Klei Aê Diê Blŭ: Y‑Markôs 1:32-35
Êlan kliăng: “Aguah ưm, adiê adôk mmăt, Yêsu kgŭ leh anăn kbiă nao kơ anôk hjăn, leh anăn Ñu wah lač tinăn” (Y‑Markôs 1:35)
Klei êmuh ksiêm mĭn: Si sa hruê Khua Yang Yêsu găn leh? Ya ngă Khua Yang nao hlăm anôk kriêp hjăn êjai aguah ưm? Ti anôk kriêp hjăn drei?
Trăn Klei Aê Diê Blŭ anei brei ƀuh Khua Yang Yêsu găn leh sa hruê dlông suăi êmăn hlăm bruă Ñu ti ƀuôn Kapernum. Truh tlam mmăt ruê̆ leh hruê Sabat, lu snăk mnuih ruă leh anăn mnuih yang jhat ngă nao kơ Ñu tơl Y‑Markôs lač, “jih jang mnuih hlăm ƀuôn anăn bi kƀĭn ti anăp ƀăng bhă”. Ñu pioh leh mmông bi hlao lu mnuih ruă leh anăn suôt lu yang jhat.
Ti krah lu klei gŭn kpăk leh anăn êgah êmăn, Khua Yang Yêsu ăt êlâo hĭn pioh mmông kriêp hjăn nao kơ Aê Diê Ama. Wăt tơdah jing Anak Aê Diê ƀiădah êjai jing mnuih, Khua Yang “toh hĕ klei anăn, leh anăn tŭ klei jing sa čô dĭng buăl, brei arăng kkiêng kơ Ñu jing mnuih.” (Philip 2:7). Hlăm asei mlei mnuih, Khua Yang čiăng snăk mâo thiăm ai ktang mơ̆ng Aê Diê Ama, Pô tiŏ nao Ñu hriê ti lăn ala. Kyuanăn wăt tơdah asei mlei êgah êmăn snăk dưn, aguah ưm hruê mgi êjai adiê adôk mmăt Khua Yang kgŭ leh, nao hlăm anôk kriêp hjăn čiăng wah lač. Khua Yang Yêsu pioh êlâo hĭn mmông tal êlâo hlăm hruê čiăng nao kơ Ama. Hlăm anôk kriêp hjăn anăn yơh, Khua Yang mâo mmông êđăp ênang kriêp ñăt čiăng bi mguôp hŏng Ama Ñu. Khua Yang ruah anôk kriêp hjăn čiăng bi ktlah hŏng klei ngañ bañ hao hao, kpăk gun hŏng bruă knuă leh anăn anak mnuih, čiăng dôk hjăn păn blŭ hrăm hŏng Ama. Dŭm boh blŭ lač kơ bruă ngă hlăm êlan 35, “kgŭ”, “kbiă nao”, “mŭt hlăm”, “wah lač” brei ƀuh leh, Khua Yang drei yap yuôm snăk kơ mmông pioh wah lač. Wăt tơdah asei mlei kđeh êgah êmăn čiăng pĭt snăk dưn mơh, ƀiădah mơ̆ng aguah ưm Khua Yang kgŭ leh, kbiă mơ̆ng jhưng, nao êlâo hlăm anôk kriêp hjăn čiăng bi mguôp hŏng Ama. Ti anôk kriêp hjăn anăn, Khua Yang Yêsu dôk hjăn păn čiăng myơr kơ Ama klei wah lač. Anôk anăn amâo mâo bi kpăk Ñu ôh, amâo mâo phung lu kpĭ kpiêt ôh, kăn kpăk gun hŏng bruă knuă leh anăn hŏng klei mnuih mkăn čiăng rei. Hlăm anôk anăn yơh, Khua Yang lŏ mâo klei ktang mrâo leh sa hruê mă bruă suăi êmăn. Leh anăn ti anôk anăn mơh, lŏ thiăm ai ktang kơ Ñu čiăng ngă bi leh klei Aê Diê Ama čiăng.
Klei hdĭp hlăm ala ƀuôn ênuk anei ngă kơ klei tluh čiăng anak mnuih đĭ nanao, klei hdĭp mñik mñak gun kpăk ngă kơ lu mnuih ƀuh amâo lŏ djăp hruê mmông bi leh bruă knuă ôh. Ƀiădah lĕ, tui klei bi hmô mơ̆ng Khua Yang Yêsu, grăp čô drei brei êlâo hĭn pioh mmông bi mguôp hŏng Khua Yang ti “anôk kriêp hjăn” čiăng dưi mă tŭ klei ktang myang đru drei dôk hdĭp, mă bruă leh anăn mă bruă hŏng klei ktang myang Khua Yang. anôk kriêp hjăn hruê anei amâo guôn anôk amâo mâo mnuih dôk ôh, ƀiădah anôk amâo mâo bi kpăk gun drei, čiăng kơ drei dưi bi mguôp hŏng Khua Yang hjăn păn, knŏng hjăn Ñu hŏng drei.
Ti krah klei gun kpăk hlăm klei hdĭp, si ngă drei pioh mmông duah anôk kriêp hjăn čiăng dôk hjăn hŏng Khua Yang leh mơ̆?
Wah lač: Ơ Khua Yang, akâo Ih đru kâo thâo bi ktlah pô mơ̆ng klei gun kpăk leh anăn phung lu čiăng duah anôk kriêp hjăn bi mguôp hŏng Khua Yang. brei kâo hdơr nanao kâo čiăng klei ktang Ih brei čiăng dưi dôk hdĭp leh anăn mă bruă êjai jih hruê dôk ti lăn ala. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: Klei Bi Hriêng 16
Kênh Youtube BHKTHN:
