Klei Aê Diê Blŭ: II Y‑Timôthê 3:16-17
Êlan kliăng: “Jih jang klei čih hlăm hdruôm hră Klei Aê Diê Blŭ kbiă hriê mơ̆ng klei Aê Diê ƀhur êwa, jing yuôm pioh mtô, ƀuah, mkra, leh anăn bi hriăm arăng klei kpă ênô.” (II Y‑Timôthê 3:16)
Klei êmuh ksiêm mĭn: Si jing klei ƀhur êwa? Ya klei tŭ dưn mâo mơ̆ng Klei Aê Diê Blŭ? Ya jing klei kñăm čiăng yuôm hĭn mơ̆ng Klei Aê Diê Blŭ? Ya klei brei drei ngă tơdah thâo kral leh Klei Aê Diê Blŭ jing Klei Blŭ mơ̆ng Aê Diê?
Boh blŭ “mtrang atăt” tui si klei blŭ phŭn jing klei Aê Diê ƀhur êwa. Wăt tơdah pô čih Klei Aê Diê Blŭ ksiêm dlăng hŏng klei răng jih boh klei mâo, msĕ si aê êa drao Y‑Luk (Y‑Luk 1:3); leh anăn wăt tơdah hdră êlan diñu čih mdê mdê, si tô hmô hdră êlan čih khua ƀĭng kna Y‑Pôl mdê hŏng Y‑Markôs, amâodah mdê hŏng aê êa drao Y‑Luk, ƀiădah Aê Diê mă bruă ti dlông pô čih čiăng kơ jih klei diñu čih bi êdah klă djŏ klei mĭn Khua Yang (II Y‑Pêtrôs 1:20-21). Kyuanăn Klei Aê Diê Blŭ pia jing Klei Blŭ mơ̆ng Aê Diê (I Têsalônik 2:13). Khua Yang Yêsu lač “Klei Ama Blŭ jing klei sĭt nik” (Y‑Yôhan 17:17), snăn Klei Aê Diê Blŭ jing năng mpŭ kluôm dhuôm, amâo djŏ knŏng hŏng hjăn tĭng kơ kdrêč klei hdĭp mngăt myang ôh ƀiădah djŏ wăt hŏng jih jang kdrêč hlăm klei hdĭp mơh.
Klei Aê Diê Blŭ khua ƀĭng kna hưn mdah hlăm êlan 16 lač kơ Klei Bi Mguôp Hđăp. Ƀiădah êlan anei ăt mă yua djŏ kơ Klei Bi Mguôp Mrâo mơh. Msĕ si, khua ƀĭng kna Y‑Pêtrôs pia kơ hră khua ƀĭng kna Y‑Pôl čih mơĭt jing Klei Aê Diê Blŭ (II Y‑Pêtrôs 3:15-16). Amâodah hlăm I Y‑Timôthê 5:18, khua ƀĭng kna Y‑Pôl pia kơ hră Klei Mrâo Mrang Jăk Y‑Luk jing Klei Aê Diê Blŭ (dlăng Y‑Luk 10:7).
Klei Aê Diê Blŭ jing mnơ̆ng ƀơ̆ng huă kơ klei hdĭp mngăt myang, ba lu klei tŭ dưn kơ phung anak Aê Diê. Klei Aê Diê Blŭ mtô drei êlan klei đăo sĭt nik kơ klei bi mtlaih leh anăn mtô ya klei jing djŏ ya klei jing soh hlăm klei hdĭp mngăt myang. Klei Aê Diê Blŭ ƀuah, mkra, ktrâo mdah jih ti anôk jing soh čhuai, êlan phung klei đăo soh. Klei Aê Diê Blŭ mkra bi hriăm, atăt gai mnuih wơr êlan lŏ wĭt kơ êlan djŏ, mtô hdră êlan lŏ wĭt kơ klei sĭt nik. Klei Aê Diê Blŭ bi hriăm kơ phung mnuih dôk hdĭp kpă ênô tui si klei Aê Diê čiăng, đru drei djă pioh knhuah hdĭp djŏ tui si hnơ̆ng Khua Yang čuăn. Klei Aê Diê Blŭ kñăm čiăng amâo knŏng đru kơ drei mâo klei thâo săng čiăng mâo klei bi mtlaih ƀiădah wăt čiăng đru kơ phung anak ƀuôn sang Aê Diê mprăp bi djăp, kluôm ênŭm, hmiêt mkăp dưi ngă djăp mta bruă jăk (II Y‑Timôthê 3:14-17). Boh blŭ “mnuih Aê Diê” yua lu blư̆ hlăm Klei Bi Mguôp Hđăp čiăng lač kơ mnuih pioh kăp hưn Klei Blŭ mơ̆ng Aê Diê msĕ si Y‑Môis (Klei Mtô Mñă Klei Bhiăn 33:1), phung khua pô hưn êlâo Y‑Samuel, Y‑Êli, Y‑Êlisê,… Boh blŭ anei hlăm êlan 17 čiăng lač kơ Y‑Timôthê (I Y‑Timôthê 6:11) jing mnuih mtô mblang Klei Aê Diê Blŭ. Hruê anei tơdah đăo kơ Khua Yang Yêsu, grăp čô drei Khua Yang yap jing mnuih Aê Diê sơăi. Kyuanăn boh blŭ anei dưi yua tui si klei mblang kluôm čiăng lač kơ jih jang drei jing phung anak Aê Diê sĭt.
Thâo kral Klei Aê Diê Blŭ jing Klei Blŭ mơ̆ng Aê Diê jing klei jăk ƀiădah ka djăp ôh, Khua Yang čiăng drei pioh mmông hriăm Klei Aê Diê Blŭ, čiăng kơ Klei Aê Diê Blŭ ƀuah, mkra, bi hriăm drei dưi jing klă mâo klei mprăp dưi ngă djăp mta bruă jăk.
Si hdră drei mkra sĭt êmĭt čiăng pioh hriăm Klei Aê Diê Blŭ?
Wal lač: Bi mni kơ Khua Yang kyuadah mơ̆ng Klei Aê Diê Blŭ yơh kâo dưi thâo săng leh anăn jum Khua Yang Yêsu jing Pô Bi Mtlaih klei hdĭp kâo. Akâo kơ Yang Mngăt Jăk đru kâo sĭt suôr hriăm Klei Aê Diê Blŭ leh anăn mguôp kdrêč ngă bruă jăk Khua Yang mprăp brei leh kơ kâo.
Dlăng Klei Aê Diê Blŭ hlăm tlâo thŭn: Y‑Yêrêmi 51:11-32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
