Klei Aê Diê Blŭ: I Têsalônik 5:16-18
Êlan kliăng: “Dôk hơ̆k mơak nanao bĕ. Wah lač amâo mdei ôh. Bi mni bĕ kơ Aê Diê hlăm jih jang klei truh; kyuadah klei anăn jing klei Aê Diê čiăng diih ngă hlăm Krist Yêsu” (I Têsalônik 5:16-1801
Klei êmuh ksiêm mĭn: Si ai tiê Khua ƀĭng kna Y-Pôl mtô phung đăo Têsalônik brei hdĭp? Mơ̆ng ya klei dưi hdĭp snăn? Drei khăng bi mni kơ Khua Yang hlăm ya boh klei?
Khua ƀĭng kna Y-Pôl mtô phung đăo ti Sang Aê Diê Têsalônik brei răng kriê ai tiê hơ̆k mơak nanao, mâo klei êpa hmao bi mguôp hŏng Khua Yang amâo mdei, leh anăn hlăm djăp boh klei brei bi mni nanao kơ Khua Yang, kyua thâo săng klei Aê Diê čiăng hlăm Khua Yang Yêsu Krist hŏng grăp čô jing msĕ snăn.
Phung đăo ăt tuôm hŏng klei rŭng răng, ênguôt hnĭng, ƀiădah Khua ƀĭng kna Y-Pôl mtô brei hơ̆k mơak nanao kyua klei mơak tinei jing klei mơak mơ̆ng dlông, boh mơ̆ng Yang Mngăt Jăk (Galati 5:22; Rôm 14:17). Hlăm djăp boh klei dleh dlan, anak mnuih kđeh asăr drei amâo dưi ñĕ ôh kơ klei ênguôt hnĭng ƀiădah phung đăo dưi găn jih klei mâo êjai čiăng tŭ mă klei hơ̆k mơak nanao kyua đăo kjăp hlăm klei dưi Aê Diê kiă kriê hlăm klei hdĭp drei.
Phung đăo hơ̆k mơak nanao ăt jing phung hdĭp hŏng ai tiê wah lač amâo mdei. Tơdah hdĭp nanao hŏng ai tiê wah lač snăn djăp klei rŭng răng ênguôt hnĭng srăng myơr jih kơ Khua Yang jing Pô kriê dlăng phung anak Ñu nanao (I Y-Pêtrôs 5:7), mơ̆ng anăn drei lŏ dơ̆ng hdĭp hlăm ai tiê hơ̆k mơak nanao.
Phung đăo jing phung hdĭp thâo hdơr knga. Khua ƀĭng kna Y-Pôl brei thâo knuih phung amâo đăo jing hdĭp amâo hdơr knga, “Kyuadah wăt tơdah diñu thâo kral leh Aê Diê, diñu amâo mpŭ kơ gơ̆ jing Aê Diê ôh, kăn bi mni kơ gơ̆ rei; ƀiădah diñu wơr luč hlăm klei mĭn hơăi mang, leh anăn ai tiê mluk diñu bŏ hŏng klei mmăt” (Rôm 1:21). Ƀiădah klei êdah êdi hlăm klei hdĭp phung anak Aê Diê sĭt jing hơ̆k mơak nanao leh anăn bi mni kơ Khua Yang hlăm djăp boh klei, amâo djŏ knŏng hơ̆k mơak leh anăn bi mni hlăm klei găl amâodah hŏng klei jăk dưi mâo. Ai tiê anei dưi mâo kyua đăo knang kluôm dhuôm hlăm klei khăp leh anăn klei kriê dlăng jăk mơak mơ̆ng Khua Yang hlăm klei hdĭp, snăn drei thâo wăt tơdah mâo klei amâo msĕ si klei drei pô čiăng ôh, jing kyua klei kƀah drei thâo ƀuh, ƀiădah Khua Yang khăp hơiêng brei nanao kơ drei klei jăk hĭn, tŭ dưn hĭn kơ phung anak Ñu. Kyua anăn brei drei gĭr tui hriăm klei Khua Yang čiăng, hdră kñăm lă lar Ñu brei kơ drei čiăng dưi bi mni Ñu hlăm djăp boh klei.
Klah čŭn, klei Aê Diê čiăng hlăm Khua Yang Yêsu Krist kơ grăp čô drei jing brei hdĭp hlăm klei hơ̆k mơak nanao, wah lač amâo mdei leh anăn bi mni kơ Khua Yang hlăm djăp boh klei. Tơdah drei gưt kơ klei Aê Diê čiăng, Ñu srăng brei klei hơêč hmưi, mă bruă hlăm ai tiê drei čiăng kơ drei mâo klei čiăng leh anăn hluê ngă hlue si klei Ñu čiăng (Philip 2:13).
Drei knang kơ Khua Yang leh anăn bi mni kơ Ñu hlăm klei rŭng răng mơ̆?
Wah lač: Ơ Aê Diê! Bi mni kơ Ih kyua Ih đru kâo đăo kjăp hlăm djăp klei truh hŏng kâo dôk hlăm klei Ih kiă kriê čiăng kâo hơ̆k mơak nanao, êpa mhao wah lač hŏng Ih leh anăn hdĭp hdơr knga kơ Ih grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
