Daniyees 10:1-3, 14
Nqe cim:
“Cov uas quaj ntsuag tau nyob kaj siab lug, rau qhov lawv yuav tau txais kev nplij siab” (Mathais 5:4).
Lus nug rau sawvdaws xav:
- Tus cevlus Daniyees lub siab hnov licas thiab nws tau ua dabtsi?
- Lub sijhawm “Xailas ua huabtais kav tebchaws Pawxias tau peb xyoos” muaj kev cuam tshuam licas rau Daniyees tej kev xav?
- Tus Tswv tau qhia rau nws pom yam dabtsi?
- Qhov uas nws nyuaj siab, noj tsis taus zaub mov thiab thaum kawg tau pom zaj yogtoog, txhawb peb lub zog licas?
- Peb tabtom “nyuaj siab” rau yam dabtsi?
Nyob rau thawj xyoo tswjkav, huabtais Xawxes uas kav tebchaws Pawxias tau tso cai rau cov Yudais rov los txhim kho lub Tuamtsev hauv nroog Yeluxalees (Exalas 1:1-11). Tiamsis, tomqab ntawd tsis ntev, “cov neeg uas nyob hauv lub tebchaws ntawd pheej nrhiav kev hem thiab ua kom cov neeg Yixalayees qaug zog tsis txhob txhim kho lub Tuamtsev”, tomqab ntawd “lawv txawm tso tseg tsis ua lub Tuamtsev thiab nyob tos mus txog thaum Vajntxwv Dali-us ua vajntxwv kav tebchaws Pawxias tau ob xyoos…” (Exalas 4:4, 24). Vim li ntawd, ntu Vajluskub hnub no uas pib ntawm nqe lus “Thaum Xailas ua huabtais kav tebchaws Pawxias tau peb xyoos lawm” (nqe 1) qhia peb paub hais tias ntawd yog sijhawm sawvdaws tso tseg tsis ua Vajtswv lub Tuamtsev lawm. Vim lub sijhawm ntawd tus cevlus Daniyees twb muaj 80 xyoo lawm thiab tej zaum yog vim lub meejmom uas nws tau ua nom loj rau vajntxwv muaj qabhau rau Tswv haivneeg kev rov los qub tebchaws, nws thiaj tsis nrog tus Tswv haivneeg los txhim kho lub Tuamtsev. Tiamsis, thaum hnov txog tej yam tabtom tshwm tuaj rau Tswv haivneeg nyob qub tebchaws ua rau Daniyees “nyuaj siab tau peb lub limtiam” (nqe 2). Nws “noj dabtsi los tsis qab”, tsis haus cawv txiv hmab, tsis pleev tshuaj tsw qab mus txog thaum tau “peb lub limtiam nkaus” (nqe 3). Peb tsis paub hais tias vim licas Daniyees tsis ua kevcai yoo mov, tiamsis no nws ho tseg sijhawm los caiv qee yam uas lub cev xav noj, thiab quaj rau tej uas nws hnyav siab xwb.
Nyob rau sijhawm ntawd, “Vajtswv qhia ib zaj lus rau Daniyees” (nqe 1) hais txog “tej uas yuav tshwm los yav tom ntej” (nqe 14). Thaum Daniyees nyuaj siab, tus Tswv saib Daniyees zoo li ib tug phoojywg zoo, Nws thiaj qhia rau Daniyees paub txog tej uas tshuav ntev mam tshwmsim los rau Nws haivneeg.
Thaum hnov hais tias “cov neeg uas seem thiab tau rov los nyob rau hauv lawv tej qub teb qub chaw, mas txomnyem kawg li, thiab cov neeg txawv tebchaws uas nyob ze lawv ua saib tsis taus lawv kiag li… tus ntsa yeej thaiv lub nroog Yeluxalees los puastsuaj tas, thiab tej roojloog los yeej tsis tau kho ib lub, txij thaum luag muab hlawv los txog niaj hnub no”, ces tus cevlus Nehemis – uas nyob nrog Daniyees tiam – kuj “nyuaj siab thiab quaj tau ob peb hnub tsis noj ib qho mov li”, thiab tseg sijhawm “thov Vajtswv” (Nehemis 1:1-4). Nyuaj siab, quaj ntsuag qhia rau tus Tswv txog tus Tswv haivneeg thiab cov txheeb ze, yog yam uas tus cevlus Daniyees, tus cevlus Nehemis thiab tus Tswv cov tubtxib pheej ua. Thaum saib pom tej yam tshwmsim hauv Pawg Ntseeg, thiab hauv cov txheeb ze, thov tus Tswv qhia peb txhob yws, txhob cem, txhob liam txim rau lwm tus, tiamsis txaus siab hlo nrog tus Tswv cov neeg dawbhuv nyuaj siab, quaj ntsuag rau tus Tswv thiab thov tus Tswv pab sawvdaws. Yuav tsum nco txog Tswv Yexus tej lus qhia: “Cov uas quaj ntsuag tau nyob kaj siab lug, rau qhov lawv yuav tau txais kev nplij siab!”
Thov Vajtswv
Tus Tswv, nyuaj siab quaj ntsuag rau Koj txog Pawg Ntseeg thiab cov txheeb ze yog ib txoj koobhmoov. Thov pab nyuam yaus saib pom tej uas tabtom tshwmsim thiab pub nyuam yaus muaj lub siab hlub quaj ntsuag piav qhia rau Koj. Amees.
Peb puas quav ntsej txog tej yam tabtom tshwmsim rau Pawg Ntseeg thiab peb cov txheeb ze?
Nyeem Vajluskub hauv peb lub xyoos: Yaxayas 35:4-36:22
Kênh Youtube BHKTHN:
