1 Thexalaunikes 5:16-18
Nqe cim:
“Nej yuav tsum niaj hnub zoo siab. Nej yuav tsum thov Vajtswv tsis tseg tsis tu. Txawm yog nej raug kev txomnyem thiab tau zoo los nej yuav tsum ua Vajtswv tsaug. Vajtswv xav kom nej txhua tus uas nrog Yexus Khetos koom ib txojsia lawm ua tej no” (1 Thexalaunikes 5:16-18).
Lus nug rau sawvdaws xav:
– Timthawj Paulus qhia cov ntseeg hauv Thexalaunikes cheemtsum ua neej muaj lub siab li cas?
– Los ntawm qhov twg thiaj yuav ua tau lub neej li ntawd?
– Peb pheej ua Vajtswv tsaug rau tej lub sijhawm twg?
Timthawj Paulus qhia cov ntseeg hauv Thexalaunikes yuavtsum ceev kom muaj kev zoo siab mus li, muaj lub siab ntshaw thov Vajtswv tsis tu thiab yuavtsum paub ua Vajtswv tsaug txhua lub sijhawm. Cov uas yog Vajtswv menyuam lawm Vajtswv xav kom peb txhua tus paub ua li ntawd.
Cov ntseeg yeej khiav tsis dhau tej kev txomnyem, nyuaj siab, tiamsis timthawj Paulus qhia hais tias yuavtsum zoo siab mus li, vim txoj kev zoo siab no yog txoj kev zoo siab saum ntuj los, yog Vaj Ntsujplig cov txiv (Kalatias 5:22; Loos 14:17). Hauv lub sijhawm muaj kev txomnyem, peb tseem yog neeg nqaij tawv yeej khiav tsis dim txoj kev nyuaj siab, tiamsis cov ntseeg nyob taus dhau tej lub sijhawm muaj kev nyuaj siab ib pliag li no los mus txais txoj kev zoo siab nyob ib txhis, vim peb ntseeg ruaj hais tias Vajtswv tswj rawv txhua yam hauv peb lub neej.
Cov ntseeg uas muaj kev zoo siab mus li kuj yog cov uas muaj lub siab thov Vajtswv tsis tseg tsis tu. Thaum ua neej muaj lub siab thov Vajtswv tsis tu ces tej kev nyuaj siab, kev txhawj yuav muab tso plhuav rau Vajtswv tus uas niaj hnub tu thiab yug Nws cov menyuam (I Petus 5:7), los ntawm qhov ntawd peb yuav rov ua neej muaj kev zoo siab mus li.
Cov ntseeg yog cov neeg uas ua neej paub ua Vajtswv tsaug. Tim thawj Paulus qhia hais tias tibneeg lub siab ib txwm tsis ntseeg thiab ua neej yeej tsis paub ua Vajtswv tsaug, “Txawm yog lawv twb paub Vajtswv lawm, los lawv tseem tsis hwm Vajtswv lossis tsis ua nws tsaug, lawv xav txog tej zaj uas tsis muaj qabhau, vim lawv lub siab ruam thiab tsaus ntuj nti” (Loos 1:21). Tiamsis qhov zoo uas pom muaj nyob ntawm Vajtswv cov menyuam tseeb yog pheej muaj kev zoo siab mus li thiab paub ua Vajtswv tsaug rau txhua lub sijhawm, txawm yog yuav muaj kev txomnyem tau zoo los xij. Qhov uas muaj lub siab li no yog los ntawm qhov uas peb tso siab plhuav rau Vajtswv txoj kev hlub, txoj kev tu, kev yug zoo kawg nkaus nyob hauv peb lub neej, yog li ntawd paub hais tias muaj tej yam yuav tsis zoo li peb siab xav, lossis yog los ntawm qhov uas peb pom nqaim nqaim xwb, tiamsis peb tus Tswv yeej ib txwm muab yam uas zoo tshaj plaws thiab muaj nqis tshaj plaws rau Nws cov menyuam. Vim li ntawd, peb yuavtsum ua siab ntev kawm paub Vajtswv lub siab nyiam, thiab qhov uas Nws npaj rau peb yuav nyob mus ib txhis kom peb paub ua Nws tsaug rau txhua lub sijhawm.
Yog li ntawd, Vajtswv lub siab nyiam hauv Tswv Yexus rau peb txhua tus yog yuavtsum ua neej muaj kev zoo siab mus li, muaj lub siab thov Vajtswv tsis tseg tsis tu thiab yuavtsum paub ua Vajtswv tsaug txhua lub sijhawm. Thaum peb mloog Vajtswv lus lawm Vajtswv yuav pub koob hmoov rau peb xav ua Vajtswv tes haujlwm, thiab ua tau raws li Vajtswv lub siab nyiam (Filipis 2:13).
Thov Vajtswv,
Vajtswv, nyuam yaus ua Koj tsaug vim Koj pab nyuam yaus ua neej tso siab plhuav rau Vajtswv Koj txoj kev hlub, txoj kev tu, kev yug uas zoo kawg nkaus nyob hauv nyuam yaus lub neej. Thov pab nyuam ua neej muaj kev zoo siab mus li, muaj lub siab paub thov Vajtswv tsis tseg tsis tu thiab paub ua Vajtswv Koj tsaug rau hauv txhua lub sijhawm. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas vamkhom Vajtswv thiab uas Nws tsaug rau txhua lub sijhawm uas muaj kev txomnyem?
Nyeem Vajluskub hauv peb lub xyoos: Mathais 23
Kênh Youtube BHKTHN:
