II.Kevcai 15:1-11
Nqe cim:
“Tus Tswv uas yog nej tus Vajtswv yuav foom koob hmoov rau nej thaum nej mus nyob hauv lub tebchaws uas Nws coglus muab rau nej. Nws yuav tsis pub nej ib tug twg pluag” (nqe 4).
Lus nug rau sawvdaws xav:
– Thaum tas xya lub xyoo, Vajtswv samhwm kom cov neeg Yixalayees ua licas rau cov nyiaj uas luag tshuav lawv nqi?
– Tus cai tswj no qhia paub Vajtswv yog tus zoo licas?
– Tus Tswv coglus tseg licas rau Nws haivneeg?
– Zaj kawm no qhia rau koj paub yam dabtsi?
Vajtswv txoj kevcai samhwm thaum xaus xya lub xyoo uas yog xyoo Xanpataus, yuav tsum cia av so (Levis Kevcai 25:1-7). Dua li ntawd, lub xyoo no kuj yog “xuam tej nyiaj” (nqe 1) txhais tau hais tias yog xyoo zam cov neeg tshuav nqi. Tagnrho cov tswv uas qiv nyiaj yuav tsum zam tej nyiaj uas lawv cov kwvtij tshuav nqi. Nyob rau tiam thaum ub, cov neeg qiv txais nyiaj yog pib los ntawm qhov ua tsis tau qoobloo tsevneeg txomnyem kev noj haus. Lossis kuj yog tus txivtsev cia li tso ntiajteb tseg, ua rau tsis muaj leejtwg nrhiav nyiaj txiag los pab lub cuabyig, muaj qee tsevneeg tseem muab tej menyuam muag mus ua qhev rau cov neeg npluanuj kom tau nyiaj siv yuav noj haus rau tsevneeg. Yog li nyob hauv phau Vajluskub thiaj muaj tej zaj lus hais txog tshuav luag nqi, tshaib nqhis thiab ua qhev (II.Vajntxwv 4:1).
Txojcai hais txog xyoo xuam nujnqis hauv ntu Vajluskub no ib zaug ntxiv qhia rau peb pom Vajtswv txoj kevcai tsis yog tej kevcai nruj xwb, tiamsis dhau qhov no peb pom Nws txojkev hlub txhua hom neeg, tej haujlwm loj haujlwm me hauv lub neej huvsi. Tus Tswv txoj kevcai no zoo li ib qhov kev sim cov tswv uas luag tshuav nqi txojkev ntseeg, rau qhov hais kom lawv yuav tsum tsis txhob yuav nqi xyoo Xanpataus lawm, txawm yog luag tshuav nqi ntau lossis tsawg. Cov tswv uas luag tshuav nqi cheemtsum ntseeg hais tias, txojkev npluanuj uas lawv muaj yog tus Tswv txojkev hlub thiab ncaj ncees pub rau lawv muaj xwb. Yog li, lawv yuav tsum muaj lub siab ncaj ncees, hlub cov neeg txomnyem, ua siab dawb siab zoo rau cov txomnyem, thiab tus Tswv coglus yuav foom koob hmoov rau Nws haivneeg yog hais tias lawv ua raws Nws txoj kevcai no qhia.
Peb tabtom ua neej nyob rau lub ntiajteb uas tibneeg huas yam ub yam no rau yus tus kheej tagnrho tsis hlub tshua, tsis faib, tsis sib pab thaum muaj kev cheemtsum. Muaj ntau leej nyiam tuav tej yam uas yus siv tsis txog, yuav ntau yam vim yog nyiam xwb tsis tau cheemtsum siv, lossis nrhiav tswvyim ua kom yus tau tsis tas paub lwm tus mob siab li. Tus Tswv txojcai tsis yuav peb nqi yog ib qhov kev sim saib cov ntseeg Yexus puas muaj lub siab hlub tshua txog lwm tus. Peb tsis coj txoj kevcai xyoo Xanpataus lawm, tiamsis zaj kawm hnub no qhia kom peb pom tus Tswv ua siab ntev hlub peb thiab thov Vajtswv pab kom peb muaj lub siab dawb siab zoo, paub hlub cov kwvtij ntseeg Yexus uas raug txomnyem hauv Pawg Ntseeg thiab cov neeg txomnyem uas tus Tswv cia nyob ibncig ntawm peb, kom paub ua lub neej txaus siab hlo pub rau lwm tus.
Koj coglus yuav ua li cas rau tus Tswv thaum kawm dhau zaj no?
Thov Vajtswv,
Vajtswv, Koj yog tus ua siab ntev thiab muaj kev hlub. Thov Koj pab nyuam yaus niaj hnub nco ntsoov hais tias tej uas nyuam yaus muaj yog Koj pub, thiab zoo siab hlo faib pub rau cov neeg cheemtsum kev pab. Amees.
Nyeem Vajluskub hauv peb lub xyoo: Phau Ntawv Nkauj 74:1-75:10
Kênh Youtube BHKTHN:
