Klei Aê Diê Blŭ: Philip 2:1-4
Êlan kliăng: “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô.” (Philip 2:3)
Klei êmuh ksiêm mĭn: Ya mta klei brei kơ Khua ƀĭng kna Y-Pôl hơ̆k mơak kluôm ênŭm? Ya mta tur ñu mtô phung ƀuôn sang Aê Diê ti ƀuôn Philip čiăng mâo klei sa ai hlăm Phung Sang Aê Diê? Hŏng si ai tiê klei mĭn brei drei hdĭp leh anăn mă bruă čiăng kơ Phung Sang Aê Diê mâo klei sa ai leh anăn tlaih kơ klei amâo thâo bi djŏ?
Khua ƀĭng kna Y-Pôl yap yuôm leh anăn hơ̆k mơak kơ Phung Sang Aê Diê Philip kyua klei hdĭp mngăt diñu đĭ kyar (Philip 1:3-5), ƀiădah Phung Sang Aê Diê hlăk dôk kƀah klei bi mguôp sa ai mơh. Ti knhal tuč hră čih mơĭt, ñu mñă kơ klei amâo thâo bi djŏ ktang tĭt ti krah dua čô mniê H’Êwôdi leh anăn H’Sintič. Ñu lač tơdah Phung Sang Aê Diê lŏ mâo klei mguôp sa ai, klei anăn yơh tloh ênoh, brei kơ ñu “hơ̆k mơak kluôm ênŭm”. Klei bi mguôp sa ai jing sa klei bi knăl kơ Phung Sang Aê Diê ktang kjăp leh anăn jing klei Khua Yang Yêsu čiăng, hlăk Ñu mñă wĭt mñă nao kơ klei bi mguôp sa ai hlăm klei wah lač êlâo kơ bi leh bruă jao bi mtlaih phung mnuih (Y-Yôhan 17:20-23).
Hlăm trăn Klei Aê Diê Blŭ anei, Khua ƀĭng kna Y-Pôl brei ƀuh tur čiăng mâo klei bi mguôp sa ai hlăm Phung Sang Aê Diê, êlâo hĭn jing “klei khăp”. Hlue anăn, ñu mtô hdră êlan dôk hdĭp čiăng tlaih kơ klei amâo thâo bi djŏ, jing “Đăm ngă ôh sa mta klei hŏng klei mĭn kơ pô amâodah hŏng klei mgao” ƀiădah hŏng klei luă gŭ, yap phung mkăn jing prŏng hĭn drei pô; đăm mĭn kơ klei tŭ dưn knŏng kơ pô ôh ƀiădah mĭn wăt kơ klei tŭ dưn kơ phung mkăn msĕ mơh. “Klei mĭn kơ pô” jing klei mĭn nač amâo čiăng ôh arăng kdlưn hĭn kơ pô, duah êlan lăm lui bi luč hĕ klei kdlưn hĭn kơ pô. “Klei mgao” hlăm klei blŭ Grĕk mguôp mơ̆ng dua boh blŭ mblang jing “hing ang” leh anăn “êhŏng kdŏng”. Mnuih mă bruă kơ Aê Diê “hŏng klei mĭn kơ pô amâodah hŏng klei mgao”, yap klei mĭn pô yơh djŏ hĭn nanao, leh anăn khăp duah klei hing ang hơăi mang leh anăn bi mđĭ mpŭ kơ hjăn pô yơh. Klei anei yơh jing phŭn knhal ba truh klei amâo thâo bi djŏ leh anăn bi kah phung hlăm Phung Sang Aê Diê. Klă nik msĕ si Phung Sang Aê Diê Kôrantô bi kah phung, bi mneh msao kyuadah mâo phung mĭndah diñu yơh kdlưn hĭn kơ pô mkăn (I Kôrantô 1:10-13).
“Yap phung mkăn jing prŏng hĭn kơ diih pô” jing knuih sa čô đĭ hriê kơ prŏng hlăm Khua Yang, đru drei hdĭp luă gŭ êđăp ênang hdơ̆ng pô, thâo uêñ mĭn kơ mnuih mkăn, đru Phung Sang Aê Diê bi mguôp sa ai, leh anăn tlaih mơ̆ng klei amâo thâo bi djŏ êjai mă bruă mbĭt. “Mĭn kơ klei tŭ dưn kơ phung mkăn” hĭn kơ “klei tŭ dưn knŏng kơ pô” đru drei hdĭp tŭ dưn kơ Khua Yang leh anăn kơ jih jang mnuih. Klei tŭ dưn knŏng kơ pô jing klei huĭ hyưt kơ klei bi mguôp sa ai hlăm Phung Sang Aê Diê. Klei čuôt klih sĭt nik srăng atăt truh kơ klei bi mneh msao leh anăn bi kah phung.
Mâo sa klei boh sĭt êdi khăng ƀuh hlăm Phung Sang Aê Diê anăn jing, phung hur har săn asei mă bruă kơ Khua Yang jing hĕ phung amâo thâo bi djŏ kyua mơ̆ng lu mta klei kbiă hriê. Tơdah amâo mgaih mkra mtam ôh, srăng atăt truh kơ kƀah klei bi mguôp sa ai. Akâo kơ Khua Yang brei drei luă gŭ mă bruă kơ Khua Yang hŏng klei mĭn thâo bi mpŭ hdơ̆ng pô leh anăn uêñ mĭn klei tŭ dưn kơ mnuih mkăn, amâo djŏ ôh “hŏng klei mĭn kơ pô amâodah hŏng klei mgao”, kăn čoh čuăn amâodah knŏng mĭn hjăn kơ pô.
Ya bruă brei ngă čiăng djă pioh klei bi mguôp sa ai hlăm Phung Sang Aê Diê?
Wah lač: Ơ Khua Yang, pap brei kơ kâo đa kyuadah lu blư̆, kâo yơh jing phŭn ba klei amâo thâo bi djŏ hlăm Phung Sang Aê Diê. Brei kơ kâo klei thâo khăp, luă gŭ bi mpŭ hdơ̆ng pô, uêñ mĭn kơ klei tŭ dưn hdơ̆ng pô, čiăng đăm mâo klei bi mneh msao êjai mă bruă mbĭt. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
