II Timautes 3:16-17
Nqe cim.
“Vajtswv Txojlus txhua zaj puavleej yog Vajtswv tshoov neeg lub siab kom neeg sau. Vajtswv Txojlus yog txoj uas qhia qhov tseeb, qhuab ntuas tus uas ua txhaum, pab tau tus uas ua yuam kev, thiab qhia kom sawvdaws paub ua lub neej ncaj ncees.” (II Timautes 3: 16).
Lus nug rau sawvdaws xav:
- Tshoov siab yog licas?
- Vajluskub muaj nqis dabtsi?
- Lub homphiaj kawg ntawm Vajluskub yog dabtsi?
- Peb yuav tsum ua licas thaum paub hais tias Vajluskub yog Vajtswv Txojlus?
Lo lus “tshoov siab” raws li hauv paus lus, ces yog hais txog tus Tswv kev tshuab pa. Txawm yog cov neeg sau Vajluskub tshawb nrhiav tej xwmtxheej xyuamxim heev, xws li kws tshuaj Lukas (Lukas 1:3); thiab txawm yog lawv nyias txawj sau nyias lawm ib yam, xws li Paulus sau txawv Malakaus lossis Lukas, los Vajtswv yeej ua haujlwm rau tus neeg sau, kom tej lus uas lawv sau yog mus raws li tus Tswv lub siab nyiam (II Petus 1:20-21). Vim li ntawd, Phau Vajluskub thiaj tau hu ua Vajtswv Txojlus (I Thexalaunikes 2:13). Tswv Yexus hais rau Leej Txiv hais tias: “Koj Txojlus yog lus tseeb” (Yauhas 17:17), yog li ntawd Vajluskub txaus ntseeg kawg li, tsis yog tsuas haum rau sab ntsujplig xwb tiamsis kuj haum kev ua neej txhua sab thiab.
Vajtswv Txojlus uas Timthawj Paulus hais txog nyob hauv nqe 16 yog hais txog Phau Vajluskub Qub. Tiamsis nqe no muab siv los hais txog Phau Vajluskub Tshiab los yeej yog huv tibsi. Pivtxwv li Timthawj Petus muab tej tsab ntawv uas Timthawj Paulus sau hu ua Vajtswv Txojlus (II Petus 3:15-16). Lossis nyob rau hauv I Timautes 5:18, Timthawj Paulus muab Phau Txojmoo Zoo uas Lukas sau hu ua Vajtswv Txojlus (saib ntxiv hauv Lukas 10:7).
Vajluskub yog tej zaub mov sab ntsujplig, muaj nqis heev rau tus Tswv cov menyuam. Vajluskub qhia rau peb qhov tseeb txog txojkev cawmdim thiab qhia rau peb paub yam twg yog yam twg txhaum nyob sab ntsujplig. Vajluskub taw qhia, nthuav tej kev txhaum, tej lus qhia cuav tawm. Vajluskub qhuab ntuas, pab tus neeg yuamkev rov los ua neeg zoo, taw kev rov los cuag qhov tseeb. Vajluskub cob qhia tibneeg ua neej ncaj ncees raws li tus Tswv lub siab nyiam, pab peb ceev lub neej raws li Vajtswv Txojlus. Lub homphiaj ntawm Vajluskub tsis yog tsuas pab peb muaj tswvyim kom tau cawmdim xwb, tseem pab tus Tswv cov menyuam paub txhij, paub txhua, txawj ua txhua yam haujlwm zoo (II Timautes 3:14-17). Lo lus “tus uas ua Vajtswv txoj haujlwm” lossis “tus Tswv tus neeg” tau siv ntau zaug hauv Phau Vajluskub Qub hais txog cov neeg tau Vajtswv siv los cev Nws tej lus xws li Mauxes (II Kevcai 33:1), cov cevlus xws li Xamuyees, Eliyas, Elisas… Lo lus hais hauv nqe 17 no yog hais txog Timautes (I Timautes 6:11) yog tus qhia Vajtswv Txojlus. Niaj hnub nimno, thaum ntseeg Tswv Yexus lawm, peb txhua tus puavleej yog Vajtswv tus neeg. Yog li ntawd lo lus no siv hais dav yog hais txog peb txhua tus puavleej yog Vajtswv cov menyuam uas tseeb.
Paub tseeb hais tias Vajluskub yog Vajtswv Txojlus ces yeej zoo lawm tiamsis tsis tau txaus, tus Tswv xav kom peb siv sijhawm los kawm Vajtswv Txojlus peb thiaj tau qhuab qhia, cob qhia, qhuab ntuas, kom ua tau neeg paub txhij, txawj ua txhua yam haujlwm zoo pub rau tus Tswv.
Thov Vajtswv,
Tus Tswv, nyuam yaus ua koj tsaug vim los ntawm Phau Vajluskub nyuam yaus thiaj paub thiab ntseeg Tswv Yexus, lees Nws ua nyuam yaus tus Tswv Cawmseej. Thov Vaj Ntsujplig pab nyuam yaus ncaj ncees rau kev kawm Koj Txojlus thiab koom tes ua tej haujlwm zoo uas Koj npaj rau nyuam yaus. Amees.
Peb kev npaj kawm Vajtswv Txojlus zoo licas lawm?
Nyeem Vajluskub hauv peb lub xyoos: Yelemis 51:11-32
Kênh Youtube BHKTHN:
