II Hơ’mon 34:3-7
“Yua kơ thoi noh na ơ lu ‘nhŏng oh mă inh ‘mêm kơeng, iĕm athei tŭk lê̆ đĭ dôm tơdrong yang kơnê̆ hŏ, ‘nĕ pă kiơ̆ sư.” (I Kôrintô 10:14)
Nơ̆r jet tơchĕng pơwao:
– Sơnăm mă mơjĭt bar, Pơtao Jôsia pơgơ̆r sư pơtơm jang tơdrong kiơ?
– Pơtao jang tơdrong ‘noh thoi yơ?
– Dang ei, lu bơ̆n kăl kơ hŭt lê̆ lu rup yang ayơ?
Đơ̆ng rŏng kơ sư “pơtơm chơchă Kră Yang ‘Bok Kei-Dei” puăn sơnăm, truh tơ sư ‘bar jĭt sơnăm, sư pơtơm hơmet rơgoh lăm char Juđa păng pơlei Jêrusalem, hŭt lê̆ lu anih kơjung, gơ̆ng kơkuh kơ rup yang Asêria, rup yang đe traih păng rup đe hling tuh. Đe teh pơchah lê̆ đĭ lu chơnang soi kơ lu rup yang Baal ‘bơ̆t anăp sư, teh pơchah pơhĕch lu chơnang soh ‘long ‘bâu phu kơpal chơnang soi noh; lu rup yang Asêria, rup yang đe traih păng rup yang đe hling tuh, teh tơgơ̆ tơpơ̆k lê̆, teh pơhĕch, na iŏk prôi tơ kơpal bơsat lu bơngai lôch mă đêl soi sơmah kơ sư păng pơm rup yang noh.” (trong 3-4), lu rup yang kon pơlei Siđôn, Kêmôt, Môap, Minh Kôm (II Pơtao 23:13). Pơtao hŭt lê̆ đĭ lu rup pơm păng tơ̆r păng rup đe hling tuh. Teh tơgơ̆ tơpơ̆k lê̆, teh pơhĕch, na iŏk prôi tơ kơpal bơsat lu bơngai lôch mă đêl soi sơmah kơ sư păng pơm rup yang noh “Jôsia kư̆m pơrăm pơpuh lê̆ đĭ lu bơngai pơjâu krao bơhngol bơngai lôch păng lu pơjâu tơwir, lu rup yang kơdih rim hnam păng lu rup yang hăm đĭ-đăng lu tơdrong kơnê̆ ‘mê̆ ‘mach mă Kră Yang areh đei ‘bôh lăm char Juđa păng tơ pơlei Jêrusalem, wă pơm kiơ̆ kơjăp tơdrong juăt đei chih bơih lăm sơ̆p hla bơar mă ‘bok soi Hilkia đei chă ‘bôh đơ̆ng lăm hnam akŭm kơkuh kơ Kră Yang” (II Pơtao 23:24).
Đơ̆ng noh pơtao năm jơ̆p anih “Lăm pơlei adrĕch Manase, Êphraim păng pơlei Simêôn, truh tơ lu pơlei adrĕch Naptali, anih mă đĭ juơ tăp dăr.” (trong 6). Jơ̆ lu pơlei đơ̆ng gah yă nâm wă hơmet mă tơproh ‘bơ̆t anih âu đơ̆ng noh wih brŏk tơ Jêrusalem. Yua kơ Isơrael gah yă nâ̆m đei bơngai Asiri blah tơgar iŏk kon pơlei sư pơm bơnă. Lăm jơhnơr sơ̆, dêh char Asiri ưh pă pran rai jur bơih thoi noh pơtao Jôsia hŭt lê̆ đĭ lu rup yang tơ anih ‘nâu.
Tơdrong chơchă Kră Yang, Pơtao Jôsia ưh kơ sĭ lăm tơdrong tơchĕng đĕch mălei sư tơ’bôh gah ‘nguaih hloi tŭk lê̆ lu rup yang wă ba lu kon pơlei kơku kơ Kră Yang. Chăl arih bơngai lui, kư̆m dai athei chơchă Kră Yang, ưh kơ sĭ lăm đon tơchĕng đĕch, dah lăm jơhngơ̆m, mălei athei tơ’bôh hăm tơdrong hŭt lê̆ lu rup yang lăm chăl arih. Hăm bơngai lui bơ̆n, rup yang mă khan dôm tơdrong kiơ mă bơ̆n oei gơnang tơplih kơ gơnang kơ Kră Yang. Dah lăm chăl pơtao Jôsia, kơsô̆ lu rup yang, chơnang soi păng tơdrong kơkuh đei ‘măn lê̆ đơ̆ng chăl lu pơtao adrol sơ̆ lơ dêh, na mă dang ei lu rup yang păng tơdrong kơkuh oei lơ dêh. Rup yang kơ chăl dang ei tơ’bôh lơ rup yang phara. Noh lu tơdrong lui ngeh kư̆ kă, jên tơmam, tơdrong jang, kĕ jei, ‘lơ̆ng hơbŏ, dôm tơdrong kiơ bơ̆n lui, ba bơ̆n tơdrong chơt hiôk păng lăp kơ jơhngơ̆m bơ̆n tơplih kơ gơnang kơ Kră Yang. Noh thoi lĕ kơ điên thoăi, phim đe pơdah, lu tơdrong bơ̆n hơiă păng ‘măn lơ jơ kơ lu tơdrong ‘noh hloh kơ ‘măn kơ Kră Yang.v.v… Athei pơ’lơ̆ng yua kơ rup yang chăl ahrei lơ dêh păng bơ̆n ưh kơ ‘bôh păng măt wă pơhlŭ pơlung lu bơ̆n kơkuh kơ Kră Yang ưh kơ trŏ.
Apinh Kră Yang tơgŭm bơ̆n gơnang kơ Kră Yang na bơ̆n gơh tŭk lê̆ lu rup yang lăm chăl arih. Athei hŭt lê̆, teh pơrăm, pơchah, pơhĕch lê̆ lu rup yang lăm jơhngơ̆m wă kơ huay pă pơgơ̆r păng ưang lăm jơhngơ̆m bơ̆n.
Kơkuh kơ Ih Kră Yang, apinh Ih tơgŭm inh băt tơdrong kiơ wă jing lu rup yang lăm jơhngơ̆m inh păng chăl arih inh, apinh Ih dŏng pơklaih inh, păng apinh Ih tơgŭm inh đei jơhngơ̆m pran hŭt lê̆ lu sư hloi. Yua anăn Kră Yang Yêsu Krist, Amen.
Kră Yang ‘bôh bơ̆n oei đei rup yang ayơ kăl kơ hŭt lê̆?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 43
Kênh Youtube BHKTHN:
