Malakaus 1:32-35
Nqe cim:
“Hnub tom qab thaum kaj ntug txoog, Yexus txawm sawv thiab tawm hauv tsev mus rau tom ib qhov chaw uas tsis muaj neeg thiab thov Vajtswv” (Malakaus 1:35)
Lus nug rau sawvdaws xav:
– Tswv Yexus ua haujlwm dhau ib hnub zoo li cas?
– Tswv Yexus mus rau qhov chaw ntsiag to thaum sawv ntxov kaj ntug txoog ua dab tsi?
– Peb qhov chaw ntsiag to nyob qhov twg?
Ntu Vajluskub no qhia pom hais tias Tswv Yexus ua haujlwm sab heev thaum dhau ib hnub hauv Nws lub luag haujlwm ntawm lub nroog Kapena-us. Thaum hnub poob qho yuav tsaus ntuj xaus rau hnub Xanpataus, muaj cov neeg muaj mob thiab raug dab coob coob tuaj cuag Yexus, txog qib uas Malakaus hais tias, “Tej neeg zejzog tuaj nyob nraum qhovrooj.” Tswv Yexus siv sijhawm los kho ntau tus neeg muaj mob thiab ntiab ntau tus dab tawm.
Maj ua ntau tes haujlwm thiab sab sab, los Tswv Yexus yeej tseg sijhawm ntsiag to mus cuag Leej Txiv. Txawm Nws yog Vajtswv Leej Tub los, “Nws zoo siab tso ib puas tsav yam tseg, Nws los yug ua neeg” (Filipis 2:7). Hauv lub cev yog tib neeg, Tswv Yexus cheemtsum Vajtswv tus uas txib Nws los ntxiv dag zog rau Nws. Vim li ntawd txawm lub cev yuav qaug zog, sab npaum li cas los thaum sawv ntxov tsis tau kaj ntug Tswv Yexus twb sawv thiab mus rau qhov chaw ntsiag to thov Vajtswv lawm. Tswv Yexus siv thawj lub sijhawm hnub ntawd mus cuag Leej Txiv. Hauv qhov chaw ntsiag to ntawd, Tswv Yexus muaj sijhawm ntsiag to sib txuas nrog Leej Txiv. Nws xaiv qhov chaw ntsiag to kom cais tawm ntawm tej suab nrov, kev tab kaum haujlwm thiab tibneeg, cia yus ib leeg nrog Leej Txiv sib tham. Cov lus qhia hauv nqe 35, “sawv”, “tawm”, “mus”, “thov Vajtswv” qhia pom hais tias peb tus Tswv Yexus saib lub sijhawm thov Vajtswv tseemceeb heev. Txawm hais tias lub cev sab sab cheemtsum pw heev, tiamsis sawv ntxov xwb Tswv Yexus twb sawv lawm, Nws tawm hauv txaj mus rau ib qho chaw ntsiag to sib txuas nrog Leej Txiv. Hauv qhov chaw ntawd Nws nyob ib leeg thov Vajtswv. Qhov chaw ntawd tsis muaj kev tab kaum, tsis muaj neeg coob, tsis muaj haujlwm thiab lwm tus neeg tej kev cheemtsum cuam tshuam. Hauv qhov chaw ntawd ntag, Tswv Yexus tau Vajtswv pub dag zog tshiab tom qab uas ua haujlwm sab sab ib hnub dhau lawm. Thiab qhov chaw ntawd, Tswv Yexus tau Vajtswv ntxiv dag zog kom ua tiav Leej Txiv lub siab nyiam.
Lub neej vammeej niaj hnub nim no ua rau tibneeg cheemtsum ntau yam, lub neej muaj ntau txoj haujlwm ua rau coob tus pom zoo li yus tsis muaj txaus sijhawm ua tiav yus cov haujlwm. Txawm li ntawd los, peb yuavtsum xyaum Tswv Yexus tus qauv, peb txhua tus yuavtsum tseg sijhawm thov Vajtswv ntawm ib “qhov chaw ntsiag to” kom tau Vajtswv ntxiv dag zog pab peb ua neej, ua haujlwm muaj Vajtswv lub hwjchim tiv thaiv. Qhov chaw ntsiag to niaj hnub nim no tsis cheemtsum qhov chaw uas tsis muaj tibneeg nyob, tiamsis ntawd yog qhov chaw uas tsis muaj leejtwg yws peb, tsis muaj ib yam dab tsi cuam tshuam peb kom peb thov Vajtswv ntsiag to, tsuas muaj Vajtswv thiab yus xwb.
Thov Vajtswv,
Tus Tswv, thov Koj pab kom nyuam yaus txawj nrhiav qhov chaw ntsiag to los nrog Koj sib txuas lus . Thov Koj pab kom nyuam yaus nco ntsoov los thov Koj kom tau lub zog los ua Koj haujlwm thaum tseem ua neej nyob hauv ntiajteb. Nyuam yaus tuav Yexus Khetos lub npe thov, Amees.
Hauv lub neej uas muaj kev tabkaum no, peb puas tseg lub sijhawm uas ntsiag to los thov Vajtswv?
Nyeem Vajluskub hauv peb lub xyoo: Pajlug 16
Kênh Youtube BHKTHN:
