2 Xwmtxheej Vajntxwv 23:1-3
Nqe cim zaj kawm:
“Yehauyadas hais rau lawv tias, “Ntawm no yog vajntxwv tus tub ntxawg! Nimno nws yog tus yuav ua vajntxwv raws li tus TSWV tau coglus rau Vajntxwv Daviv hais tias nws cov xeebntxwv yuav tau ua vajntxwv mus li” (II Xwmtxheej Vajntxwv 23:3b).
Lus nug rau sawvdaws xav:
– Tus Povthawj hlob Yehauyadas tau ua li cas tom qab 6 lub xyoos uas zais tus tub vajntxwv Yau-as?
– Los ntawm lub chaw ruaj khov twg ua rau Yehauyadas nqua hu txhua tus nrog nws koom tes ua txoj haujlwm no?
– Vajtswv xav kom peb muaj lub siab tawv li cas thaum uas peb ua Nws haujlwm?
Tom qab 6 lub xyoos uas zais tub vajntxwv Yau-as dhau los lawm, lub xyoos tim 7 “tus Povthawj Yehauyadas pom hais tias txog sijhawm uas nws yuav tsum nqis tes ua haujlwm raws li nws tau npaj siab lawm” uas yog txog sijhawm yuavtsum muaj lub siab tawv tawm tsam tus poj vajntxwv Athaliyas lawm. Xub thawj, Yehauyadas cog phoojywg nrog rau tsib tus thawj tubrog hauv lub tebchaws thiab txib lawv mus thoob plaws txhua lub nroog hauv tebchaws Yudas, coj cov Levis thiab cov thawjcoj ntawm txhua cuab tuaj hauv lub nroog Yeluxalees. Lawv sawvdaws coglus rau Yau-as tus uas yuav tsa ua vajntxwv. Yehauyadas thiaj hais rau lawv tias: “Ntawm no yog vajntxwv tus tub ntxawg! Nimno nws yog tus yuav ua vajntxwv raws li tus TSWV tau coglus rau Vajntxwv Daviv hais tias, nws cov xeebntxwv yuav tau ua vajntxwv mus li” (nqe 3b). Yehauyadas xav kom lawv ntseeg raws li Vajtswv twb coglus tseg lawm thiab cia Vajtswv siv lawv koom nrog nws ua tiav Vajtswv lo lus cogtseg rau Daviv lawm.
Nyob rau ntau lub tebchaws cheebtsam ze sab hnub tuaj, txoj kev sib coglus yog ib feem tseemceeb rau hauv lawv lub neej tiam ntawd. Txoj kev coglus no ob tog puavleej pom zoo thiab khi ob tog uake koom ua ib tes haujlwm rau ib homphiaj li twb sib coglus tseg lawm. Dhau los ntawm Vajtswv thiab tibneeg sib coglus nyob rau hauv keebkwm haiv neeg Yixalayees xws li, coglus rau Nau-es, coglus rau Anplahas, coglus rau Mauxes, coglus rau vajntxwv Daviv…, Vajtswv qhia txoj kev cawm dim uas Nws twb npaj tseg lawm rau tibneeg paub. Qhov tshwjxeeb yuav tsum paub Vajtswv yog tus ncaj ncees, txawm yog tibneeg tsis mloog lus tawm tsam Nws los Nws yeej ua raws li Nws tau coglus tseg lawm.
Niaj hnub nimno, Vajtswv lo lus cogtseg rau Daviv twb ua tiav nyob hauv Tswv Yexus lawm. Nws yog tus Tswv Cawmseej (Tes Haujlwm 13:23), yog tus vajntxwv uas Nws lub zwmtxwv thiab lub tebchaws yuav nyob mus ib txhis li (2 Xamuyees 7:16). Tiamsis txij thaum ub los txog nimno, Dab Ntxwjnyoog pheej tav txoj kev cawmdim uas Vajtswv twb xub npaj tseg lawm, Dab nrhiav txhua txoj haukev los tua Daviv cajceg kom tu noob. Yog li ntawd, txhua tus uas cia siab rau Vajtswv lo lus cogtseg kuj yuavtsum muaj lub siab tawv ua tes haujlwm ntawd. Vajtswv cheemtsum tus uas muaj lub siab tawv, sawv los qhia Vajtswv tej lus cogtseg txog txoj kev cawmdim, txawm yuav raug tawm tsam, yuav muaj kev dawm txog txoj sia los xij. Vajtswv cheemtsum tus uas muaj lub siab tawv, npaj txhij mus ua tim khawv, npaj txhij fij txhua yam rau kev xa Moo Zoo…kom ua tiav yam uas Vajtswv npaj tseg lawm. Vajtswv kuj cheemtsum tus uas muaj lub siab tawv hais tawm qhov tseeb li Vajtswv Txojlus qhia kom muaj kev ncaj ncees. Yog Vajtswv xav kom peb ua yam dab tsi, cia li muaj lub siab tawv ua ib yam li tus povthawj hlob Yehauyadas tau ua yam uas Vajtswv qhia.
Thov Vajtswv
Tus Tswv, thov Koj pab nyuam yaus muaj lub siab tawv ua raws li Koj kev npaj tseg nyob hauv nyuam yaus lub neej thiab hauv pawg ntseeg, nyuam yaus tuav Tswv Yexus Khetos lub npe thov, Amees.
Vajtswv tabtom xav kom peb ua dab tsi rau Nws? Peb txiav txim siab li cas?
Nyeem Vajluskub hauv peb xyoos: 1 Kauleethaus 15:1-34
Kênh Youtube BHKTHN:
