Markôs 10:35-45
“Mă-lei iĕm ‘nĕ kơ rok lu ‘bok pơgơ̆r noh hŏ. Bơngai bu ‘maih pơm ‘bok tih lăm lu iĕm, bơngai ‘noh athei pơm thoi lĕ đĭch đam iĕm. Dah bơngai bu lăm lu iĕm ‘maih pơm yŏng pơgơ̆r lu iĕm, bơngai ‘noh athei pơm thoi lĕ đĭch đam đĭ đăng kơ lu iĕm.” (Markôs 10:43-44)
Nơ̆r jet tơchĕng pơwao:
– Đei ‘bar ‘nu jơ̆ng’bang năm apinh Kră Yang Yêsu tơdrong kiơ?
– Pă mơjĭt ‘nu jơ̆ng’bang noh jơhngơ̆m lu sư tơwih kơ bre ei liơ?
– Kră Yang Yêsu bơtho thoi yơ gah jơhngơ̆m awih-wăn lăm Dêh Char ‘Bok Kei-Dei pơgơ̆r?
– Đơ̆ng‘bai hŏk ‘nâu, bơ̆n yua iŏk kơ bơ̆n liơ?
Lu jơ̆ng ‘bang kiơ̆ Kră Yang lăm pêng sơnăm chơtăng, ’nâu minh wơ̆t dơ̆ng kơtơ̆ng Kră Yang roi khan Sư gô chu pŭ iŏk gleh pơmat, chu lôch păng iung arih,mă-lei lu jơ̆ng ‘bang Sư oei ưh kơ hlôh tôm ôh tơdă ’Bok Kei-Dei đei dan hơmet mă Sư yua Kră Yang Yêsu jang tơdrong tơdă Sư ‘noh tơ lăm teh đak âu. Kră Yang Yêsu tơbăt lê̆ hơdrol gah ‘long pơglang, mă-lei lăm kơ̆l’ngok lu jơ̆ng’bang pôm brơbreh tơchĕng kơ tang-dŏ pơtao kơpal teh âu đĕch. Kơlih yua kơ thoi noh na bre jơ̆ng ’bang anăn sư Yakơ, Yôhan, bre sư hrĕnh hloh kơ đĭ lu buăl sư, năm ‘bơ̆t anăp Kră Yang khan thoi âu: “Apinh Ih ăn kơ nhi ngôi minh ‘nu gah ‘ma, minh ‘nu gah ‘ngiĕo Ih kơplah Ih pơm Pơtao nhôn.” (trong 37). Mă tơpă sư, ưh kơ trŏ kơ bre Yakơ păng Yôhan đĕch ôh, mă-lei đĭ-đăng 12 ’nu lu sư noh hloi kư̆m tơchĕng lei-lăi thoi noh ngăl. Lei na lăp ‘bôh ti bre ei hơbĕch tơgar iŏk ‘bar anih kơjung hloh lăm anih Pơtao Yêsu, na 10 ’nu jơ̆ng’bang noh blĕk hil kơ bre ei (trong 14).
