I Petus 5:6-7
Nqe cim
“Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv” (I Petus 5:7).
Lus nug rau sawvdaws xav:
– Timthawj Petus qhia yuav tsum ua ob yam dabtsi thaum ntsib kev txomnyem, tws kev hauv lubneej?
– Vim licas yuav tsum ua ob yam ntawd?
– Koj ua dabtsi kom hla dhau tej kev sim siab, txhawj ntshai hauv lubneej?
Timthawj Petus rov hais txog Tswv Yexus tej lus qhia hais tias, yog leejtwg txo hwjchim, yuav tau hwjchim (Lukas 14:11; 18:14) vim “Vajtswv tawmtsam tus uas khavtheeb, tiamsis Vajtswv pub koob hmoov rau tus uas txo hwjchim” (nqe 5b). Lo lus “txo hwjchim” nyob hauv nqe 6 yog lees paub hais tias yus tsis muaj peevxwm, muab yus tus kheej thiab txhua yam kev txhawj xeeb tso plhuav rau Vajtswv. Ua licas yuav txo tsis taus hwjchim nyob hauv Vajtswv “qab tes uas muaj hwjchim” thaum Nws twb siv txhais tes ntawd los ua tej haujlwm uas tsis muaj leejtwg ua tau? (II Kevcai 3:24; 4:34…) Tus Tswv txhais tes tuav rawv Nws cov menyuam txojsia thiab cawm lawv zoo li Vajntxwv Daviv tej lus hais rau Vajtswv hais tias: “Kuv lub caij lub nyoog nyob hauv koj txhais tes, thov koj cawm kuv dim hauv kuv cov yeeb ncuab thiab cov uas tsim txom kuv txhais tes” (Ntawv Nkauj 31:15 HMOWSV).
Yog peb xav hais tias peb muaj txaus tswvyim thiab peevxwm los daws peb tej teebmeem ces peb yuav tsis muab txhua yam kev ntxhov siab tso plhuav rau tus Tswv. Tseeb tiag, peb kuj muaj cuabkav daws peb tej teebmeem ib feem twg, tiamsis paub tseeb hais tias tus Tswv yuav tsis txaus siab thiab yuav tsis coj tau yam zoo kawg nkaus los rau peb, vim yeej yuav muaj tej xwmtxheej uas peb xav tsis txog tshwmsim. Tej zaug tus Tswv yuav tsis daws peb tej teebmeem tamsim ntawd, tiamsis paub tseeb hais tias Nws yuav pab peb thaum txog Nws lub sijhawm raws li Nws lub siabnyiam. Qhov tseemceeb yog peb yuav tsum txo hwjchim vamkhom Vajtswv txhais tes uas muaj hwjchim.
Tswv Yexus qhia hais tias tsis txhob txhawj (Mathais 6:25-34; Lukas 12:22-32). Txhawj ntshai ib ke yog tus cwjpwm ntawm tus neeg kheev txhawj xeeb, ib ke qhia hais tias tus ntawd kev ntseeg tsawg heev (Lukas 12:25, 28). Tswv Yexus qhia hais tias: “Tej nroj tsuag uas nyob hnub no, tagkis luag twb yuav muab pov hlawv rau hauv qhov cub, ua ciav Vajtswv twb pub rau tej nroj tsuag ntawd zoo nkauj ua luaj, yog li ntawd, Vajtswv yimhuab yuav pub rau nej muaj hnav zoo dua tej roj tsuag ntawd. Ua li cas nej kev ntseeg yuav tsawg ua luaj!” (Mathais 6:30). Keebtiv Tswv Yexus qhia hais tias tsis txhob txhawj yog vim: “Nej tej kev txhawj puas yuav pab tau kom nej muaj sia nyob ob peb xyoos ntxiv? Yog tej yam me me no nej twb ua tsis tau, nej tseem yuav mus txhawj lwm yam ua dabtsi?” (Lukas 12:25-26). Peb yeej qaij tsis dhau tej kev sim siab, txhawj ntshai nyob hauv lubneej. Txoj haukev pab peb tiv dhau kev sim siab tsis yog siv peb lub zog los daws tiamsis yog ciali muab txhua yam kev txhawj xeeb tso plhuav rau tus Tswv vim Nws niaj hnub saibxyuas Nws cov menyuam! Cia li muab txhua yam kev txomnyem, kev txhawj ntshai tso plhuav rau tus Tswv thiab ua lubneej cia siab ntsoov, kaj siab lug. Tus Tswv yuav pab peb tiv dhau tej kev sim siab thaum txog Nws lub sijhawm. Yuav tsum nco ntsoov hais tias tus Tswv yuav tsis pab peb yog hais tias peb pheej tsis muab tej kev txhawj xeeb tso plhuav rau Nws!
Thov Vajtswv
Leejtxiv uas nyuam yaus hlub tshua! Thov zam txim rau nyuam yaus vim pheej txhawj ntshai thiab xav hais tias tej kev txawjntse thiab nyiaj txiag yuav pab daws tau nyuam yaus tej teebmeem. Thov pab nyuam yaus paub muab txhua yam kev txhawj xeeb tso plhuav rau Koj txhais tes uas muaj hwjchim, kom tau Koj saibxyuas raws li Koj lub siabnyiam. Nyuam yaus tuav Cawmseej Yexus lub npe thov, Amees.
Peb puas niaj hnub muab txhua yam kev txhawj xeeb tso plhuav rau tus Tswv lawm tau?
Nyeem Vajluskub hauv peb lub xyoo: Chivkeeb 34
Kênh Youtube BHKTHN:
