Klei Aê Diê Blŭ: I Y-Pêtrôs 5:6-7
Êlan kliăng: “Jao bĕ kơ Ñu jih jang klei uêñ hnĭng diih, kyuadah Ñu răng kriê kơ diih.” (I Y-Pêtrôs 5:7)
Klei êmuh ksiêm mĭn: Ya dua mta klei Khua ƀĭng kna Y-Pêtrôs mtô brei ngă hlăk tuôm hŏng klei dleh dlan, amâo thâo bĭt êlan hlăm klei hdĭp? Ya ngă brei ngă hĕ dua mta klei anăn? Ya klei diih ngă čiăng dưi găn jih klei lông dlăng, klei uêñ hnĭng hlăm klei hdĭp?
Khua ƀĭng kna Y-Pêtrôs lŏ mñă Klei Blŭ Khua Yang Yêsu mtô tơdah hlei pô bi luă gŭ ñu pô arăng srăng bi mđĭ ñu (Y-Luk 14:11; 18:14) kyuadah“Aê Diê bi kdơ̆ng hŏng phung mgao, ƀiădah brei klei pap kơ phung luă gŭ.” (êlan 5b). Boh blŭ “bi luă gŭ pô” hlăm êlan 6 jing tŭ ư klei pô êdu awăt, jao jih asei mlei leh anăn jih klei uêñ hnĭng pô kơ Aê Diê. Si dưi amâo bi luă gŭ pô ti gŭ “kngan myang” Aê Diê tơdah Ñu yua leh “kngan myang” anăn čiăng ngă bruă amâo mâo pô dưi ngă (Klei Mtô Mñă Klei Bhiăn 3:24; 4:34…). Kngan Aê Diê djă kơ̆ng klei hdĭp phung ƀuôn sang Ñu čiăng bi mtlaih, msĕ si klei mtao Y-Đawit blŭ hrăm hŏng Aê Diê: “Ih jing Pô djă thŭn kâo hdĭp; bi mtlaih kâo bĕ mơ̆ng phung roh kâo leh anăn phung ngă jhat kơ kâo.” (Klei Mmuñ Hđăp 31:15).
Tơdah drei mĭndah drei mâo êbeh klei thâo mĭn leh anăn klei knhâo dưi bi mgaih msir jih klei dleh dlan drei pô, snăn drei amâo lŏ čiăng jao jih klei drei uêñ hnĭng kơ Khua Yang ôh. Boh sĭt, drei ăt dưi mơh mgaih msir đa đa kdrêč klei dleh dlan drei pô, ƀiădah sĭt nik Khua Yang amâo mơak ôh leh anăn kăn ba klei tŭ jing hĭn lei, kyuadah mâo nanao klei truh êngao kơ klei drei dưi. Tăp năng Khua Yang amâo mgaih mkra brei mtam klei truh kơ drei ôh, ƀiădah sĭt nik Khua Yang srăng mgaih mkra brei kơ drei djŏ tui si mmông Ñu leh anăn tui si hdră êlan jăk hĭn Ñu. Klei yuôm jing brei drei luă gŭ nanao čiăng kăp knang kơ kngan myang Aê Diê.
Khua Yang Yêsu mtô leh đăm uêñ hnĭng ôh (Y-Mathiơ 6:25-34; Y-Luk 12:22-32). Klei uêñ hnĭng jing knuih mnuih djăl rŭng wăt bi êdah kơ pô anăn mâo klei đăo điêt mơh (Y-Luk 12:25, 28). Klei Aê Diê Blŭ lač: “Ƀiădah tơdah Aê Diê bi hơô brei msĕ snăn kơ rơ̆k hlăm hma, hdĭp hruê anei leh anăn mgi arăng hwiê gơ̆ hlăm kpur pui, amâo djŏ hĕ kdlưn hĭn Ñu srăng bi hơô diih, Ơ phung mnuih mâo klei đăo điêt?” (Y-Mathiơ 6:30). Phŭn knhal klei Khua Yang Yêsu mtô đăm rŭng răng ôh kyuadah“Hlei hlăm phung diih hŏng klei uêñ đei dưi lŏ thiăm đa đa hruê kơ klei hdĭp ñu? Snăn tơdah diih amâo dưi ngă ôh bruă điêt msĕ snăn, si ngă diih rŭng răng kơ klei mkăn?” (Y-Luk 12:25-26). Klei hdĭp drei amâo tlaih ôh hŏng klei lông dlăng, rŭng răng mơ̆ng klei truh kơ klei hdĭp ba hriê. Hdră êlan hgao klei uêñ hnĭng amâo djŏ ôh hŏng ai ktang hjăn pô dê ƀiădah jao jih klei uêñ hnĭng kơ Khua Yang kyuadah Ñu čiăng răng kriê kơ phung anak ƀuôn sang Ñu nanao! Jao bĕ jih klei dleh dlan, klei uêñ hnĭng drei pô kơ Khua Yang leh anăn hdĭp hŏng klei đăp, klei êđăp ênang nanao. Khua Yang srăng đru drei găn klei lông dlăng hlăm hruê mmông Ñu. Hdơr bĕ snei, Khua Yang amâo srăng răng kriê kơ drei ôh tơdah drei amâo jao jih klei uêñ hnĭng drei kơ Ñu!
Si ngă drei jao nanao jih klei uêñ hnĭng drei kơ Khua Yang mơ̆?
Wah lač: Ơ Khua Yang khăp hơiêng! Pap brei kơ kâo kyuadah kâo djăl rŭng răng, leh anăn mĭndah hŏng klei thâo, ngăn drăp kâo dưi bi mgaih msir klei dleh dlan kâo. Brei kâo thâo jao jih klei uêñ hnĭng kâo kơ Ama kyuadah kngan myang Ih răng kriê kơ kâo tui si hdră jăk hĭn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