Kơplah jơ trŏ’blep ei, Kră Yang Yêssu bơtho lu jơ̆ng’bang Sư ‘bai hŏk gah tơdrong awih-awăn trŏ thoi lăm dêh char’Bok Kei-Dei. Kră Yang khan kơ lu jơ̆ng’bang athei ’nĕ kơ pơm rok thoi lu bơngai ‘nguaih mă ưh kơ lui, lu sư pơgơ̆r pơgŏ pơkep, sư yua tơdrong sư gơh pơgơ̆r noh na pơgơ̆r kon pơlei mơ̆ng kơ sư wă, mưh sŏng sa noh ‘maih wă hơoei ‘bơ̆t anih tơ kơpal, mưh hơoei lăm bơngai tơpôl noh,’maih wă hơoei tơ anăp đe,pơgŏ kon pơlei khŏm chu kơ lu sư.Mă-lei lăm Kră Yang, bơngai bu ‘maih pơm tih, bơngai noh athei pơm đĭch đam, ‘maih jing bơngai pơgơ̆r, sư noh athei pơm đĭch đam kơ đĭ-đăng bơngai (trong 42-44). Tơdrong pơgơ̆r lăm dêh char’Bok Kei-Dei, lăm tơdrong lui tơplơ̆ hăm tơdrong pơgơ̆r tơ ala teh âu. Bơngai pơgơ̆r noh,sư ưh kơ yua tơdrong sư gơh pơgơ̆r noh wơh athei đe jang, athei đe pơm,kư̆m ưh kơ pơgŏ pơđep pơkep pơjuă, mă-lei sư lăp đon tơjur akâu, iŏk đon ala, awih-awăn thoi jơhngơ̆m lu bơngai đĭch đam đe, ưh kơ ngê̆ kơ đe pôk pơư, kư̆m ưh kơ ngê̆ kơ đe pơyom, mă-lei kŭp drap tơ ala ôp jơ̆ng bôl buăl thoi jơhngơ̆m bơngai đĭch đam. Kră Yang ưh kơ pơma ‘bơ̆r đĕch, mă-lei Kră Yang hlôi pơm kơmĭl bơih, thoi âu: “Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ’ngla Inh kơdih awih awăn kơ đe păng Inh wă kơ tơ’ngla Inh kơdih lôch tang huai iŏk lơ bơngai.” (trong 45).
‘Bai hŏk pơm đĭch đam kơ đĭ-đăng bơngai ‘nâu Kră Yang bơtho adrol kơ Sư chu iŏk gleh pơmat noh, ‘nâu bơih ’Bai hŏk mă gĭt kăl dêh, ưk kơ pôm kăl ăn kơ bơngai lui đĕch ôh,mă-lei kư̆m ‘măn ăn kơ lu bơngai pơgơ̆r rim khul tơdrong jang lăm hnam akŭm, păng khul bơngai tŏ sĕt ayơ ei, dah mă bơngai lăm hnam dơnŏ. Lăm lu bơngai lui bơ̆n, ‘nĕ kơ đei bơngai bu rok kiơ̆ thoi bơngai tơ ala teh âu chă wă kơ đei bưng, đe lui ngeh, dah mă wă kơ anăn sư đe ư-ang, mă-lei athei jao akâu bơ̆n lăm tơdrong jang, đĭ jơhngơ̆m awih-awăn kơ đĭ-đăng bơngai. Wă kơ gơh đei thoi noh, rim ‘nu kơ lu bơ̆n ‘nĕ kơ đei bơngai bu chĕp ba jơhngơ̆m ala teh tơmơ̆t lăm Khul Lui kơ ‘Bok Kei-Dei, mă-lei bơ̆n athei achăng tŭk lê̆ tơdrong kơdih bơ̆n ‘maih wă noh: “Iĕm ‘nĕ kơ pơm minh tơdrong kiơ mă ưh kơ ‘lơ̆ng kơ đe, thoi lĕ kơ tơdrong pơang, dah tơdrong ưh kơ băt mơnat kơ đe. Iĕm athei pơm ‘lơ̆ng ling-lang thoi bơngai dim jô̆ kơ đe bơngai ‘lơ̆ng hloh kơ iĕm. (Philip 2:3).
Apinh nơ̆r Kră Yang tơ’blŏk ăn kơ bơ̆n tơdrong arih awih awăn trŏ thoi Kră Yang wă lăm bơyan ‘blŏk hơdơ̆r kơ Kră Yang chu iŏk Gleh Pơmat păng Iung Arih, sơnăm 2026 ‘nâu.
Ơ Kră Yang, apinh Ih mơnat pă jô̆ yo yua kơ inh oei ‘maih pơgơ̆r kiơ̆ kơ jơhngơ̆m bơngai ala teh. Apinh Ih tơgŭm inh rok kơmĭl Ih, iŏk đon ala, tơjur akâu,păng đĭ jơhngơ̆m awih-awăn thoi jơhngơ̆m bơngai đĭch đam, tơgŭm inh chu pơm đĭch đam kơ đĭ-đăng bơngai mă Ih dan jum dăr kơ inh.Inh krao khan yua anăn Kră Yang Yêsu Krist, Amen!
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên34
Kênh Youtube BHKTHN:
