Klei Aê Diê Blŭ: I Y‑Pêtrôs 3:13-14
Êlan kliăng: “Ƀiădah wăt tơdah diih tŭ klei knap mñai kyua klei kpă, diih srăng mâo klei jăk jĭn. Đăm huĭ kơ klei diñu huĭ ôh, kăn rŭng răng rei.” (I Y‑Pêtrôs 3:14)
Klei êmuh ksiêm mĭn: Si klei Khua ƀĭng kna Y‑Pêtrôs lač, tơdah phung đăo ngă klei jăk ƀiădah ăt tŭ klei arăng ngă jhat mơh? Si mblang kơ klei mtă mtăn anei? Si Klei Aê Diê Blŭ bi mđĭ ai drei hruê anei hlăm bruă hiu hưn Klei Mrâo Mrang Jăk?
Êlan hdră tal sa Hur Har Kơ Klei Jăk, knŏng lač hlăm klei jing yang đar, kyuadah Khua ƀĭng kna Y‑Pêtrôs leh anăn jih jang Phung đăo kơ Krist hlăk anăn ăt dôk tŭ klei phung ƀuôn sang Israel leh anăn phung knŭk kna Rôm ngă jhat mơh. Anăn yơh jing phŭn knhal lŏ brei êlan hdră tal dua: Kăp Tŭ Klei Knap Mñai (êlan 14).
Khua ƀĭng kna Y‑Pêtrôs kñăm, tơdah “hur har kơ klei jăk” snăn amâo mâo pô srăng “ngă jhat” kơ drei ôh, ƀiădah tơdah arăng ngă jhat snăn mă tŭ bĕ, leh anăn “srăng mâo klei jăk jĭn”. “Klei jăk jĭn” jing boh blŭ Khua Yang Yêsu yua hlăm Y‑Mathiơ 5:10-12, Khua Yang lač hlei pô tŭ klei arăng ngă jhat kyua Ñu srăng mâo klei jăk jĭn kyuadah digơ̆ srăng mă tŭ klei mưn prŏng hlăm adiê leh anăn mâo kdrêč mbĭt hŏng “phung khua pô hưn êlâo”. Hĭn mơh, I Y‑Pêtrôs 5:10 brei thâo, klei tŭ klei knap mñai atăt drei truh kơ klei kluôm ênŭm, ktang kjăp, leh anăn mâo klei bi knal mrâo hlăm Khua Yang. Klei tŭ klei knap mñai Khua ƀĭng kna Y‑Pêtrôs lač, amâo djŏ kơ djăp mta klei knap mñai ôh, ƀiădah tŭ klei knap mñai “kyua klei kpă ênô”, kyua “hur har kơ klei jăk”, leh anăn kyua gưt ngă tui si “klei Aê Diê čiăng”. Ênguôt êdi, tơdah lu Phung đăo kơ Krist dôk tŭ klei knap mñai kyua klei soh leh anăn kyua klei jhat ƀai diñu pô (I Y‑Pêtrôs 3:17).
Phung đăo kơ Krist amâo knŏng kăp tŭ klei knap mñai tơdah hdĭp klei hdĭp hưn bi sĭt, ƀiădah wăt brei tŭ klei knap mñai hŏng ai tiê klei mĭn kjăp ktang, “đăm huĭ kơ klei diñu huĭ ôh”, čiăng lač đăm huĭ kơ klei diñu arưp aram, leh anăn “kăn rŭng răng rei”, čiăng lač huĭ hyưt, luč klei êđăp ênang hlăm ai tiê. Khua ƀĭng kna Y‑Pêtrôs tuôm huĭ blao hngah kơ Nai ñu pô (Y‑Mathiơ 26:69-75), ƀiădah leh bi tuôm hŏng Khua Yang kbiă lŏ hdĭp, leh anăn mông anei, thâo leh kơ klei djiê leh anăn mbĭt hŏng jih jang klei huĭ mduĭ ñu dlưh lĕ hlŏng lar leh, snăn ñu lŏ jing sa čô mnuih jhŏng ktang tơdah tlă anăp hŏng klei arăng ngă jhat (Bruă Phung Khua Ƀĭng Kna 4:1-31).
Mtao mniê čar Ăngle, Mary Tudor mâo anăn arăng lŏ iêô “Mary Mhao kơ Êrah” kyuadah ñu bi êmut snăk kơ phung đăo kơ Klei Mrâo Mrang Jăk. Leh đĭ jing mtao, ñu phat kđi mă khua pô mtô Hugh Latimer mơ̆ng Worcester leh anăn khua pô mtô Ridley mơ̆ng London, lač digơ̆ jing phung đăo soh, leh anăn brei čuh bi mdjiê digơ̆ hŏng pui, hruê 16/10/1555. Êjai arăng dôk kă digơ̆ dua ti gơ̆ng, khua pô mtô Latimer wir dlăng kơ khua pô mtô Ridley leh anăn lač: “hruê anei drei srăng čuh sa ƀĕ pui diăn trơ̆ng nanao amâo srăng djiê ôh ti čar Anh”. Digơ̆ tŭ klei knap mñai kyua Khua Yang ƀiădah digơ̆ jing phung mâo klei jăk jĭn, kyuadah digơ̆ bi mlih mnĭt mông ruă knap bhiâo, čiăng mâo sa klei hdĭp hlŏng lar jăk jĭn leh anăn guh kơang hŏng Aê Diê. Klei hdĭp leh anăn klei djiê kyua klei đăo digơ̆, jing leh akŏ phŭn bi mđĭ ai kơ lu ênuk phung anak ƀuôn sang Aê Diê tơdah tŭ klei lông dlăng dleh dlan. Akâo kơ Khua Yang brei drei ăt hur har kơ klei jăk nanao leh anăn hmiêt mkăp tŭ klei knap mñai êjai hiu hưn Klei Mrâo Mrang Jăk Khua Yang. Klei jăk jĭn dôk guôn drei nanao tơdah drei dôk hdĭp djŏ tui si Klei Aê Diê Blŭ mtô.
Si ngă drei dôk tŭ klei knap mñai kyua jing phung hưn bi sĭt kơ Khua Yang amâodah kyua klei mkăn?
Wah lač: Ơ Khua Yang, kâo thâo srăng mâo klei arăng ngă jhat dleh dlan tơdah kâo dôk hdĭp hưn bi sĭt kơ Khua Yang. Akâo Khua Yang brei kơ kâo klei đăo, klei ktang, leh anăn knang kjăp kơ Khua Yang čiăng dưi hĭn hŏng jih jang klei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
