Klei Aê Diê Blŭ: Y‑Đaniel 10:1‑3, 14
Êlan kliăng: “Jăk mơak yơh phung čŏk hia, kyuadah Aê Diê srăng bi juh diñu.” (Y‑Mathiơ 5:4).
Klei êmuh ksiêm mĭn: Si ai tiê khua pô hưn êlâo Y‑Đaniel leh anăn ya klei ñu ngă? Klei truh “Thŭn tal tlâo Y‑Sirus jing mtao” si klei djŏ tuôm hŏng ai tiê ñu? Ya klei Aê Diê bi êdah kơ ñu ƀuh? Klei ñu ênguôt hnĭng, amâo ƀơ̆ng mnơ̆ng jăk leh anăn mă tŭ klei bi ƀuh, si klei bi mđĭ ai kơ drei? Kơ ya mta drei “dôk hia” ară anei hin?
Kčưm thŭn tal êlâo kiă kriê mtam, mtao Y‑Sirus čar Persơ mtrŭn klei mtă brei phung ƀuôn sang Israel wĭt lŏ mdơ̆ng Sang Yang Yêrusalem (Y‑Êsra 1:1‑11). Ƀiădah amâo sui ôh kơnăn, “phung ƀuôn sang hdĭp hlăm čar anăn bi êdu ai phung ƀuôn sang Yuđa, leh anăn bi huĭ digơ̆”, snăn “bruă ngă sang yang Aê Diê hlăm ƀuôn Yêrusalem mdei hĕ tơl thŭn tal dua Y‑Darius…” (Y‑Êsra 4:4, 24). Kyuanăn trăn Klei Aê Diê Blŭ hruê anei kčưm dơ̆ng hŏng pruê̆ blŭ “thŭn tal tlâo Y‑Sirius jing mtao čar Persơ” (êlan 1) đru drei thâo, anei jing hlăk bruă mdơ̆ng Sang Yang mdei hĕ. Kyuadah khua pô hưn êlâo Y‑Đaniel hlăk anăn êgao 80 thŭn leh leh anăn năng ai hŏng anôk bruă ñu hlăm sang mtao Y‑Sirius srăng dưi đru phung ƀuôn sang Aê Diê lŏ wĭt kơ ƀuôn jăk hĭn, snăn ñu amâo dưi wĭt mbĭt ôh hŏng phung ƀuôn sang Aê Diê lŏ mdơ̆ng Sang Yang. Ƀiădah lĕ, dôk leh anăn hmư̆ hưn kơ boh klei phung ƀuôn sang Aê Diê ti ƀuôn dôk găn ngă kơ ñu “dôk kơŭ kyăm jih tlâo hruê kăm” (êlan 2). Ñu “amâo ƀơ̆ng mnơ̆ng jăk ôh”, amâo mnăm kpiê, amâo ƀơ̆ng čĭm kăn mia êa mñak rei tơl “jih tlâo hruê kăm anăn” (êlan 3). Drei amâo thâo ôh si ngă tinei ñu amâo kăm ƀơ̆ng huă ôh, ƀiădah ruah čuăn kơ ñu pô dŭm hruê ư̆ amâo yua ôh mnơ̆ng asei mlei kđeh khăp, čiăng pioh hruê anăn ênguôt hnĭng, čŏk hia kơ klei ai tiê ñu dôk klam.
Hlăm klei găn anăn, “mâo sa klei bi êdah kơ Y‑Đaniel” (êlan 1) kơ “klei srăng truh kơ phung ƀuôn sang ih hlăm ênuk knhal tuč” (êlan 14). Tơdah ñu ktrŏ ai tiê gui klam, tơdah tiê boh ñu kpư̆ mgei mđrăm mbĭt hŏng Khua Yang, Khua Yang dlăng kơ ñu jing mah jiăng sŭk suôr, Ñu kah mbha hdră êlan yuôm bhăn Ñu mprăp leh kơ phung ƀuôn sang Ñu hlăm hruê êdei anăp adôk kbưi snăk.
Tơdah hmư̆ hưn “phung mnă ăt dôk hlăm čar, phung wĭt leh mơ̆ng klei jing mnă mâo klei rŭng răng leh anăn klei hêñ prŏng. Mnư̆ ƀuôn Yêrusalem klưh leh, leh anăn ƀăng bhă gơ̆ pui ƀơ̆ng leh ”, snăn khua pô hưn êlâo Y‑Nêhêmi – pô ênuk mbĭt hŏng khua pô hưn êlâo Y‑Đaniel – ăt “dôk gŭ hia, kơŭ kyăm êjai lu hruê”, “kăm ƀơ̆ng huă leh anăn wah lač” (Y‑Nêhêmi 1:1-4). Ênguôt hnĭng, kơŭ kyăm hŏng Khua Yang kơ bruă phung ƀuôn sang Aê Diê, kơ phung găp djuê jing klei phung khua pô hưn êlâo Y‑Đaniel, Y‑Nêhêmi mbĭt hŏng lu phung dĭng buăl Aê Diê ngă leh. Ƀuh boh klei mâo hlăm Phung Sang Aê Diê, hlăm găp djuê, akâo kơ Khua Yang brei drei amâo blŭ duñ duñ ôh, amâo ƀuah ôh, ƀiădah hmiêt mkăp ai tiê dôk mbĭt hlăm phung doh jăk Khua Yang, ênguôt hnĭng, kơŭ kyăm hŏng Khua Yang leh anăn wah lač brei kơ phung anak ƀuôn sang Aê Diê wăt kơ găp djuê drei. Brei hdơr klei Khua Yang Yêsu mtô leh: “Jăk mơak yơh phung čŏk hia, kyuadah Aê Diê srăng bi juh diñu!”
Si ngă drei uêñ mĭn mơ̆ kơ klei jing Phung Sang Aê Diê leh anăn phung găp djuê drei?
Wah lač: Ơ Khua Yang, čŏk hia hŏng Khua Yang hrô brei kơ Phung Sang Aê Diê leh anăn kơ phung găp djuê drei jing klei jăk mơak. Akâo Khua Yang đru kâo mâo ală thâo ƀuh klă boh klei jing, mâo ai tiê thâo khăp čiăng čŏk hia hŏng Khua Yang.
Dlăng Klei Aê Diê Blŭ hlăm tlâo thŭn: Y‑Êsai 35:4–36:22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
