Klei Aê Diê Blŭ: Klei Bi Hriêng 20:12-13
Êlan kliăng: “Đăm khăp pĭt ôh huĭdah ih jing ƀun ƀin, mblang ală ih leh anăn ih srăng mâo djăp mnơ̆ng ƀơ̆ng huă” (Klei Bi Hriêng 20:13)
Klei êmuh ksiêm mĭn: Si boh blŭ “mblang ală” čiăng lač ? Si phung alah bi êdah ai tiê thâo klam hŏng klei Aê Diê brei leh ? Ya klei ih akâo kơ Khua Yang bi mlih klei dlăng, hdră pô hdĭp mơ̆ng klei hriăm hruê anei ?
Aê Diê mjing leh anak mnuih jing mnơ̆ng hdĭp yuôm bhăn hĭn hlăm jih jang mnơ̆ng. Ñu brei kơ anak mnuih knga pioh hmư̆, ală pioh dlăng (êlan 12), leh anăn Ñu ăt brei kơ anak mnuih klei êngiê hlăm bruă yua djăp klei Aê Diê brei. Khădah snăn, anak mnuih brei hdĭp mâo ai tiê thâo klam kơ klei Aê Diê brei leh kơ pô. Klei Bi Hriêng 20:23 lač kơ dua mta mnuih, phung mblang ală srăng mâo djăp mnơ̆ng ƀơ̆ng huă, mklăk hŏng phung khăp pĭt srăng jing ƀun ƀin. Aê Diê brei kơ grăp čô mnuih mâo “ală”, ƀiădah phung mblang ală srăng mâo djăp ênŭm, phung pĭt ală srăng jing ƀun ƀin. Boh blŭ “mblang ală” bi êdah klei mdih, mđing leh anăn kriăng hlăm bruă knuă grăp hruê. Boh blŭ anei ăt lač jing brei thâo pai mă klei găl čiăng mă bruă, mjing mnơ̆ng dhơ̆ng kơ klei hdĭp. Ƀiădah klei yuôm bhăn êlam hĭn mơ̆ng klei gĭr mblang ală jing hdĭp đua klam hŏng bruă knuă leh anăn klei hdĭp Aê Diê brei kơ pô.
Mâo lu blư̆ kyua lu mta phŭn mdê mdê ngă kơ anak mnuih amâo dưi mblang ală ôh. Ƀiădah tơdah amâo gĭr suăi êmăn tui hriăm lui hĕ bruă knuă snăn amâo mâo ôh hlei pô dưi mâo klei tŭ jing. Mơ̆ng điêt, tơdah sa čô hđeh sang hră amâo gĭr hgao klei čiăng pĭt čiăng kriăng hriăm hră, mprăp kơ klei bi lông snăn si thâo dưi mâo klei dưi bi lông? Hriê kơ prŏng, amâo mâo ôh hlei pô dưi ñĕ kơ klei dleh dlan, êdu awăt, ƀiădah hlei pô gĭr hgao snăn srăng dưi trei mđao, bi phung alah, “Ăt čiăng pĭt ală, mdei ƀiă, dôk kuăl kngan ƀiă čiăng pĭt, snăn klei ƀun ƀin srăng truh kơ ih msĕ si mnuih knĕ, leh anăn klei kƀah srăng truh kơ ih msĕ si sa čô mnuih djă mnơ̆ng bi blah” (Klei Bi Hriêng 6:10-11). Ƀun amâo djŏ jing klei soh ôh, ƀiădah hlei pô hdĭp amâo thâo đua klam, alah jing ƀun ƀin snăn mâo klei soh hŏng Khua Yang, hŏng ala ƀuôn, gŏ sang leh anăn hŏng pô. Lu phung đăo bi mĭn knŏng tơdah drei ngă soh hŏng klei bhiăn Aê Diê kơh jing ngă soh, ƀiădah tơdah drei hdĭp alah, kƀah bruă klam hŏng klei Khua Yang brei, drei ăt ngă soh hŏng Khua Yang. Y‑Yakơ mtô leh: “Hlei pô thâo ngă jăk ƀiădah amâo ngă ôh, jing soh yơh” (Y‑Yakơ 4:17).
Akâo kơ Khua Yang đru grăp čô drei ƀuh klei Aê Diê brei hlăm klei hdĭp pô čiăng kreh kriăng, jih ai tiê, jih klei mĭn, ai ktang hlăm bruă Khua Yang jao. Hlăm djăp boh klei, bi êdah nanao klei thâo mĭn, dưm klei đăo hlăm Khua Yang hlăm knuih hdĭp mâo bruă klam hŏng djăp bruă pô čiăng mơ̆ng anăn drei bi êdah Anăn Khua Yang kơ lu mnuih.
Si drei hdĭp kreh kriăng leh anăn bi êdah bruă klam pô hlăm djăp bruă?
Wah lač: Ơ Aê Diê jing Ama khăp hơiêng, akâo kơ Ih pap brei kơ kâo kyua klei kâo mưng alah. Akâo kơ Ih đru kâo bi mlih, thâo hdĭp huĭ mpŭ kơ Khua Yang mơ̆ng knuih hdĭp kreh kriăng mă bruă leh anăn mâo bruă klam hŏng ya klei Khua Yang brei.
Dlăng Klei Aê Diê Blŭ hlăm tlâo thŭn: Y‑Yôhan 4:27-54
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
