnuih” mơ̆?
Wah lač: Ơ Khua Yang, akâo Ih pap brei kơ kâo, kyuadah kâo adôk mâo klei mĭn čiăng ngă khua tui si klei mĭn mnuih lăn ala. Brei kâo gưt ngă hlue klei Khua Yang bi hmô, luă gŭ, bi ti gŭ kâo pô mă bruă hŏng klei mĭn jing sa čô dĭng buăl, jing hlŭn kơ jih jang mnuih Khua Yang dưm hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
