I Petus 3:13-14
Nqe cim:
“Yog nej ua nej lub neej zoo lawm, txawm yogmuaj neeg tsimtxom nej los nej yeej yuav muaj kev kaj siab; nej tsis txhob ntshai lawv thiab tsis txhob txhawj.” (I Petus 3:14)
Lus nug rau sawvdaws xav:
– Timthawj Petus hais li cas rau cov ntseeg uas ua zoo tiamsis tseem raug tsimtxom?
– Cov lus ntuas no muaj lub ntsiab li cas?
– Vajtswv Txojlus hnub no txhawb peb lub zog li cas rau tes haujlwm ua timkhawv?
Tus lw thib ib yog Rau Siab Ua Zoo tsuas hais txog seem uas pheej ua, vim Timthawj Petus thiab cov ntseeg Yexus lub sijhawm ntawd kuj tabtom raug cov neeg Yudais thiab cov nomtswv Loos tsimtxom. Qhov no yog qhov vimchiv uas Petus hais txog tus lw thib ob: Npaj Nroos Tiv Txomnyem (nqe 14).
Timthawj Petus hais tias yog “rau siab ua zoo” ces yuav tsis muaj leejtwg “ua phem” rau peb, tiamsis yog muaj los cia li lees txais thiab suav hais tias yog “koob hmoov”. “Koob hmoov” yog tej uas tus Tswv siv hais hauv Mathais 5:10-12, Nws hais rau cov neeg uas raug tsimtxom vim Nws lub npe tau koob hmoov, rau qhov lawv yuav tau txais nqi zog hauv kev ua neej thiab tau koom nrog cov “cev Vajtswv lus”. Dua li ntawd, I Petus 5:10 qhia paub tiv txomnyem coj peb mus txog qhov zoo txaus nkaus, ruaj khov, thiab lub neej tshiab hauv tus Tswv. Qhov tiv txomnyem uas Petus hais txog no tsis yog tej kev txomnyem, tiamsis yog tiv txomnyem “vim txojkev ncaj ncees”, vim “rau siab ua zoo”, thiab vim ua “raws li Vajtswv lub siab nyiam.” Tu siab uas ntau tus ntseeg Yexus tabtom tiv txomnyem vim tej kev txhaum thiab tej kev phem uas yus ua (I Petus 3:17).
Cov ntseeg Yexus tsis yog zoo siab hlo tiv txomnyem thaum mus ua timkhawv xwb, tseem yuav tiv txomnyem ua kom lub siab ruaj khov, muaj zog, “tsis txhob ntshai lawv”, txhais tau hais tias tsis txhob ntshai tej uas lawv hem, thiab “tsis txhob txhawj”, txhais hais tias tsis txhob ntxhov siab. Timthawj Petus twb muaj lub siab ntshai tsis lees paub nws tus xibhwb (Mathais 26:69-75), tiamsis tom qab uas ntsib Tswv Yexus sawv hauv qhov tuag rov los, thiab nimno paub hais tias txojkev tuag thiab txhua yam kev txhawj ntshai swb lawm, yog li Petus ua tau siab tawv qhawv thaum raug kev tsimtxom (Tes Haujlwm 4:1-31).
Tus poj vajntxwv Akiv hu ua Mary Tudor, nws muaj dua ib lub npe hu ua “Mary Nqhis Ntshav”, vim lub siab ntxub cov ntseeg Txojmoo Zoo. Tomqab uas nws tau los ua poj vajntxwv, nws suav hais tias tus txwjlaug Hugh Latimer uas nyob Worcester thiab tus txwjlaug Ridley uas nyob hauv lub nroog Lon Đon coj kevcai ntseeg txawv ces rau txim muab nkawd ntes coj mus hlawv rau hnub 16/10/1555. Thaum raug ntes khi rau ntawm tus ncej, txwjlaug Latimer tau tig mus rau ntawm txwjlaug Ridley thiab hais tias: “Hnub no wb yuav taws ib tug tswm ciab cig tsis paub tuag nyob hauv lub tebchaws Akiv no.” Nkawd tiv txomnyem vim tus Tswv, nkawd yog cov uas tau koob hmoov, rau qhov nkawd muab qhov tiv kev mob ib vuag mus pauv txojkev kaj siab nyob ibtxhis uas Vajtswv pub. Nkawd txojkev ua neej thiab qhov kev tuag vim kev ntseeg ua lub zog txhawb tau Vajtswv haivneeg lub zog thaum raug kev sim siab txomnyem. Thov Vajtswv pab kom peb niaj hnub kub siab lug ua qhov zoo thiab zoo siab hlob tiv txomnyem thaum tawm mus qhia tus Tswv Txojmoo Zoo. Koob hmoov kaj siab nyob tos rawv peb cov uas ua raws li Vajtswv Txojlus qhia.
Thov Vajtswv,
Tus Tswv, nyuam yaus paub hais tias yuav muaj tej kev tsimtxom nyuaj siab thaum mus ua timkhawv qhia Koj zaj. Thov Koj pub kom nyuam yaus muaj txaus kev ntseeg, lub zog, thiab kev cia siab rau Koj, kom nyuam yaus kovyeej txhua yam. Nyuam yaus tuav Tswv Yexus lub npe thov, Amees.
Peb tabtom tiv txomnyem ua timkhawv qhia tus Tswv zaj lossis yog ua yam dabtsi?
Nyeem Vajluskub hauv peb lub xyoo: I Xamuyees 7
Kênh Youtube BHKTHN:
