Klei Aê Diê Blŭ: II Klei Yăl Dliê 23:1-3
Êlan kliăng: “Y‑Jêhôida lač kơ diñu, ‘Nĕ anei, anak êkei mtao! Brei ñu kiă kriê tui si Yêhôwa blŭ leh djŏ kơ phung anak êkei Y‑Đawit’” (II Klei Yăl Dliê 23:3b)
Klei êmuh ksiêm mĭn: Si ngă Khua ngă yang Y‑Jêhôida ngă tloh năm thŭn mdăp Y‑Jôas anak êkei mtao? Hŏng ya atur ñu iêô jak jih jang mnuih sa ai ngă bruă mbĭt hŏng ñu? Si Aê Diê čiăng ih ngă bruă hŏng klei jhŏng tơdah bi leh hdră Ñu?
Tloh năm thŭn mdăp Y‑Jôas, anak êkei mtao, hlăm thŭn tal kjuh Khua ngă yang Y‑Jêhôida “đĭ ai jhŏng”, čiăng lač ñu đĭ ai jhŏng bi kdơ̆ng hŏng Mtao mniê H’Athali. Tal êlâo hĭn, ñu ngă klei bi mguôp hŏng êma čô khua kahan. Êdei tinăn, êma čô anei hiu tar ƀar čar Yuđa bi kƀĭn jih jang phung Lêwi, phung khua sang ama phung Israel, leh anăn digơ̆ hriê kơ ƀuôn Yêrusalem sơăi. Tinei, digơ̆ ngă leh klei bi mguôp hŏng Y‑Jôas, pô dơ̆ng đĭ jing mtao hlăm Sang Kkuh Mpŭ kơ Aê Diê. Y‑Jêhôida lŏ mñă bi hdơr kơ digơ̆ kơ klei bi mguôp Aê Diê ngă leh hŏng sang Y‑Đawit hŏng klei đăo sĭt kơ Aê Diê srăng bi sĭt klei Ñu ƀuăn leh: “Nĕ anei, anak êkei mtao! Brei ñu kiă kriê tui si Yêhôwa blŭ leh djŏ kơ phung anak êkei Y‑Đawit” (êlan 3b). Ñu čiăng kơ digơ̆ ngă bruă mbĭt hŏng ñu hŏng klei đăo kơ klei Aê Diê ƀuăn mơh čiăng kơ Aê Diê yua digơ̆ ngă klei Aê Diê bi mguôp hŏng sang Y‑Đawit.
Hlăm krĭng Giăm Ngŏ đưm adih, ngă klei bi mguôp jing sa kdrêč hlăm klei hdĭp ênuk anăn. Anei jing klei bi kuôl kă plah wah dua nah hŏng klei bi ƀuăn rơ̆ng srăng ngă čiăng truh kơ sa klei kñăm čiăng mbĭt. Mơ̆ng klei bi mguôp Aê Diê ngă leh hŏng anak mnuih hlăm jih jang klei hƀuê ênuk phung Israel msĕ si klei bi mguôp hŏng Y‑Nôê, hŏng Y‑Abraham, hŏng Y‑Môis, hŏng Mtao Y‑Đawit leh anăn hŏng lu pô mkăn đa đa…, Aê Diê bi êdah leh hdră klei Ñu bi mtlaih kơ lăn ala. Ƀiădah yuôm bhăn êdi, Aê Diê Pô Sĭt Suôr bi sĭt nanao klei Ñu ƀuăn hlăm klei bi mguôp wăt tơdah anak mnuih amâo gưt asăp amâodah bi kdơ̆ng hŏng Ñu dưn.
Hruê anei, klei Aê Diê ƀuăn hŏng Mtao Y‑Đawit bi sĭt leh hlăm Khua Yang Yêsu. Ñu yơh jing Pô Bi mtlaih (Bruă Phung Khua Ƀĭng Kna 13:23), jing sa čô Mtao, jhưng mtao leh anăn ƀuôn ala mtao Ñu srăng jing kjăp hlŏng lar (II Y‑Samuel 7:16). Ƀiădah mơ̆ng ênuk đưm hlŏng kơ ară anei hin, Satan čiăng mkhư̆ gang nanao hdră Aê Diê bi mtlaih, duah djăp êlan čiăng bi rai anak čô Mtao Y‑Đawit. Kyuanăn, brei jih jang phung mâo klei đăo kơ klei Aê Diê ƀuăn ăt mâo klei jhŏng nanao hlăm klei ngă bruă. Khua Yang čiăng jih jang phung jhŏng kgŭ dơ̆ng lŏ bi hdơr kơ klei Ñu ƀuăn leh kơ klei bi mtlaih wăt tơdah arăng bi kdơ̆ng, amâodah klei huĭ hyưt truh kơ klei hdĭp dưn mơh. Khua Yang čiăng jih jang phung mâo ai tiê jhŏng ngă bruă, hur har nao hưn Anăn Ñu, jhŏng myơr kơ bruă hiu hưn Klei Mrâo Mrang Jăk…čiăng bi leh hdră Aê Diê. Msĕ mơh, Ñu čiăng kơ phung jhŏng blŭ klei sĭt nik, mtô kơ klei sĭt nik tui si klei bi hriăm mơ̆ng Klei Aê Diê Blŭ čiăng ngă klei kpă ênô Aê Diê. Tơdah Aê Diê mtrŭt ih ngă sa mta klei, ngă bĕ hŏng ai tiê jhŏng msĕ si Khua ngă yang Y‑Jêhôida ngă leh tui si klei Aê Diê mtrŭt.
Ya bruă Aê Diê dôk mtrŭt drei ngă kơ Ñu? Si drei čuăn ngă leh?
Wah lač: Ơ Khua Yang, đru kâo mâo ai tiê jhŏng ngă tui si klei Ih mtrŭt čiăng kơ hdră Ih dưi bi leh hlăm klei hdĭp kâo wăt hlăm Phung Sang Aê Diê Ih msĕ mơh. Kâo wah lač hlăm anăn Yêsu Krist. Amen.
* Dlăng Klei Aê Diê Blŭ hlăm tlâo thŭn: I Kôrantô 15:1-34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
