Klei Aê Diê Blŭ: Klei Mtô Mñă Klei Bhiăn 15:1-11
Êlan kliăng: “Ƀiădah amâo srăng mâo mnuih ƀun ƀin ôh ti krah diih, kyuadah Yêhôwa srăng hơêč hmưi klei jăk jĭn kơ diih hlăm ala čar Yêhôwa Aê Diê diih brei kơ diih mă bha jing ngăn dưn” (Klei Mtô Mñă Klei Bhiăn 15:4).
Klei êmuh ksiêm mĭn: Ya klei Aê Diê mtă kơ phung ƀuôn sang Israel brei ngă kơ nư pô riêng gah ti knhal tuč thŭn tal kjuh? Mơ̆ng klei čuăn anei brei ƀuh si Aê Diê jing? Ya klei Aê Diê ƀuăn hŏng phung ƀuôn sang Ñu? Ya klei mñă kơ drei mơ̆ng klei hriăm anei?
Klei bhiăn Aê Diê mtă ti knhal tuč grăp kjuh thŭn jing thŭn Sabat, brei lăn mâo klei mdei (Bruă Lêwi 25:1-7). Êngao kơnăn, anei ăt jing thŭn “bi êngiê nư” (êlan 1) čiăng lač amâo lŏ juă nư ôh. Grăp čô pô nư srăng bi êngiê ya ñu brei leh kơ pô riêng gah ñu čan. Hlăm ênuk đưm, klei čan nư khăng kbiă hriê mơ̆ng klei luh liê boh mnga ngă kơ lu gŏ sang truh kơ klei dleh knap hlăm klei duah ƀơ̆ng. Amâodah klei djiê truh bhiâo rit kơ ung, snăn phŭn gơ̆ng duah ƀơ̆ng jing kpĭ kpiêt, tơl mâo đa đa gŏ sang čhĭ wăt anak jing hlŭn kơ phung sah mdrŏng čiăng dưi tla nư klei. Kyuanăn hlăm Klei Aê Diê Blŭ mâo đa klei yăl dliê kơ klei đuôm nư, ƀun ƀin leh anăn hlŭn khăng bi djŏ mbĭt (II Bruă Mtao 4:1)
Klei bhiăn kơ thŭn bi êngiê nư hlăm trăn anei lŏ sa blư̆ đru drei ƀuh klei bhiăn Aê Diê amâo djŏ knŏng jing klei bhiăn khăng ôh, ƀiădah mơ̆ng anăn drei ƀuh klei khăp Ñu hŏng klei mđing uêñ mdê hĭn pioh kơ lu êpul mnuih mdê mdê dơ̆ng mơ̆ng bruă đơ điệt hlăm klei hdĭp. Klei bhiăn Aê Diê anei jing msĕ si klei lông dlăng klei đăo hŏng pô nư, kyua čoh čuăn kơ diñu wăt tơdah dŏ čan jing prŏng dưn ăt brei lui jih mơh hlăm thŭn Sabat. Pô nư brei đăo snei, klei mdrŏng sah, êbeh dlai diñu mâo kluôm dhuôm hriê mơ̆ng klei jăk leh anăn klei pap Aê Diê. Kyuanăn, brei diñu ăt mâo ai tiê jăk, klei thâo pap kơ phung ƀuh knap, hdĭp kmah hŏng digơ̆, leh anăn Khua Yang ƀuăn srăng hơêč hmưi kơ jih jang phung ƀuôn sang Ñu tơdah diñu gưt asăp ngă hlue klei bhiăn Aê Diê.
Drei dôk hdĭp hlăm ƀuôn sang lu mnuih mâo knhuah hdĭp knŏng uêñ mĭn mkăm pioh kơ pô hĭn kơ mđing mĭn kah mbha, bi đru hdơ̆ng găp êjai mâo klei kƀah. Lu mnuih khăng mkuôm pioh nanao mnơ̆ng mnuă amâo tuôm yua ôh, blei mkăp lu mta mnơ̆ng knŏng kyua klei tluh čiăng hĭn kơ kyua klei kƀah, amâodah duah mnêč êlan dưn klei jăk mơak ti dlông klei ruă knap mnuih mkăn. Klei bhiăn Aê Diê kơ thŭn bi êngiê nư jing klei lông dlăng pioh kơ grăp čô phung đăo. Drei amâo adôk djă pioh klei bhiăn thŭn Sabat ôh, ƀiădah klei hriăm anei mñă kơ drei brei thâo ƀuh klei jăk, klei khăp klei pap Khua Yang kơ klei hdĭp drei, leh anăn akâo kơ Khua Yang brei kơ drei mâo ai tiê kmah, thâo mgei ai tiê ti anăp klei dleh dlan, kƀah knap hlăm phung ayŏng adei hlăm Sang Aê Diê leh anăn wăt phung ƀun ƀin Aê Diê dưm jŭm dar drei, čiăng dưi dôk hdĭp kăp thiê brei hĭn kơ hrui mkăm.
Ya klei drei čiăng ƀuăn rơ̆ng hŏng Khua Yang mơ̆ng klei hriăm anei?
Wah lač: Ơ Khua Yang jing Pô bŏ hŏng klei jăk leh anăn klei khăp. Akâo kơ Ih đru kâo hdơr nanao, jih mnơ̆ng kâo mâo jing dŏ Khua Yang brei, čiăng kơ kâo thâo kah mbha kơ pô dôk kƀah čiăng mâo klei đru hŏng klei mơak.
Dlăng Klei Aê Diê Blŭ hlăm tlâo thŭn: Klei Mmuñ Hđăp 74:1-23; 75:1-10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
