Yaxayas 53:1-6
Nqe cim:
“Twb yog vim peb tej kev txhaum nws thiaj raug ntaus nqaij ntuag ntshav nrog, twb yog vim tej kev phem uas peb ua, nws thiaj raug nplawm. Qhov uas nws raug txim txomnyem ntsuav, yog pab kom peb tau nyob kaj siab lug, nws raug nplawm twb yog kho kom peb tej kev mob kev nkeeg zoo.” (Yaxayas 53:5)
Lus nug xav:
– Tus Cevlus Yaxayas tau tshajtawm zaj lus qhia hais tias leejtwg yog tus muab Tswv Yexus ntsia rau saum ntoo khaublig?
– Peb tabtom ntsia tus Tswv rau saum tus ntoo khaublig li cas?
– Peb coglus licas rau tus Tswv hauv lub caij nco txog tus Tswv Txomnyem xyoo no?
Tomqab uas Yudas Ixakhali-us ntxeev siab rau Tswv Yexus, cov tubrog Loos tau coj tus Tswv mus rau tej tsev hais plaub hauv sab kev ntseeg thiab hauv tseemfwv, thaum kawg raws li cov neeg Yudais kev xaiv, tus tswvxeev Philaj thiaj li txiav txim muab Tswv Yexus nplawm thiab ntsia rau saum tus ntoo khaublig. Cov phau Moo Zoo tau sau tseg hais tias cov pejxeem tau hem thiab yuam kom tus tswvxeev Philaj yuav tsum muab Tswv Yexus ntsia rau saum tus ntoo khaublig, thiab cov tubrog Loos thiaj li ua raws li tau samhwm. Tiamsis, ntau tshaj xya puas xyoo ua ntej, tus Cevlus Yaxayas twb tshajtawm Vajtswv zaj lus hais tias: “Twb yog vim peb tej kev txhaum nws thiaj raug ntaus nqaij ntuag ntshav nrog, twb yog vim tej kev phem uas peb ua, nws thiaj raug nplawm. Qhov uas nws raug txim txomnyem ntsuav, yog pab kom peb tau nyob kaj siab lug, nws raug nplawm twb yog kho kom peb tej kev mob kev nkeeg zoo” (nqe 5).
Txhua tus ntseeg yuav tsum zeem paub meej hais tias tsis yog tsuas yog cov tubrog Loos, tseemfwv Loos lossis cov thawjcoj Yudais ntsia tus Tswv rau saum tus ntoo khaublig xwb, txhob muaj leejtwg muab txhua lub txim tso rau lawv ris. Tus neeg ntxeev siab rau tus Tswv, keebkwm, pawg ntseeg, tseemfwv Loos… tagnrho puavleej nyob hauv Vajtswv txojkev tswjhwm kom ua tiav Vajtswv lub homphiaj cawm tibneeg dim. Qhov tseemceeb yog peb txhua tus yuav tsum nyo hau thov tus Tswv hais tias: Kuv yog tus ntsia Tswv Yexus rau saum tus ntoo khaublig! Peb txhua tus puavleej yog cov neeg txhaum uas tsimnyog tuag, thiab peb tej kev txhaum yog keebtiv ua rau Tswv Yexus, tus uas tsis muaj txim, raug ntsia rau saum tus ntoo khaublig. Peb lub siab tawv, lub siab tsis ntseeg, tsis mloog lus thiab txojkev limhiam yog tej ntsia hlau uas ntsia rau tus Tswv lub cev. Nplooj siab tsis quavntsej, tsis ntseeg, tsis mloog lus, thiab nplooj siab cuav ntawm peb yog lub suab qw nrov nrov hais tias “Muab nws ntsia rau saum ntoo khaublig! Muab nws ntsia rau saum ntoo khaublig!” (Yauhas 19:6). Yog hais tias tsis zeem paub li no, ceevfaj nyob tsam peb rov ntsia tus Tswv rau saum tus ntoo khaublig ib zaug ntxiv!
Nyob hauv lub caij nco txog Tswv Yexus Txomnyem, thov tus Tswv pab kom peb nyo hau rau ntawm Nws tus ntoo khaublig, lees txim, hloov siab tsis tig rov mus ua tej yam yuamkev, thiab qhia tshwm nplooj siab ua tus Tswv tsaug vim Nws tau txaus siab tuag txhiv tagnrho peb tej kev txhaum. Tsis tas li ntawd xwb, tus Tswv tseem “raug txim txomnyem ntsuav” kom peb tau kev sib raug zoo nrog Vajtswv, thiab tau nyob kaj siab lug. Tus Tswv “raug nplawm” yog kho peb tej kev mob sab ntsujplig kom zoo, los ntawm qhov ntawd peb thiaj muaj cuab kav hu Vajtswv hais tias, “Peb Leej Txiv tus uas nyob saum Ntuj Ceeb Tsheej”! Tsis muaj koobmoov twg yuav loj tshaj li qhov no. Thov tus Tswv pab kom peb nco txog tus Tswv Txomnyem los ntawm nplooj siab ua Nws tsaug kawg siab kawg ntsws.
Thov Vajtswv,
Tswv Yexus, nyuam yaus txhos caug ntawm Koj tus ntoo khaublig, nyuam yaus txajmuag kawg nkaus vim yog nyuam yaus tej kev qaug zog, qiadub, thiab kev txhaum,… thiaj ua rau Koj raug ntsia rau saum tus ntoo khaublig, ua rau Koj tu siab rau nyuam yaus. Thov zam txim rau nyuam yaus, thov pab kom nyuam yaus txiav txim siab yuav tsis ntsia Koj rau saum tus ntoo khaublig ib zaug ntxiv. Thov pab nyuam yaus ua lubneej tsimnyog rau Koj txojkev hlub uas tuag txhiv. Nyuam yaus tuav Tswv Yexus Khetos lub npe thov, Amees.
Peb puas zeem paub hais tias peb tau muab Tswv Yexus ntsia rau saum tus ntoo khaublig dhau ntawm peb txojkev ua neej yuamkev lawm tau?
Nyeem Vajluskub hauv peb lub xyoos: Exekees 35
Kênh Youtube BHKTHN:
