Klei Aê Diê Blŭ: Y-Êsai 53:1-6
Êlan kliăng: “Ƀiădah arăng bi êka Ñu leh kyua klei drei gao klei bhiăn, bi brăm mčah Ñu leh kyua klei wê drei; klei bi kmhal lĕ ti Ñu brei klei suaih kơ drei, leh anăn kyua klei êka Ñu drei hlao leh.” (Y-Êsai 53:5)
Klei êmuh ksiêm mĭn: Khua pô hưn êlâo Y-Êsai hưn leh êlâo, hlei pô pơ̆ng leh msei kđĭn Khua Yang Yêsu? Si drei dôk pơ̆ng msei kđĭn Khua Yang? Ya mta klei drei ƀuăn hŏng Khua Yang hlăm yan bi hdơr klei Khua Yang tŭ Klei Knap Mñai?
Hlăk leh Y-Yuđas Iskariôt lhiăr kơ Khua Yang, phung kahan Rôm mă ba jao Khua Yang ti sang phat kđi phung knơ̆ng khua kiă kriê klei đăo Israel leh anăn mbĭt hŏng phung knŭk kna, ti knhal tuč tŭ klei kpĭ ktư̆ mơ̆ng phung Israel, khua čar Y-Pilat phat kđi brei arăng čăm leh anăn pơ̆ng msei kđĭn Khua Yang Yêsu. Jih jang hdruôm hră Klei Mrâo Mrang Jăk čih sơăi klei phung ƀuôn sang yua klei dưi kđi čar mgô̆ khua čar Y-Pilat brei mtrŭn klei dưi pơ̆ng msei kđĭn Khua Yang. Ƀiădah lĕ, êbeh kơ kjuh êtuh thŭn êlâo kơnăn, khua pô hưn êlâo Y-Êsai hưn leh klei Aê Diê lač snei: “Ƀiădah arăng bi êka Ñu leh kyua klei drei gao klei bhiăn, bi brăm mčah Ñu leh kyua klei wê drei; klei bi kmhal lĕ ti Ñu brei klei suaih kơ drei, leh anăn kyua klei êka Ñu drei hlao leh.” (êlan 5).
Grăp čô pô đăo kơ Krist brei thâo săng klă amâo djŏ knŏng phung kahan Rôm, knŭk kna Rôm amâodah phung knơ̆ng khua kiă kriê klei đăo phung Israel ôh pơ̆ng msei kđĭn Khua Yang, đăm mâo ôh pô bi lĕ jih klei soh kơ diñu. Jih jang phung lhiăr kơ Khua Yang, hƀuê ênuk, phung knơ̆ng khua kiă kriê klei đăo, phung knŭk kna Rôm… jih jang diñu dôk ti gŭ klei kiă kriê Aê Diê sơăi čiăng bi leh hdră bi mtlaih phung mnuih. Klei yuôm jing brei grăp čô drei kkui kŏ blŭ hŏng Khua Yang snei, kâo pô yơh pơ̆ng leh msei kđĭn Khua Yang Yêsu! Jih jang drei jing phung mnuih soh năng djiê, leh anăn kyua klei soh drei yơh jing phŭn knhal kơ Khua Yang Yêsu, Pô amâo tuôm soh tŭ klei arăng pơ̆ng msei kđĭn. Klei jhat ƀai, klei mgao, klei čuôt klih, klei drei kƀah klei khăp yơh jing msei kđĭn pơ̆ng asei mlei Khua Yang. Ai tiê khăng, amâo mâo klei đăo, amâo gưt asăp, klei hdĭp ai ngăm phung drei yơh, jing asăp ur “Pơ̆ng ñu ti kyâo bi kal! Pơ̆ng ñu ti kyâo bi kal!” (Y-Yôhan 19:6). Tơdah amâo thâo săng ôh klei anei, brei drei răng huĭdah lŏ pơ̆ng msei kđĭn Khua Yang thiăm sa blư̆ dơ̆ng!
Hlăm yan bi hdơr Khua Yang Yêsu tŭ klei Knap Mñai, akâo kơ Khua Yang brei drei kkui kŏ ti gŭ jơ̆ng kyâo bi kal Khua Yang, hưn klei soh drei, kmhal jih klei soh drei, bi êdah klei hdơr knga bi mni kơ Khua Yang, kyua Ñu tŭ leh klei djiê čiăng klam brei jih klei soh drei. Amâo djŏ knŏng dŭm anăn ôh, Khua Yang wăt “tŭ klei bi kmhal” čiăng kơ drei dưi mâo klei bi grăng hŏng Aê Diê, dưi dưn klei êđăp ênang kluôm dhuôm hlăm ai tiê. “Kyua klei êka” Khua Yang tŭ čiăng bi hlao mngăt ai tiê drei, kyua hŏng klei anăn drei dưi nao giăm blŭ hrăm sĭt suôr hŏng Aê Diê, “Ơ Ama hmei dôk hlăm adiê ơi”! Sĭt nik amâo mâo klei jăk mơak mkăn dưi mkă ôh. Akâo Khua Yang brei drei bi hdơr klei Khua Yang tŭ Klei Knap Mñai hŏng ai tiê hdơr knga kơ Ñu.
Si ngă drei thâo kral mơ̆ drei pô yơh pơ̆ng leh msei kđĭn Khua Yang kyua hŏng klei drei hdĭp soh wê?
Wah lač: Ơ Khua Yang Yêsu, kâo čuôn kơŭt ti anăp kyâo bi kal Ih, ai tiê bŏ hŏng klei hêñ kyuadah kâo pô yơh hŏng klei awăt êdu, čuôt klih, leh anăn klei soh, pơ̆ng leh msei kđĭn Khua Yang, ngă kơ Khua Yang ruă ênguôt kyua kâo. Akâo Khua Yang pap brei kơ kâo, kâo čuăn amâo lŏ pơ̆ng msei kđĭn Khua Yang thiăm ôh. Akâo Khua Yang đru kâo dôk hdĭp năng hŏng klei khăp Khua Yang săn asei mlei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
