Filipis 2:1-4
Nqe cim:
“Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug.” (Filipis 2:3)
Lus nug rau sawvdaws xav:
– Yam dab tsi ua rau Paulus zoo siab kawg li?
– Paulus qhia cov ntseeg hauv Filipis tej yam kev tiag taw twg cia kom muaj kev sib koom hauv pawg ntseeg?
– Peb cheemtsum ua neej muaj lub siab ua haujlwm li cas kom pawg ntseeg sib koom thiab tsis ua teebmeem?
Timthawj Paulus ntaus nqis siab thiab zoo siab rau pawg ntseeg Filipis vim lawv txoj kev loj hlob ntawm sab ntsuj plig (Filipis 1:3–5), tiam sis pawg ntseeg tseem muaj teebmeem tsis sib haum xeeb. Thaum kawg ntawm tsab ntawv, Paulus thiaj hais txog dua kev tsis sib haum xeeb loj ntawm ob tug poj niam uas yog E-audias thiab Xitikhes. Yog pawg ntseeg sib koom tau ua ke mas yog qhov uas zoo kawg nkaus thiab yuav ua rau Paulus “zoo siab kawg li”. Kev sib koom siab yog lub cim ntawm ib pawg ntseeg muaj zog thiab kuj yog qhov uas Tswv Yexus xav tau hauv Nws zaj lus thov Vajtswv zaum kawg uas ua tiav tes haujlwm txhiv tibneeg ntiajteb (Yauhas 17:20–23).
Hauv ntu Vajlugkub no, timthawj Paulus qhia txog lub hauv paus rau kev sib koom siab hauv pawg ntseeg, ua ntej yog “kev hlub”. Txuas ntxiv nws qhia txoj kev ua neej kom tsis muaj teebmeem mas yog “Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug”. Hauv phau txhais (HMOWSV) hais tias “Tsis txhob ua siab hlob txeeb ua ib yam dabtsi rau yus lossis tsab ua loj tiamsis yuav tsum txo hwjchim xam pom lwm tus zoo dua yus”. Tsis txhob xav txog yus xwb, tiamsis nej yuav tsum xav txog lwm tus thiab. “Siab hlob txeeb” yog lub siab twv yeej swb, nrhiav kev tshem tawm tus uas zoo dua yus mus. “Tsab ua loj” hauv lus Kilis yog muab ob lolus “koobmeej” thiab “khoob lug” los lo ua ke. Tus neeg ua Vajtswv haujlwm vim “siab hlob txeeb thiab xav tsab ua tus loj” yog ib tug neeg siab hlob uas ib txwm xav tias nws yog, thiab nyiam nrhiav tej yam uas tsis muaj nuj nqis xws li lub meej mom thiab kev hwm ntawm tus kheej. Qhov no yog qhov uas ua rau muaj kev tsis sib haum xeeb thiab kev sib cais nyob hauv pawg ntseeg. Ib yam li pawg ntseeg Kauleethaus tau sib faib thiab sib cav sib ceg vim qee leej xav tias lawv zoo dua lwm tus (1 Kauleesthaus 1:10–13).
“Ib tug tsis txhob khav hais tias ib tug zoo dua ib tug” yog tus cwjpwm ntawm tus uas twb loj hlob rau hauv Vajtswv lawm, pab tau peb txo hwjchim nrog lwm tus loj sib luag ua ke, xam pom lwm tus, zam tau kev tsis sib haum xeeb thaum ua hauj lwm ua ke. “Xam pom lwm tus” heev dua “xam pom yus tus kheej” pab tau peb ua neej muaj nqis rau Vajtswv thiab sawvdaws. Kev xam pom yus tus kheej xwb yog txoj kev rhuav kev sib koom siab hauv pawg ntseeg. Ua neeg qia dub yuav ua rau muaj teebmeem thiab yuav sib faib ua pab ua pawg.
Tej ntawd yeej pheej pom muaj tshwm nyob hauv pawg ntseeg, feem ntau yog los ntawm cov neeg uas mob siab rau ua Vajtswv haujlwm, lawv yoojyim tshwm muaj kev tsis sib haum xeeb los ntawm ntau qhov vimchiv. Yog tsis daws tau tam sim ntawd, yuav ua rau muaj kev tsis sib koom siab. Thov Vajtswv pab peb paub txo hwjchim ua Nws haujlwm los ntawm lub siab sib hwm thiab ib leeg xam pom ib leeg, tsis yog ua haujlwm “vim siab hlob txeeb lossis ntshaw lub meej mom uas nyob tsis ntev”, tsis taij lossis tsuas xav txog yus xwb.
Thov Vajtswv.
Tus Tswv, thov zam txim rau nyuamyaus vim ntau zaug nyuamyaus yog tus ua rau muaj kev tsis sib haum xeeb hauv pawg ntseeg. Thov pab nyuamyaus paub muaj lub siab hlub, txo hwjchim sib hwm thiab ib leeg paub xam pom ib leeg kom tsis txhob muaj teeb meem thaum ua hauj lwm ua ke. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb pom cheemtsum ua yam dab tsi kom pawg ntseeg ceev tau txoj kev sib koom?
Nyeem Vajluskub hauv peb lub xyoos: Yausuas 11
Kênh Youtube BHKTHN:
